張學友任草蜢嘉賓解開「前輩迷思」 蘇志威紅館倒數「登六」

「THREE IN LOVE 草蜢演唱會2026」昨晚（5月2日）紅館舉行第六場演出，寰亞傳媒集團老闆林建岳的女兒林恬兒、寰亞傳媒集團行政總裁林孝賢、陳奕迅與太太徐濠縈、鄺美雲、馮允謙、黃淑蔓、車婉婉和劉浩龍等捧場，表演嘉賓張學友。

草蜢紅館演唱會來到第六場演出。

表演嘉賓張學友。

學友出場與草蜢合唱《暫停，開始過》，觀眾揮動手燈大合唱。阿智表示學友擔任草蜢25周年演唱會表演嘉賓，40周年再做嘉賓別具意義。他說：「自從我哋師傅（梅艷芳）走咗，我哋視學友為長輩，有咩都會去問佢。」學友笑言：「我本來唔戴眼鏡上台嘅，草蜢好似食咗防腐劑，出場前台下啲人叫我最好戴返副眼鏡，遮吓啲皺紋、眼袋，睇起上嚟夾啲！」全場笑聲。

張學友與草蜢合唱《暫停，開始過》。

阿智指學友一直有個「迷思」，到底與草蜢誰是前輩？他說：「學友成日話我哋出道先，我反對，因為我哋參加完新秀之後，我參加19區歌唱比賽唱學友嘅《造夢者》。」他與學友即興合唱幾句。蘇志威稱草蜢參加1985年新秀歌唱大賽，同年跟梅姐踏上紅館表演，學友自爆1983年參加新秀但無入圍，翌年參加歌唱比賽並於1985年出唱片，所以「迷思 」解開，四捨五入，學友是草蜢的「前輩」。

張學友與草蜢

張學友與草蜢

提起「前輩」，學友大讚林珊珊，「講起林珊珊，佢真係好勁！上網睇到佢唱《再見Puppy Love》，我突然變得後生咗，好耐冇試過回春嘅感覺，佢係我覺得最正嘅嘉賓。」蔡一傑說：「你都好正，每次見到你都好似見到家人！」學友認真地讚傑仔：「你好勁！」全場掌聲。學友說：「草蜢無論大騷細騷、有騷冇騷，都一齊40年！我自己一個人唱40年唔使理人，好易，但你哋三個一齊40年真係好難，唔係講笑，衷心佩服！」

張學友與草蜢

張學友與草蜢

阿智表示有禮物送給學友，他笑說：「我等咗好耐，上網睇到嘉賓有禮物！」是一支寫了「學友兄，你是我們唯一傳奇。智、威、傑上」錦旗，學友笑言不可以掛在睡房，阿智說：「你掛住一個人就得啦！」學友說：「要入紙申請㗎！」全場爆笑。傑仔特別點唱學友的《你是我今生唯一傳奇》合唱，阿智得戚對觀眾說：「你哋買飛睇學友要第一行，我哋可以咁貼，係咪好妒忌呢？」

張學友與草蜢

草蜢為張學友送上禮物。

昨晚草蜢完騷後，阿智、傑仔、經理人林珊珊和演唱會監製家萍等團隊，在紅館後台為5月3日生日，正式「登六」的蘇志威倒數慶祝生日，踏入零時零分大合唱生日歌，非常熱鬧。太太劉小慧與兩個囡囡Yumi和Ina上前擁抱，蘇志威揚言：「聽日尾場，我會落足200%力表演，慶祝我60大壽！」

完騷後，眾人為5月3日正式「登六」的蘇志威倒數慶祝，

踏入零時零分大合唱生日歌。

太太劉小慧與兩個囡囡Yumi和Ina上前擁抱。

草蜢《THREE IN LOVE演唱會 - 澳門站》前晚及昨晚（10月24及25日）於澳門威尼斯人綜藝館舉行，座無虛席，寰亞傳媒集團老闆林建岳博士及行政總裁林孝賢等到場支持。前晚頭場草蜢即興邀請觀眾席上的「鐵粉」容祖兒上台合唱，而昨晚第二場的表演嘉賓則是老友古天樂。除了跳唱《今期流行》外，他更以「演藝人協會會長」身份，宣布草蜢成為「健力士世界紀錄」的「華語最長壽不變陣組合」（Longest-running C-Pop Group with No Line-up Changes），全場同歡！

草蜢在《THREE IN LOVE演唱會 - 澳門站》上獲頒「健力士世界紀錄」的「華語最長壽不變陣組合」。

第一晚演唱會，容祖兒原本在觀眾席睇騷，突然被草蜢召喚上台，她立即急急腳穿過觀眾席登場。四人互相擁抱問好後，蔡一智說：「我知道祖兒好忙，因為佢明年一月將會喺香港啟德主場館開演唱會。」傑少感性地說：「我真係好開心睇住祖兒唔同嘅階段，一路變好，一路進步，成為今日嘅天后，真係好正！」祖兒說：「好似阿智所講，我哋係FRAMILY（Friend+Family），認識咗你哋之後，我多咗三個大哥哥。」

草蜢

草蜢、容祖兒

阿智難忘在前輩羅文家拜年時初次見到祖兒，蘇志威爆料：「其實更早之前喺歌迷聚會見過你啦！」祖兒說：「我由細到大都係你哋嘅歌迷，好細個就聽你哋嘅歌，當我入咗行真係可以同你哋合作，你哋好錫我，睇住我唔同階段嘅成長，呢個經歷真係好特別，可以一齊為香港嘅樂壇努力。」傑少邀請祖兒即興合唱一曲，阿智問她最熟悉草蜢哪首歌？祖兒得戚笑說：「不如問我草蜢有邊隻歌唔熟？我熟讀草蜢嘅歌庫，其中有一首歌好啱我依家嘅心聲，亦代表咗我永遠、呢一世嘅心聲，歌名叫《永遠愛著你》！」

草蜢、容祖兒

草蜢、容祖兒

草蜢、容祖兒

草蜢、容祖兒

昨晚第二場表演嘉賓古天樂出場，與草蜢跳唱《今期流行》，全場High爆！其實他們與古天樂識於微時，非常老友，傑少表示古天樂𨒇未出道已互相認識，蘇志威與他更拍劇朝夕相對半年，至於阿智是他的健身教練。之後他們合唱30年前，古天樂為草蜢MV做男主角的歌曲《原諒我是我》。唱完歌，古天樂認真地表示另有重要任務，就是以「演藝人協會會長」身份，宣布草蜢成為「健力士世界紀錄」的「華語最長壽不變陣組合」，並邀請「健力士世界紀錄」官方認證官Jacob Yip上台詳細說明。

草蜢

草蜢、古天樂

草蜢、古天樂

草蜢、古天樂

認證官Jacob說：「要得到呢個紀錄要乎合三個條件：第一，草蜢係『華語組合』，作品主要係廣東話和普通話，過去超過40年，佢哋為華語地區注入咗音樂及舞蹈嘅力量。第二，『最長壽』，我哋以年和日作計算，以1985年7月4日草蜢喺香港利舞臺參加第四屆新秀複賽，參賽歌《一起衝》，呢個紀錄衝到依家嚟到威尼斯人呢個舞台，總數係41年112日，每一年都要對演藝有相當嘅貢獻，例如唱片、演唱會、廣告、商演同埋代言等。我同資深傳媒人鄭丹瑞先生、音樂人陳光榮先生，由1985年睇到2026年，的確係每一年沒有斷續喺音樂同埋舞蹈嘅貢獻。其實係極其艱難，好似馬拉松咁三個人要一齊跑，仲要係世界級嘅水準。」

認證官Jacob（中）

「第三，『不變陣』，成員人數由1985年7月4日起，都係蘇志威、蔡一智、蔡一傑，三位，中間沒有任何變更。呢段關係的確好厲害，真係做到無論順境逆境、貧富、健康與否，都係一起衝。」蘇志威說：「I Do」全場爆笑。認證官Jacob續說：「呢個紀錄充滿生命力，只要你哋繼續喺舞台上，紀錄就會不停地刷新。」然後由古天樂頒發證書給草蜢及大合照留念。

草蜢

阿智說：「我哋三個會繼續努力，應承大家，我哋會有更多更好嘅作品、更好嘅演唱會送俾大家。」蘇志威說：「有幾年曾誤傳我哋無嘢做解散，其實嗰幾年我哋一直都喺世界各地演出，今日得到健力士證實我哋係冇試過分開，多謝！」

草蜢

而有份認證草蜢創下世界紀錄的鄭丹瑞（旦哥），早在1985年起，每次都是他在頒獎禮上宣布「最佳組合獎」給草蜢，作為睇住他們長大的前輩，旦哥昨日專程到澳門睇綵排，恭喜草蜢兼為他們開騷打氣，笑言因為趕返香港湊孫未能留下睇騷。

草蜢

昨晚尾場，觀眾超級熱情，完騷不散場繼續嗌encore，草蜢再度上台唱《暫停，開始過》和《世界變得很美》，觀眾都不肯走，草蜢三度再出場跟大家講「多謝」，並叮囑大家安全回家，他們才乖乖離開。

恭喜草蜢！

演唱會後草蜢接受訪問，提到師傅梅艷芳的骨灰事件，阿智表示已交警方處理，所以不便評論和猜測，希望盡快水落石出。蔡一傑和蘇志威透露經常夢到梅姐，很懷念和她的美好回憶。至於明年1月16和17日，草蜢將在台北小巨蛋舉行兩場演唱會，問到表演嘉賓名單，他們大賣關子，不過就公開召喚張惠妹、蔡依林、庾澄慶和周杰倫等好友捧場，歡迎上台一齊玩。

大合照