撰文：勾玄@香港兔蘆術數學會
公司有個基層同事，真係唔知佢馮咩咁大支野，同所有人講野，都會用一副居高臨下既姿態去同你講野，唔理你既身份係出街阿姐，同級同事，以至經理，佢永遠都係擺出一張臭臉，彷彿你響度阻緊佢既時間。咁又岩既，佢永遠都係準時收工既，佢仲會好好心咁提醒某一兩個比較熟絡既同事收工：喂，阿XXX，你走唔走架？屌Y，我係o個位同事就寧願呢世都冇朋友都唔情願識佢啦。
終於，有一日，我得到呢位麻煩同事既寵幸啦，可憐既我，響唔知咩原因既情況下比人噴到一面屁，所謂士可殺，不可辱，我誓要報仇說恨，以消心頭之怨。
講到報牛，即刻諗起我既一位朋友，佢係六壬師傅，同佢一五一十講完我既慘況，佢冇表示，只係問我想點做。
「緊係攪到佢愈慘愈好啦，你係咪有法門攪到佢可以瞓幾個星期醫院架？」我怨恨填胸。
「係，但係你真係要咁做？」「緊係，你估我特登黎同你講玩笑鬧著玩呀？」我超激動。
「我知你好嬲，不過想問清楚你係咪真係要咁做啫。」朋友不愠不火既回應，我開始覺得佢話中有話。
「所謂殺敵一萬，自損三千，凡事都要付出代價既」
「咁我要俾咩做代價呀？」我有少少驚訝。
「呢種法門始終於人有損，有違天理，需以陰德抵償。」朋友徐徐答道。「早排為你起卦，知你累積了一定陰德，可能係前世既修為，或者係今世你行善積德而儲返黎既。」
我聽完，即刻開心晒：「咁冇問題啦，最驚我冇得扣啫，即刻開始啦。」
朋友做左個手勢阻止我講落去，佢繼續講「陰德，係種無形既福份，佢唔會以一種固定既形式去顯現俾你知道，亦到冇特定既方法去儲返黎。一個人十年唔買一次六合彩，一買就中頭獎、一團旅行團遇上嚴重既交通意外，全車死晒，就你一個輕傷，呢 D 全部都可能係當事人以德抵債既結果。佢唔會有一個數字去話到俾你知，你有幾多數值既福德，亦唔可能有數計到你做一次咁既法事會扣左你幾多既福德，冇人會知，包括我。」
我沈默落黎，一時間唔知點去決定。朋友見我咁樣，佢繼續講：「其實做人做事，講既係緣份，講究既係修為，損人利己既事，表面上好似俾你賺左，其實，你失去既可能更多，人往往比表像既事物吸引，做錯決定，結果反而招致業火燒身，好傻呀。」
「其實，你同事咁樣對人，一定係錯架啦，當業力具足，惡果自然會成熟，你又何必枉做惡業一場呢。放過人地，即如放過自己呀。」
離開朋友既屋企，個心突然有種撥開雲霧既感覺，一切有為法， 如夢幻泡影， 如露亦如電， 應作如是觀。眼前種種，放下了，其實不外如是，冇咩值得執著。
#玄學 #八字 #術數 #面掌相 #香港兔蘆術數學會 #BB發展
香港兔蘆術數學會
** 博客文章文責自負,不代表本公司立場 **
