四叔帶孫去遊迪士尼

恒基四叔有孫萬事足，上星期四，佢帶住成班孫仔去迪士尼樂園，有市民見到，話四叔個樣笑晒，心情好靚。

四叔有幾多個孫？細仔家誠同億萬新抱子淇生咗三個，大仔家傑亦有三胞胎，加埋可以組隊籃球隊。一班孫，同行者又一大班：孫仔啲媬姆啦，保鏢啦，當然仲有靚新抱子淇啦。

報料市民話，在坐船仔的地方，四叔一馬當先，行在成堆人前面，衣著平民化，恤衫西褲一度。當時樂園遊客唔少，呢度一堆，嗰度一堆，大家就無為意四叔呢一堆。如果唔係同行朋友係個地產經紀，都唔會注意有個地產大富豪出現。

咁有冇同四叔傾幾句？個市民話自己冇，但個經紀friend 立即向四叔大大聲講，「四叔，我都係順德人，你記住請多啲自己鄉里做嘢呀！」 四叔聽咗笑笑口。咁短時間，個經紀都抓緊機會講揾食，四叔身邊啲人聽到，都忍唔住笑出嚟咁話！ 

貝貝

貝貝

** 博客文章文責自負,不代表本公司立場 **

金牌經理人陳淑芬擒日出現，又講香港需要大型表演塲地。其實呢個問題，董伯伯時代已經話要解決，所以搞西九文化區，但從最初構思到最後拍板，規劃圖裡面，都有個大型表演塲地，點解走咗數？

計計西九管理局條數，大家就會明白。發展西九，政府一筆過撥款216億，呢筆錢，建造營運管理保養人工全包，指定要興建17項核心設施，當中15項係表演塲地，兩項係博物館同展覽中心。有萬五個座位嘅大型表演塲地，就放係第一期建造項目名單上。

西九點駛錢法呢？曝光率最高嘅M＋博物館，單係建築費已經要49億，藏品開支以08年估算係12億，剩係呢兩條數，M＋單一設施，就駛成61億，係整筆撥款嘅三成。

呢種駛錢法，唔可以講句建築成本上升就算數。背後流傳嘅故事，係管理局成立冇耐，有人問過一位主事人，大型表演塲係地標，幾時會起，主事人答得好直接，「錢要用嚟起博物館，大型表演塲地，冇錢起。」

點解M＋博物館咁重要，可以駛咁大筆錢？點解西九地標係博物館，唔係大型表演塲地？仲有，點解唔駛睇餸食飯，有幾多錢做齊幾多嘢？揀嚟做嘅標準又係乜？呢個問題，從最政治最基本的角度想，大家諗到乜？

表演場地，西九管理局唔係完全唔做，而係揀嚟做，用25 億起個戲曲中心，兩千幾座位，起到富麗堂煌，用嚟塞住最嘈嘅粵劇界把口，有個台造大戲，利益落袋，各位大老倌即刻唔再閙。至於大型表演塲地，就咁變成廢紙一張。

貝貝