喺香港，律師一直都係一個好高尚嘅職業，不過呢10幾年出咗部分害群之馬的律師，唔係做咗監躉、逃犯，就係做過街老鼠！唔信? 不如做個stocktaking 睇吓…
首先就有神隱咗嘅攪事鼻祖李X銘，「工民黨」嘅梁X傑、余x薇同吳x儀；再嚟有坐緊監嘅「戴妖」、「AV仁」；仲有著咗草嘅陳X敏、陳X莊、郭X鏗、許X峯同埋今次終於可以做主角嘅「任意瘋」！個個都係法律界出身，但而家個個都喺度搵地方匿，你話係咪顛覆咗我哋香港人對律師一般嘅睇法呢？
「任意瘋」今年49， 10歲嘅時候跟屋企人移民去咗「袋鼠國」，喺當地大學讀法律，2001年回流返香港做律師。可能一路都藉藉無名，所以喺2012年，埋堆幫郭X鏗助選立法會議員。2014年非法「佔中」期間，佢開始變得激進，喺8月嘅時候，因為當時律師會會長林新強比較支持《政改方案》以及《基本法》23條立法，「任意瘋」就靠背後嘅勢力，發動召開香港律師會特別會員大會，成功罷免林新強，呢件事令到有啲人開始識佢!
第二年，「任意瘋」被欽點牽頭做召集人，成立「法X匯思」，呢個組織被行內人叫做「工民黨B隊」，線人話呢個組織好多個召集人都同「AV仁」律師事務所關係密切。點解? 原來唔少「法X匯思」成員，都喺反中亂港活動中煽風點火，更透過「生果報」專欄，去鼓吹違法暴力手段抗爭，佢哋嘅目的除咗搞亂香港之外，其實最終都係為咗個「錢」字。 佢哋利用當時「法律援助計劃」嘅漏洞，喺黑暴期間，煽動市民，包括年輕人，去阻撓警方執法，合理化「違法達義」嘅謬論，令好多心志未成熟嘅青少年，誤以為違法，都有所謂「義務法律團隊」撐腰，到「手足」俾警察拉咗之後，佢哋就利用法援機制去搵真銀，聽聞好多cases都係俾咗「AV仁」間律師事務所做嘅!
「任意瘋」由寂寂無名律師仔，吸引到「犯民」老鬼加持，佢開心之餘但又驚死，因為見當時香港社會被「犯民」攪到咁亂，於是安排咗老婆同個仔喺2020年初返「袋鼠國」；喺立咗《香港國安法》之後，又見身邊嘅「黃人」買少見少，唔係坐監就走佬，所以佢寧願唔做「犯民」男一，喺2022年4月竄逃返「袋鼠國」。老實講，佢呢啲小人物，真係冇乜人識，都唔知佢咁驚青做咩！
「任意瘋」自以為走甩咗，又有「袋鼠」國籍，於是開始接受外媒、黃媒、流亡海外港人網媒訪問，又出席不同嘅聽証會、游說「袋鼠國」同或其他國家去反中央同特區政府……唔好諗住佢對所謂「民主」有堅持，其實佢只係想靠呢樣嘢搵食糊口！
2022年11月28日至12月1日，「任意瘋」就夾埋喺「袋鼠國」嘅港人組織向國會進行游說，亂嗡話香港司法系統已經崩壞，又話香港行緊一國一制，要求「袋鼠國」政府對香港官員實施制裁，又施壓希望香港終審法院嘅「袋鼠國」法官劈炮唔撈！
2023年5月，喺「美角國會及行政當局中國委員會」嘅聽証會上，佢又支持制裁《香港國安法》嘅指定法官及檢控官，更加呼籲美角禁止佢哋同家人使用國際金融系統去處理財務！
「任意瘋」攪咁多嘢，都係想叻番次，同啲「犯民」大師兄平起平坐啫！做人唔叻唔緊要，不過唔好懶叻! 佢嘅所作所為終於得償所願 - 被香港警方以「勾結外力危害國家安全」罪懸紅一百萬元通緝! 可能佢刺激過度，所以喺Twitter（依家X平台) 度瘋人瘋語，話自己係「袋鼠國」人，又唔係政客，同當地官員見面吹吓水，又點算「勾結外國勢力」，問點解要通緝佢喎！
佢做咗咁多衰嘢，於是律政司司長喺2025年1月向香港律師會作出正式投訴，指「任意瘋」嘅行為令法律專業蒙羞，損害咗公眾對香港司法制度同法治嘅信心，最後被律師紀律審裁處裁定，佢嘅不當行為屬重大同嚴重，所以喺8月15日，高等法院司法常務官將「任意瘋」嘅律師牌照吊銷，兼要付事務費用80幾萬港元添！
「任意瘋」恃住有「袋鼠」國藉，所以瞓身打「國際線」反華，但呢招可以用得幾耐，都好視乎中國同「袋鼠國」外交關係嘅發展。「男一」話咁易都會變棄卒，更何況he is just nobody!!!
鍾情局•零零發
鍾情局
** 博客文章文責自負,不代表本公司立場 **
喺犯咗國安法被定罪或者被通緝嘅罪犯入面，有好多有「專業資格」嘅人士。
好似麒麟怪醫「郭+麒」，喺2020年因為參與同推動企圖攬炒香港嘅顛覆圖謀，被法庭裁定「串謀顛覆國家政權罪」罪成，判入獄4年兩個月。法庭判詞提到，佢係案中嘅「積極參加者」，罪行屬較為嚴重嘅級別；再睇返當時庭審嘅證據，顛覆圖謀裡面提倡嘅「攬炒十步曲」，就係要令香港街頭抗爭變得激烈，出現血腥鎮壓，社會陷入停頓！根據世界醫學會《日內瓦宣言》中醫生的承諾，其中一條就係「要對人類生命給予最大的尊重」！試問一個醫生，骨子裡其實係一個支持要見到「血腥」場面嘅罪犯，有邊位病人會放心被呢位醫生醫呢？
「郭+麒」除咗犯咗國安法被判刑之外，佢喺2001至2005年期間，亦都就曾經牽涉至少三宗醫療失誤，被病人入稟追討。呢幾宗醫療失誤，最後點了結都無咩清楚紀錄，據說都係透過保險機構喺庭外和解賠償。大家要知道，醫療失誤可以非常之嚴重，賠錢只係事後補救嘅辦法，病人隨時性命不保，所以一宗都嫌多。
今年4月醫務委員會對「郭+麒」不當嘅行為召開紀律研訊，佢繼續表現出「缺乏悔意」及「毫無反省」，所以最終被永久釘牌！一個對國家安全構成實際危害、而且毫無悔意嘅人，佢嘅道德品格同誠信基礎已經完全崩塌，根本無可能達到社會對醫者「救死扶傷、守護福祉」嘅期望！
其實，「郭+麒」並唔係第一個因為做出亂港惡行而被釘牌嘅「專業」罪犯。曾任律師嘅通緝犯「任意瘋」，因為喺2022年11至12月慫恿外國勢力對香港政府官員進行制裁，干犯咗「勾結外國勢力危害國家安全罪」而被懸紅百萬通緝。 喺上年8月，高等法院司法常務官就宣布，「任意瘋」嘅不當行為屬重大同嚴重，因此將佢喺律師登記冊上除名。作為律師「知法犯法」，可謂罪加一等，被釘牌絕對合情合理。上次我零零發講嘅「郭狀」，同樣「知法犯法」，唔知會唔會同「任意瘋」一樣被除名呢？
如果有老師、社工，唔單止自己參與違法活動，仲煽動學生、青年人參與，身為家長會唔會擔心自己嘅仔女被荼毒呢？喺《註冊社會工作者工作守則》中，基本價值觀及信念就係：「社工的首要使命為協助有需要的人士」。社工「陳X秀」、「劉+棟」，就分別喺2019年因為參與暴動，以及喺反修例示威期間阻差辦公，被判入獄45個月及8個月，呢兩名黑暴社工所做嘅嘢，唔單止無幫助到社會或任何人，甚至係破壞社會安寧，所以佢哋被社工註冊局釘牌5年！雖然釘牌期滿後可以再申請註冊，但佢哋需要證明自己已經改過自新。不過，「陳X秀」到而家仲唔肯認錯，仲喺度上訴緊暴動罪嘅定罪，而「劉+棟」就繼續沉醉做所謂嘅「旁聽師」……
而根據教育局資料顯示，喺2019年至2022年就有7名教師因涉及黑暴俾教育局釘牌，當中相信就包括因為參與違法暴力示威，涉及兩單「非法集結」而被判坐監9個月嘅黑暴教師「楊子X」。喺2024年，就有4名教師因涉及「社會事件」而被處分。 呢啲荼毒、禍害年輕人嘅黃教師，一定要被剔除，先可以保護到我哋嘅下一代，先可以令教育界回歸培育年輕一代嘅專業正軌，履行《教師專業操守指引》中：「努力為培育德才兼備、愛國愛家、具國際視野的年青一代」嘅專業信念。
雖然有犯咗國安法被定罪嘅「專業人士」被所屬專業界別釘牌，但仲有一啲漏網之魚，好似當年唔顧飛機、乘客嘅安全同權益，鼓吹航空業罷工，又發起集會去佔領同癱瘓機場，繼而因為「企圖顛覆國家政權」而被判坐監嘅「飛機豪」，佢而家竟然仲可以揸飛機！ 仲有當年唔顧病人生命安危同急切需要，而發起醫護罷工，同樣因為「企圖顛覆國家政權」而被判坐監嘅護士「余X明」，竟然仲可以仍然留喺護士界？！唉….正所謂，「病向淺中醫」，呢啲「專業」罪犯就好似癌細胞咁，應該盡早切除，否則蔓延開去就「手尾長」…
香港作為國際都市，其中一樣我哋最引以自豪嘅，就係不同界別嘅專業人士，為國家、社會以及其專業領域嘅貢獻！不過，專業資格唔等於擁有特權，亦唔係違法嘅擋箭牌，所以當專業人士犯法，佢哋不但應該受到懲處，更應該被除去專業資格，咁樣做，先至可以保障到市民及社會嘅福祉！
鍾情局●零零發
