香港大學專業進修學院與Google Cloud香港今天簽署合作備忘錄，合作以人工智能驅動教與學、課程研發及院校營運等領域的數碼轉型。
香港大學專業進修學院院長李經文(右)，Google Cloud 香港主管 Ricky Kwok(左)。
根據協議內容，雙方將圍繞四大範疇展開合作：
一、引入 Google 頂尖人工智能工具：向教職員及學生推出 Gemini Enterprise for Education 平台，提升教與學效能，建立個人化學習環境。
二、全面推動人工智能教育數碼轉型：將Gemini Enterprise技術整合至學院網上學習管理系統SOUL，實現人工智能輔助教與學；設立Google Cloud AI實驗室，支援學生主導的項目；推出「HKU SPACE x Google AI Prompt Library」，為師生提供人工智能學習資源。
三、課程規劃與研發：合作開發以人工智能為核心的課程，並將人工智能整合至現有課程之中。
四、人才培育及聯合推廣：由 Google 專家主持專業培訓及認證課程，提升學員應用人工智能工具的能力；並在香港大學專業進修學院開放日、Google Cloud Leaders Connect 等旗艦活動中進行推廣，擴大合作影響力。
香港大學專業進修學院院長李經文教授在簽署儀式上致辭：「是次與Google Cloud香港合作，為學院在數碼轉型歷程中豎立了重要的里程碑。我們將借助全球頂尖的人工智能技術，優化教與學成效、精簡營運流程，並透過數據分析提升學院的整體服務質素。」
Google Cloud 香港主管 Ricky Kwok 指出：透過將Google Cloud 先進的人工智能技術融入教與學及課程之中，我們致力培育具備創新思維的人才，助力香港發展成為世界級國際創科樞紐。」
歡迎來到「AI 圍爐區」！每期好奇豆都會揀一件近期最 Hit 嘅科技大事，同大家一齊傾吓科技巨頭背後冇講出口嘅潛台詞。
今期圍爐熱話，唔係邊間公司又出咗新模型，而係一個政府真係出手：美國紐約市宣布，2026-27 學年起，幼稚園到 8 年級一年唔准用生成式 AI，覆蓋約 60 萬名學生，等於全市公校三分之二。呢個係全美規模最大、限制最嚴嘅學生 AI 政策之一。
紐約市長馬姆達尼（Zohran Mamdani）講咗一句好有火嘅話：
「科技行業想讓我們相信，AI 驅動的早期教育不僅是必然趨勢，更是必不可少。但我們不這麼看。」
先睇個禁令有幾狠
| 年級 | 新規定 |
| 2K（2 歲）至 8 年級 | 完全禁止使用生成式 AI |
| 3 – 5 年級 | 個人設備每日上限 30 分鐘 |
| 6 – 8 年級 | 個人設備每日上限 45 分鐘 |
| 9 – 12 年級 | 只可在受訓老師監督下用 5 款指定工具 |
| 所有年級 | 一律禁止「情感陪伴型」聊天機械人 |
留意：呢個唔係「見 AI 就殺」，係「分齡監管」——電子書、編程軟件、殘障學生同英語學習者嘅輔助工具，全部獲豁免。
佢哋點解要禁？因為「掙扎」唔可以外判
教育局總監薩繆爾斯（Kamar Samuels）講得最白：
「沒有任何一個 App、聊天機械人或演算法，能替孩子完成這種有價值的『主動掙扎』。」
翻譯成人話：小朋友真正學識解決問題，係喺「努力諗、答錯、再試、最後搞掂」嗰個過程。你直接跳去答案，就跳過咗最值錢嗰段。
但呢個禁令，有三個位大家冇留意
1. 高中生唔係放生，係換咗個方法困住佢。9 年級以上只可以用 5 款試點工具，而且限時限次——Quill（英文）每週唔超過 15 分鐘、Edia（數學）每週 20 分鐘、Playlab 每學期最多兩份功課。全部最多覆蓋約 5 萬人，即全系統 5%，仲一定要有受訓老師在場。
2. 連「已經買咗」嘅都要拆返出嚟。教育局已開始清學校現有軟件——38 份教育科技合約嘅 AI 功能要禁用或刪走，報道話約 40 款 App 要改，涵蓋數學、閱讀。呢一點對學校採購部門嚟講，係一個好實際嘅警號。
3. 佢哋最想學生帶走嘅一句，唔係「AI 好定唔好」。高中生每年要上兩次 AI 素養課，內容包演算法偏見、倫理、批判思考、AI「幻覺」。而官方最想佢哋記住嘅係——唔好因為答案係 AI 畀嘅，就當佢係啱。
一份六年級功課，點樣引爆 60 萬人嘅政策？
唔係官員忽然想通，係一個媽媽頂唔順。
2025 年 10 月，布魯克林媽媽 Kelly Clancy 發現，讀六年級嘅仔有份科學功課，係要佢先做實驗、再問 Gemini「畀意見」。佢覺得呢份功課根本係叫機器代替小朋友思考，於是成立家長組織、串連約十個團體，要求全市暫停。
今年 3 月，教育局出嘅草案太寬鬆。45 日意見徵集收到超過 6,000 條反饋，一份全面暫停嘅請願書收到近 4,700 個簽名。半年後，政策落地。
呢個 Pattern 值得記住：政策往往唔係由上而下設計出嚟，係被家長一條一條意見逼出嚟。
圍爐反思：紐約最值得抄嘅，唔係個「禁」字
圍爐反思：紐約最值得抄嘅，唔係個「禁」字
- 如果你係家長：唔好只問「做完未」，問「你學到啲咩」。香港冇禁令，嗰條線要自己畫——AI 可以用嚟問「點解」，唔可以幫佢寫答案。
- 如果你係學生：你唔需要等禁令先自律。同一部 AI，問「點解」同「幫我寫」，係兩條完全唔同嘅路。
- 如果你係老師同學校：紐約踩過嘅坑好清楚——要由採購源頭管，唔好等老師用完先自己判斷「呢個 tool 符唔符合規」。連美國自己，至少 37 個州有官方 AI 教育指引，但「AI 素養點教」到今日都仲係冇共識。
今期圍爐講到呢度。紐約選擇咗一刀切禁一年，香港選擇咗擁抱——但無論政策點揀，最後嗰條線，始終係畫喺屋企張書枱上面。你又畫好未呢？
