喺2025年12月被保安局局長根據《維護國家安全條例》列為受禁組織嘅「香港議會」，最近又有啲吊詭嘢！
財務混亂
「香港議會」近日喺佢哋個Facebook，話聯絡咗一個「楓葉角」嘅「同路人藝術家」，對方願意捐出藝術品拍賣，並將籌得嘅款項捐俾「香港議會」。不過，講到款項運作嘅時候，竟然爆出議會嘅銀行戶口處於「無法運作之狀態」! 原來個戶口一直只有「香港議會」組織者何X懋持有，咁而家想喺銀行戶口加埋所謂議長「姜+偉」個名落去，點知搞極都搞唔掂，話要佢哋兩個去相關銀行「作進一步了解及跟進」喎！
一般組織或者公司戶口，都會用聯名戶口，由幾個人互相監察、防止有人中飽私囊。一個自稱代表香港人嘅「議會」，點解個銀行戶口竟然由「阿懋」一個人獨自持有？況且佢而家喺議會連「官職」都冇！ 點解而家先至「急急腳」要加多個名入去？係唔係見到拍賣藝術品有得呃一筆，所以議長「姜+偉」即刻想插隻手入嚟分餅仔，驚「阿懋」獨吞？
仲有，之前「香港議會」嘅所謂組織者梁X恆，話收到一位匿名捐贈者超過100萬加幣（約570萬港元）嘅捐款，咁啲錢咪唔用得？不過係咪真係有人捐，定老作出嚟做勢，呃多啲傻人再落疊捐錢就唔知喇！而今次呢招以拍賣藝術品籌款，連所謂「藝術家」個名都費事講，求其話係「同路人」，會唔會之後都「求其」整幾幅AI畫，然後就再「求其」搞個拍賣會去呃「手足」錢？
「香港議會」呢班人，由頭到尾都係當啲「手足」係水魚，搵盡方法去掠水。早前有位19歲女生藍菲，就係因為幫「香港議會」拍攝宣傳影片，煽動他人參與非法選舉而被拘捕及判囚一年。喺求情時佢提到跟咗前男友「香港議會」成員林X淦潛逃至「楓葉角」生活，然後個名俾佢用嚟借咗好多錢，搞到負債纍纍，所以被唆擺拍攝宣傳影片，犯下重罪。佢及後喺電視台訪問更透露，「香港議會」呢班人求其「食個飯就當開會」，而開會內容就係度下點樣呃人去眾籌同捐款，佢哋當「香港議會」係搖錢樹，仲直接話班友「根本不是他們口中所謂為公義、為理想」!
其實用「香港議會」個名嚟呃錢早就有前科啦，好似所謂創辦人「袁X夷」，喺2021年10月孖住美角前國務卿蓬X奧，攪咗一場反中亂港嘅講座，入場門票成500美元（近4000港元），吸引咗2千人出席，「吸金」達800萬港元！但「袁X夷」從來都無交代過咁大筆錢用咗邊，唔通私吞咗所以唔敢講？
制度荒唐
最近「香港議會」有另一名所謂議員張X燕，喺泰國曼谷因為逾期居留同違反逗留條件，被當地警方拘捕。呢單嘢竟然揭露咗呢個所謂「議會」嘅荒唐制度！話說「張小姐」喺2025年5月參選「香港議會」去做咗議員之後，就被香港特區政府通緝；可能因為知驚，「張小姐」喺6個月後已經正式表明要退出「香港議會」，點知所謂議長「姜+偉」喺YouTube話「議會冇退出機制」，所以「張小姐」仲係「香港議會議員」喎！講真吖，呢個「香港議會」根本就係無號召力，所以唔俾人退會，夾硬壯大聲勢。不過「張小姐」被通緝都係罪有應得嘅，邊個叫佢加入埋晒啲違反國安嘅組織喎！
呢個「香港議會」夾硬將想退會嘅人繼續綁住唔放手，咁做法，同黑社會有咩分別？佢哋擺到明就係要儲夠「議員」人頭，繼續呃金主、呃支持者。 所謂嘅「香港議會」一共有9個組織者，10個當選議員，呢班竄逃海外嘅亂港分子分佈喺最少7 個國家，如果人人都用「香港議會」嘅身份、議題嚟叫「手足」捐錢，其實都幾和味㗎！所以我零零發睇吓佢哋幾時會出招，以「營救張小姐」呢單嘢嚟籌款先！
信呢班「香港議會」大老千嘅花言巧語，買佢哋啲藝術品或者捐錢，唔單止係將啲錢倒落鹹水海，仲會因為資助「受禁組織」同埋違反《維護國家安全條例》而惹禍上身被捕！「手足」們，唔好再做「水魚」喇！
鍾情局•零零發
鍾情局
** 博客文章文責自負,不代表本公司立場 **
喺香港，律師一直都係一個好高尚嘅職業，不過呢10幾年出咗部分害群之馬的律師，唔係做咗監躉、逃犯，就係做過街老鼠！唔信? 不如做個stocktaking 睇吓…
首先就有神隱咗嘅攪事鼻祖李X銘，「工民黨」嘅梁X傑、余x薇同吳x儀；再嚟有坐緊監嘅「戴妖」、「AV仁」；仲有著咗草嘅陳X敏、陳X莊、郭X鏗、許X峯同埋今次終於可以做主角嘅「任意瘋」！個個都係法律界出身，但而家個個都喺度搵地方匿，你話係咪顛覆咗我哋香港人對律師一般嘅睇法呢？
「任意瘋」今年49， 10歲嘅時候跟屋企人移民去咗「袋鼠國」，喺當地大學讀法律，2001年回流返香港做律師。可能一路都藉藉無名，所以喺2012年，埋堆幫郭X鏗助選立法會議員。2014年非法「佔中」期間，佢開始變得激進，喺8月嘅時候，因為當時律師會會長林新強比較支持《政改方案》以及《基本法》23條立法，「任意瘋」就靠背後嘅勢力，發動召開香港律師會特別會員大會，成功罷免林新強，呢件事令到有啲人開始識佢!
第二年，「任意瘋」被欽點牽頭做召集人，成立「法X匯思」，呢個組織被行內人叫做「工民黨B隊」，線人話呢個組織好多個召集人都同「AV仁」律師事務所關係密切。點解? 原來唔少「法X匯思」成員，都喺反中亂港活動中煽風點火，更透過「生果報」專欄，去鼓吹違法暴力手段抗爭，佢哋嘅目的除咗搞亂香港之外，其實最終都係為咗個「錢」字。 佢哋利用當時「法律援助計劃」嘅漏洞，喺黑暴期間，煽動市民，包括年輕人，去阻撓警方執法，合理化「違法達義」嘅謬論，令好多心志未成熟嘅青少年，誤以為違法，都有所謂「義務法律團隊」撐腰，到「手足」俾警察拉咗之後，佢哋就利用法援機制去搵真銀，聽聞好多cases都係俾咗「AV仁」間律師事務所做嘅!
「任意瘋」由寂寂無名律師仔，吸引到「犯民」老鬼加持，佢開心之餘但又驚死，因為見當時香港社會被「犯民」攪到咁亂，於是安排咗老婆同個仔喺2020年初返「袋鼠國」；喺立咗《香港國安法》之後，又見身邊嘅「黃人」買少見少，唔係坐監就走佬，所以佢寧願唔做「犯民」男一，喺2022年4月竄逃返「袋鼠國」。老實講，佢呢啲小人物，真係冇乜人識，都唔知佢咁驚青做咩！
「任意瘋」自以為走甩咗，又有「袋鼠」國籍，於是開始接受外媒、黃媒、流亡海外港人網媒訪問，又出席不同嘅聽証會、游說「袋鼠國」同或其他國家去反中央同特區政府……唔好諗住佢對所謂「民主」有堅持，其實佢只係想靠呢樣嘢搵食糊口！
2022年11月28日至12月1日，「任意瘋」就夾埋喺「袋鼠國」嘅港人組織向國會進行游說，亂嗡話香港司法系統已經崩壞，又話香港行緊一國一制，要求「袋鼠國」政府對香港官員實施制裁，又施壓希望香港終審法院嘅「袋鼠國」法官劈炮唔撈！
2023年5月，喺「美角國會及行政當局中國委員會」嘅聽証會上，佢又支持制裁《香港國安法》嘅指定法官及檢控官，更加呼籲美角禁止佢哋同家人使用國際金融系統去處理財務！
「任意瘋」攪咁多嘢，都係想叻番次，同啲「犯民」大師兄平起平坐啫！做人唔叻唔緊要，不過唔好懶叻! 佢嘅所作所為終於得償所願 - 被香港警方以「勾結外力危害國家安全」罪懸紅一百萬元通緝! 可能佢刺激過度，所以喺Twitter（依家X平台) 度瘋人瘋語，話自己係「袋鼠國」人，又唔係政客，同當地官員見面吹吓水，又點算「勾結外國勢力」，問點解要通緝佢喎！
佢做咗咁多衰嘢，於是律政司司長喺2025年1月向香港律師會作出正式投訴，指「任意瘋」嘅行為令法律專業蒙羞，損害咗公眾對香港司法制度同法治嘅信心，最後被律師紀律審裁處裁定，佢嘅不當行為屬重大同嚴重，所以喺8月15日，高等法院司法常務官將「任意瘋」嘅律師牌照吊銷，兼要付事務費用80幾萬港元添！
「任意瘋」恃住有「袋鼠」國藉，所以瞓身打「國際線」反華，但呢招可以用得幾耐，都好視乎中國同「袋鼠國」外交關係嘅發展。「男一」話咁易都會變棄卒，更何況he is just nobody!!!
鍾情局•零零發
