連鎖西餐廳「五成熟」牛扒呈嫩粉似未煎 網笑：直接拖隻牛俾你食！

民以食為天，外出用膳只求一頓美食，但若食物與期望有落差，難免令人失望。日前，有網民到連鎖西餐廳用膳，點了一份五成熟牛扒，豈料上桌時驚見整塊牛扒呈現鮮嫩粉紅色，猶如未經煎烤便直接上碟，隨即引來大批網民搞笑留言。

有網民點了一份五成熟牛扒，豈料上桌時驚見整塊牛扒呈現鮮嫩粉紅色，似未煎就直接上碟。網上圖片

店員曾提醒「會有粉紅色」 樓主照嗌仍「頂唔順」

據樓主描述，點餐時店員曾主動建議：「會有粉紅色，使唔使幫你兩邊煎一煎佢？」樓主當時回應「唔使」，卻沒料到粉紅色的程度如此誇張，最終令他「真係頂唔順，叫佢翻煎一下」。事件引來其他曾光顧同店的網民分享照片，有人表示「呢款牛扒不嬲都係咁㗎喎」，但隨即有網民反駁：「你呢張相望落正常喎，樓主嗰張望落真係好似未煮過咁。」

樓主表示，點餐時店員曾主動提示會有粉紅色，問要不要煎一煎它。網上圖片

網民爆笑留言：石器時代廚師？

這塊粉嫩牛扒迅速成為網絡熱話，大部分網民都認為端上桌的牛扒「生得滯」、「唔似五成熟」，更有人幽默留言：「佢明明可以直接拖隻牛出嚟俾你食，佢都偏偏切埋先俾你，算係咁啦」、「呢塊扒一係生，一係熟，咁咪五成囉」、「可能廚師們來自石器時代」。

有網民為餐廳平反。網上圖片

有食客解畫：慢煮五成熟就係咁樣

不過，亦有網民為餐廳平反，解釋照片中的牛扒其實完全正常：「其實呢，呢舊係roast beef，肉既中心溫度係57度，一間咁大型既餐廳佢做左好多sop溫度一定準架啦，舊肉本身係嫩係滑，只係外圍冇燒返色姐。」更有人直言：「慢煮五成就係咁樣。」

有網民為餐廳平反。網上圖片

下個月21日就係父親節，連鎖餅店美心今年推出兩款創意造型蛋糕，點知蛋糕相片一出，即時喺網上掀起熱烈討論，網民反應兩極，有人直指造型似足「祭品」，亦有人大讚夠晒創意。

threads圖片

有網民日前喺社交平台分享喺門市影到嘅蛋糕相，配文寫道：「豆腐火腩飯蛋糕好似上香做忌咁，好地獄」。從相片所見，兩款蛋糕分別係「豆腐火腩飯蛋糕」同「出前一丁餐蛋麵蛋糕」，全部以碗裝造型呈現。其中「出前一丁餐蛋麵蛋糕」直接用上經典紅色出前一丁包裝設計，頂部用奶油擠出密密麻麻嘅「公仔麵條」，再鋪上兩隻荷包蛋同一塊厚切午餐肉造型甜點；而「豆腐火腩飯蛋糕」則喺表面鋪滿模擬米飯嘅脆米，上方堆疊着像真度極高嘅「火腩肉塊」、「豆腐」同綠色蔬菜做點綴，賣相相當逼真。

threads圖片

帖文一出即引來大批網民留言，意見兩極。部分網民對蛋糕造型大感不解，紛紛留言狂轟：「好似祭品」、「真係唔知邊個approved」、「係咪同紙紮舖搞cross over」、「好核突，買唔落」，反應相當負面。

threads圖片

不過，另一邊廂亦有大批網民力撐產品夠晒新意，留言反擊：「又幾有創意喎，多個選擇啫。香港人真係厭尖聲悶，永遠只有彈，唔會讚」、「算係整得幾靚」、「其實好有創意」、「好有創意喎，邊度似啊？幾有諗頭呀，欣賞下得唔得，成日食嚟食去都係嗰啲懶靚嘅蛋糕，呢啲男人鍾意喎」。更有網民表示「好特別，想試晒兩款」、「坊間都好多呢啲造型蛋糕，以呢個價錢算係好抵」，甚至有人搞笑問：「有冇沙嗲牛肉麵？我老公鍾意食呢個」，令討論區瞬間變成「創意蛋糕點評大會」。