人仔12月見短底

上期講到有外資證券行高層話，恐怕明年1月會重演今年1月嘅情況，因為人仔大跌，令到港股急跌，叫佢哋嘅客戶小心。

我後來見到中資證券行嘅高層，佢哋的睇法並非如此，話如果不論炒作因素，單論人民幣的走勢，可能到本月中美國聯儲局加息之後，美元的升勢有機會放緩，人民幣短期之內會見個小底。

佢話去年第四季美元上升，人仔初時並無跟隨下跌，累積下來的貶值壓力到今今年頭，先至釋放出來，今年1月急促下跌，亦都影響到港股急跌。不過今次人民幣緊跟美元上升而下跌，在特朗普當選之後，美元指數升咗6%，而人民幣相對地跌咗4%，因為人仔同一籃子貨幣掛勾，不單與美元掛勾，這個跌幅基本上反映咗美元同期嘅升幅。

中資行高層估計人仔緊跟美元下跌的原因，第一係吸收左去年滯後下跌帶來的教訓。第二係明知道特朗普上台將會針對人民幣匯價，所以超前下跌，俾自己有個迴旋空間。

特朗普宣布委任前高盛人姆欽做財政部長，姆欽揚言明年1月上任100日內，會將中國列為匯率操縱國，指控人民幣過度貶值，對美國貿易不利。如果特朗普上台同中國有好多貿易磨擦，中國都要對特朗普讓下步，入市干預，支持一下人仔匯價，所以人仔要在特朗普上台之前超前下跌，藉此支持一下外貿，等特朗普上台之後，人仔下跌空間將會收窄。

美元兌人民幣一年圖

中資證券行高層對人仔匯價的分析，有佢嘅道理，人仔嘅短期下跌浪可能起12結束，等明年初特朗普上台之後，甚至輕微反彈回升，但要注意兩點，第一，如果睇中線，人仔明年還有下跌空間，高盛睇明年年底1美元兑人仔會見7.3 ，若成真距離依家仲有6%嘅跌幅。

第二外資行睇淡，佢地會否做淡呢？要小心。

要買股走中短線嘅朋友，可以等意大利公投前後股市進一步下跌嘅時候，候低吸納，不過明年市場在美元上升嘅大環境下風高浪急，炒股要睇路。

陸羽仁

** 博客文章文責自負,不代表本公司立場 **

最近有個有錢朋友聽外資大行的銀行家講起，叫佢買嘢唔好咁勇，小心12月美國加息後，明年1月還有一次下跌。

朋友問我點睇，我話並不出奇，去年也是12月聯儲局首次加息，初時本地市場好似無嘢，到今年1月新曆年一到，人民幣急跌，連帶港元也跌穿7.8水平，顯示外資流出香港，股市，樓市都跌，不知明年初會否重演這一幕。

其實關鍵是美元急升，亞洲貨幣大跌，市場風險累積，若美元再急上，也不一定等到1月，投資市場已經要受靶。

有錢朋友咁問，其實他想買貨，見股市跌後反彈，心思思想追入，怕錯過了機會。我話你大把錢防守力強，買股又買大股，輸少少死唔到人，但錢不多得一注的朋友，就唔好咁輕舉妄動。

建議要注意的事項有二:第一，要買唔駛一注買晒，在下跌中的市況，向下分注係買到平貨的主要策略。第二，唔好去盡，原來想買10元，買住5元先，其餘睇定先買，主要睇美息和美元走向，即使太保守買得唔夠，個市又升番上去，都係賺少咗，唔係輸多咗。呢啲市要預自己睇錯，特別係入市太快，買完會再跌，要有心理承受力至好買。