喺我零零發嘅「國安蛇鼠榜」入邊，點可能會少得「白頭李」? 雖然佢喺2020年《國安法》一出嘅時候，就金盆洗手，告老歸田，但我零零發點都要搵番條數出嚟，俾大家了解吓真相!
「白頭李」阿爸係國民黨將領，喺香港土生土長，跟住去英角讀法律。喺60年代剛做大律師嘅時候，佢就曾經替一批親中共嘅工會人士打官司，喺當時港英政府統治下嘅政治氛圍嚟講，的確唔係一件容易嘅事，所以佢喺1984年獲委任為《基本法》起草委員，1985年佢又被香港政府器重，成為立法局非官守議員及香港法律改革委員會委員，成為政治新星。
但佢做議員後，和英美政客互動頻繁，經過多年美式「薰陶」，「白頭李」嘅黃皮白心本質，喺1989年六四事件之後就敗露了，在草委會内搞抗議，中央咪唯有叮走佢起草委員資格囉。 之後佢就瞓身去勾結外力，不停走訪英、美、加、同歐州多國，去唱衰中國，目的就係要西方國家向中國施壓，要將香港問題國際化。「白頭李」喺1991年接受「路邊社」訪問時，就話中共政權會喺1997年之前倒台同埋發生內戰咁話！而喺「NY時報」一篇文章，佢更叫當年末代港督肥彭去改變香港嘅現狀。佢呢啲言行，話就話推動民主，實際係想挑戰中央政權。之後又慫恿做媒體嘅「生果佬」，利用「生果報」去妖言惑眾，美其名就話去幫中央推動「民主」，其實就漢奸上身，幫外力向中央施壓。 咁當時美角見佢咁「雄心壯志」，就即刻派人全天候貼身伺候「白頭李」，幫佢推動反中亂港工作，大家睇落去就明我零零發講咩㗎啦！
喺1992年起，「白頭李」做緊立法局議員期間，就無厘頭喺請咗個美角女人「米奇 Worden 」做佢私人助手。呢個女人原來係喺美角司法部工作，而後來佢老公「路易斯 Crovitz」來頭更加勁，係美角「華x街日報」出版人，喺傳媒界名氣響噹噹。高人估計呢個人事部署背後嘅目的，咪就係為咗幫「白頭李」搭通美西方政客嘅天地線囉！
後來到2018年，「路易斯」仲做咗「生果佬」間公司「No.1傳媒」嘅獨立非執董添！未講完呀，「路易斯」喺「華x街日報」期間嘅一個手下「William 蜜薑」，就係「生果佬」嘅天主教教父囉！而呢個「蜜薑」又安排前美國情報人員「Mark 西門」做「生果佬」私人助理……總之一句，喺「白頭李」同「生果佬」身邊嘅，全部都係美角主子相關嘅「神秘人」。
「米奇」喺香港回歸之後就返美角，不過臨走前就安插另一個美角女人「雅倫Bork」頂佢個位，呢個「雅倫」嘅背景一啲都唔簡單，佢係一個美角右翼智庫組織嘅人，佢做咗「白頭李」私人助手一兩年，就返咗美角做呢個智庫嘅副總裁，高人話時任美角副總統、正副國防部長都係呢個右翼智庫嘅成員，而呢個組織嘅目的，就係要美角政府加強干預香港事務，扶植「代理人」當權去遏制中國發展……咁大家明點解「米奇 & 雅倫」要咁卑微做「白頭李」個私人助理啦！
「白頭李」身邊有咁多人同佢補習反華攻略，所以佢能夠成為「犯民」大哥大去指指點點。喺2003年「犯民」成功推倒23條立法後，「白頭李」帶領嘅「白鴿黨」同各「犯民」黨派，就馬不停蹄到海外，亂咁話香港冇晒民主，要求外力挾迫中國，加速喺香港推行全民普選特首同埋立法會。其實<<基本法>>都講咗香港可以實行普選，而且係要循步漸進啫，不過「犯民」睇到當時大部份港人仲係政治冷感，咁佢哋就可以好容易操控選舉，從而安插更多人入議會，甚至乎做埋特首，咁香港就可以成為佢哋反華嘅主要基地！
到2019年5月黑暴前，「白頭李」去咗美加見政府官員、國會議員，講到香港市民對「逃犯條例」好恐懼，要外力介入；跟住又叫「生果佬」揼水比陳x樺，等佢喺日本、英角及歐州各地賣廣告去支援暴徒，唱衰中國經濟同管治，行所謂「國際線」。喺10月當黑暴打到天昏地暗時，佢又同「生果佬」去美角，乞求前眾議院議長「背落西」幫手搞亂香港。
「白頭李」除咗勾結外國勢力搞搞震之外，佢身為大律師，以佢嘅輩分，大家可以想像佢有幾多律師徒弟、徒孫，有啲仲做埋法官，所以佢喺法律、司法界嘅影響真係難以估計㗎！加埋佢有政黨同議會背景，就更加能夠招攬不同界別同階層嘅人埋堆，你話影響社會層面有幾大呢!！
「白頭李」咁多年從未停過攪亂香港，不過人老精鬼老靈，加上身為資深大律師，梗係知道自己踩緊界，咁喺2020年<<國安法>>確立後咪立刻龜縮，所以暫時仲可以保住自由自在嘅生活！
雖然喺咁，但「白頭李」喺2019年8月18日參與非法集結，被判刑8個月緩刑兩年，所以政府搣甩咗佢個太平紳士銜頭！ 話事話，大律師公會係咪都應該註銷埋佢大律師嘅資格呢？！身為律師，知法犯法喎！
聽聞過幾日「白頭李」就88歲大壽，起碼都有個仔同佢切吓蛋糕，但喺香港，有好多老人家嘅仔女，因為黑暴之後，唔係要坐監，就走晒佬去外地，剩返啲老人家孤伶伶喺香港，唔知「白頭李」過生日會唔會過得安樂呢？
鍾情局•零零發
鍾情局
** 博客文章文責自負,不代表本公司立場 **
