銀行大老闆買車都要慳油錢 混動車有賣點 日產推新旗艦Elgrand e-Power還擊市場

香港電動私家車「一換一」稅務寬減優惠計劃今年3月底終止，大批電動車準買家趕搭優惠尾班車，搞到各大車行3月底做到手軟，米妮好多車行朋友笑言，第一季嘅電動車銷售訂單，已經可以頂到半年生意。

粗略估計，今年1月至5月本港私家車新登記數量已達35,000輛，當中起碼8成係電動車。根據最近數字顯示，5月份本港私家車新車首次登記中，排行10大品牌當中，特斯拉(Tesla)重上第1位，5月份登記數量1,392部，但10大榜中國品牌佔了7個，比亞迪（BYD)第2位登記數量806部、騰勢（Denza)第3位登記數量649部。反觀日本及歐洲車戰況較為慘烈，只有豐田（Toyota)和smart上榜排第6，賣咗149部。

電動車「一換一」終止，價格優勢無咁大，行內人估計混合動力車的賣點會增強。由政策變化帶來危機也帶來機會，佢預計下半年大家都出盡力做marketing，去搶新市場。

雖然過去一年本港車市被中國車品牌雄霸，但日本車並無坐以待斃，趁港府煞停「一換一」稅務寬減優惠，實行引入頂級豪華旗艦車反擊，因為在稅務寬減期間，本港暢銷電動車多集中在20萬至30萬元低中檔次車款，撤銷優惠後，這批車售價調升至40多萬元。現在想用40萬至50萬元預算買車的準買家，相信不甘入手買之前20多萬元價位檔次的車，寧可加碼升級買部高檔次靚車。

日產Elgrand在1997年推出，開拓了豪華MPV市場，發展至今全新版本Elgrand e-Power搭載日產第三代e-Power系統、升級版e-4orce電子四輪驅動系統及IDS(Intelligent Dynamic Suspension)，三項科技集於一身，大大提升操控表現及行駛穩定性。

米妮認為，本港汽車代理看準這個市場變化，定必引入更多元化高檔新車款，不會只側重售賣低中檔純電動車，旗艦級油電混合車將成打開市場的新勢力。就以日產(Nissan)為例，香港代理合誠汽車周五（6月11日)至6月21日喺尖沙咀圓方商場，舉行Nissan Elgrand e-Power大型預覽會，呢款配備1.5 Turbo引擎及雙馬達e-4orce四驅嘅2027年款Elgrand e-Power油電混合豪華七人MPV，可做到平均18km/L低油耗量，連稅意向價在88萬元以下。此車目標對手係車價接近120萬元嘅豐田Alphard 2.5 油電混合HEV。香港係日產Elgrand e-Power全球首個海外銷售市場，新車在日本仍未開售，估計首批香港版新車今年12月抵港交車。

Elgrand e-Power 新車預覽至6月21日。

米妮近日同一個本地銀行老闆食飯，佢過去坐開豐田Alphard，但舊年都換咗內地豪華七人車，佢話車價平仲係小事，用電車唔使入貴油，佢公司原本有10 部Alphard，換車真係慳錢好多。而且佢有司機開車，唔怕充電麻煩，所以轉晒電動車。

油價貴的確係痛點，連大老闆都話要慳。日產呢部Elgrand e-Power有賣點，部車雖然只係入油，但係100%純電驅動，車上的汽油引擎不直接驅動車輪，它的唯一作用是帶動發電機發電，產生的電能會直接供給驅動馬達，同時也為車內，的小容量鋰電池充電。車輪始終由電動馬達驅動，因此它能提供同純電車一樣安靜、平順且加速迅猛的駕駛體驗。

Elgrand e-Power版本由於是電驅，相較於現款2.5L汽油版Elgrand約10 km/L的油耗，e-Power版本的18 km/L的油耗，大幅降低45%，堪稱跨越式進步。佢以慳油做賣點，比傳統油車有好大競爭力。

米妮

Brand起來！

** 博客文章文責自負,不代表本公司立場 **

京東去年收購咗佳寶超市之後不斷擴充，香港門市突破100間。今日（6月11日）推出「全場貨品8折」優惠，引起網民熱烈關注討論，有網民質疑佳寶抬高價格再打折。

Marketing 係米妮老本行，加埋過江龍對地頭蟲的商戰元素，更加吸晴，自然要親身去佳寶視察，一探究竟。

剛好路過將軍澳廣場，就專門去佳寶，只見人頭湧湧，某些貨架空蕩蕩，好似打風前掃貨嘅現象，睇嚟佳寶呢招「全場8折」得喎。

但有貌似格價專家嘅街坊同米妮講：「呢隻金象牌8公斤泰國米，未做8折之前賣緊80幾蚊一包，而家賣$92.8，仲貴過未減價之前喎，都係去其他超市睇吓先落手啦。」

聽見街坊咁講，我又睇吓其他貨品。例如3枝裝刀嘜花生油（1000毫升）佳寶原價$115，8折後係$92；對比其他超市，同為3枝裝（900毫升，少100毫升）賣$88.8。佳寶3枝8折後換成900毫升計係$82.8 ，少少哋$6。又再睇睇李錦記舊裝特級蠔油，佳寶賣$39一枝，8折咗$31.2，喺其他超市見到，李錦記舊裝特級蠔油2枝加1枝新裝蠔油嘅3枝優惠裝賣$75 ，即係優惠裝平均每枝$25 ，佳寶賣這款蠔油8折後並不算便宜。總的來說，今次佳寶8折貨品仍然有平有貴，平的也不是真係比人哋有8折咁多，講「全場貨品8折」似數字遊戲多啲。看來京東未打真軍，暫時停留在marketing階段，如果京東將來真係要打減價戰，大幅殺價，就另當別論！

雖然減價戰暫時仍處於前哨戰階段，但兩大超市百佳和惠康一啲都唔執輸，已出手反擊。好似百佳超市最新推出6月限定大派$20現金券優惠，實行頂一頂先。

內地去年出現外賣減價大戰，京東都係主要玩家之一，唔知會唔會喺香港出手。本港超市減價戰一觸即發，若然開打，最大得益者當然係市民大眾。米妮當然更加關心幾大玩家嘅marketing策略，觀摩一吓有乜推廣高招。

米妮