香江「車壇大茶飯」：2026香港車博會，邊部新車最值得你「睇熱鬧」？

平時想在港一次過睇勻咁多國產靚車，其實唔容易，趁2026香港車博會今日（6月18日）至6月22日喺亞洲國際博覽館（5、7、9館）舉行，就等米妮帶大家現場直擊！今次車博會，直情係將成個「內地車壇」搬過

嚟，仲要全部係右軚版，擺明車馬想「入侵」各位香港車迷個銀包。而家就逐個品牌同你講吓有咩「睇頭」：

1. 紅旗（Hall 5 R01）——「大佬出巡，氣勢行先」

紅旗E-HS9旗艦級電動SUV

紅旗今次唔係嚟玩，係嚟「晒冷」。E‑HS9 呢部旗艦級電動SUV，右軚版終於嚟到香港上市，成部車大大份、豪華到爆，似足「移動皇宮」。仲有部 E‑HS5 高性能純電SUV，開賣預售。不過最引人注目，一定係佢哋嗰部 全新Global SUV 全球首發！想有氣勢、揸住似領導人出巡，睇紅旗實冇錯。

2. 吉利 / 極氪（Hall 5 R02）——「搞邊科？又簽約又出旗艦」

極氪9X香港意向價120萬元。

吉利今次直情將成個「朋友圈」搬過嚟。極氪009光輝 同9X兩部旗艦，擺明車馬話你知「豪華，我有份」，古天樂係009車主，今日發佈會現身展館分享用車心得。但最有趣嘅係，佢哋仲搞咗好多簽約儀式，同抖音集團、八達通、文遠知行呢啲單位合作，講到明想喺香港搞 Robotaxi（自動駕駛的士）。佢唔只賣車，直頭想改寫你將來點樣「叫車」！

3. 廣汽（Hall 5 R04）——「Action 2.0 + E9 新款，玩混動」

廣汽E9插電混能MPV。

廣汽今次帶嚟 E9 插電混動 MPV，香港正式公佈售價。

呢部車賣點係「豪華座艙 + 先進混動技術」，擺到明想食晒香港啲家庭客同埋商務客。想又慳油又坐得舒服，仲要成架「移動客廳」咁，呢部啱你。

4. 東風（Hall 9 R05）——「風起香江，同華為合作玩智能」

東風X8科技有驚喜。

東風今次主題好有詩意，但實際係「科技控」至愛。佢哋同華為合作，將智能駕駛技術擺晒出嚟。新車突境 X9 同嵐圖泰山 X8搞分享會，主打「前沿智能」。鍾意科技嘢、想架車識得同你「溝通」，東風有驚喜。

5. 上汽（Hall 7 R12）——「MG 新車 + 展場優惠，最貼地」

MG4 Urban由戴祖儀助興出場，車展驚喜價$199,000。

上汽就最實際，直接帶 MG4 Urban 同 MG S9 PHEV 嚟香港，仲要推出展會專屬購車優惠，開放靜態體驗。想實際啲、諗住睇啱就扑槌，上汽呢個位最啱你行。MG Urban新車發佈會更找來藝人歌手戴祖儀表演撐場。

6. 奇瑞（Hall 9 R07）——「智能駕駛大晒冷」

奇瑞主打New Era New Heights 。

奇瑞主打「NEW ERA NEW HEIGHTS」，重點係昆侖智駕 ADS 4.0、896 線激光雷達、±7° 後輪轉向呢啲技術名詞。如果你係技術控，鍾意研究架車點樣「自己識行」，奇瑞個 booth 你一定要企多陣。

7. 零跑（Hall 9 R08）——「一灣香江零跑世界，年輕有活力」

零跑今次好有「香港味」，主題叫 「一灣香江零跑世界」。佢哋帶嚟 運動轎跑靜態首秀，仲分享品牌全球化佈局。零跑風格一向年輕、跑格，啱晒後生仔女或者想架車有啲「運動 Feel」嘅車主。

8. 賽力斯（Hall 9）——「右舵版全球首發，玩新品牌形象」

賽力斯直接喺香港搞 DFSK 品牌煥新戰略，仲帶嚟 E5 PLUS 右舵版全球首發，主打綠色智慧出行。想睇吓一個品牌點樣「改頭換面」重新出發，賽力斯呢個位有故事睇。

9. 百度 Apollo（Hall 9）——「真．自動駕駛，香港路試有結果」

百度展台人員樂意為參歡者解答各類問題。

百度唔係賣車，係賣 「自動駕駛技術」。佢哋展出 RT6 Robotaxi 實車，仲會分享 香港右舵自動駕駛路測成果，講吓人工智能點樣融入汽車產業。想知將來會唔會冇司機、全部車自己行？百度個 booth 係你嘅「未來教室」。

米妮發現仲有彩蛋位！唔止睇車，仲有「智能機器人」同「金融服務」，除咗各大車廠，場內仲有北京中關村科技、深圳小象電動科技、深圳行為智能機器人，甚至 中國人保（香港） 呢類金融服務商。成個汽車生態圈，由造車、賣車、到保險、甚至機械人，一次過睇晒！

一句到尾，今次車博會，唔止係「車展」，直情係 「中國汽車界集體進軍香港」嘅宣言書。你就算唔買車，都值得入場望吓，因為你望緊嘅，可能就係未來幾年香港街道上嘅「日常風景」！

米妮

Brand起來！

** 博客文章文責自負,不代表本公司立場 **

保時捷香港代理終於打開天窗，不對，是打開充電蓋，公佈全新Cayenne Electric車系售價，入門版定價$1,398,000起，Turbo版$2,568,000起，這個數字一出，米妮默默把「考慮買車」的念頭湧出來，這是廠方繼Taycan、Macan Electric之後的第三款純電車型，採用與Macan Electric相同的進化版PPE 800V電驅平台。

香港保時捷中心總經理顏鎮濤(Patrick)表示，Cayenne Electric 未正式在港上市，已接獲大量訂單。

從數字層面去看，Cayenne Electric的規格屬於「嚇死人嗰隻」。入門版輸出442匹馬力及835Nm扭力，0至100km/h加速4.8秒，續航642km；Turbo版則誇張到1,156匹，0至100km/h只需2.5秒，續航623km。2.5秒是什麼概念？就是你踩下油門，唔好意思，應是「電門」之後，視線要重新對焦。全線搭載113kWh鋰電池，支援390kW DC快充，官方稱16分鐘可從10%充到80%。車身風阻系數Cd 0.25，Turbo版車尾還藏了一塊可伸縮的Aeroblades導流翼片。香港保時捷中心很有信心Cayenne Electric可以在香港嘅SUV 市場佔一席位，其多配置優勢，貼合香港市場。

米妮看到，雖然「一換一」稅務優惠結束咗，但電動車仍然是市場嘅主流，某些燃油車嘅需求反彈，特別是那些具有娛樂、趣味，甚至有收藏價值的汽車。這樣看來，保時捷今年 4 月開始推出嘅911 GT3 Sport ，這款車配置非常特別，它是 GT3 首次開展的配置，所以一推出就已經是一個 Future Classic，保時捷有不少忠實客戶很快就落單。

香港保時捷中心正展示911 Targa GTS 70週年紀念版，全球獨一無二。

香港保時捷現正積極與總廠聽取意見，希望能爭取更多配額，以應對香港市場需求。其實呢類Porsche Exclusive Manufaktur項目是汽車改裝嘅佼佼者。今天（6月17日）Cayenne Electric 在港正式登場，香港保時捷中心也特別展示911 Targa GTS 嘅70 週年紀念版。它承載著兩個致敬的含義，一個是幾年前 Targa 這款車推出的週年時光，另一個是保時捷與這款車合作 70 週年的合作項目。所以這部車是全球限量，當中其實有很多細節。包括車身顏色，是獨一無二特意調校出來的顏色。追求高品質嘅收藏家，定必鍾情獨一無二嘅保時捷。

香港保時捷中心總經理顏鎮濤（Patrick)表示，保時捷賣嘅係「技術碾壓」加「品牌護城河」。Cayenne Electric首配12.9吋弧形曲面OLED Flow Display螢幕，天幕式玻璃頂內置Variable Light Control液晶體可變透光功能，簡單講，就係塊天窗可以自動變暗，不用你伸手拉簾。無線充電（11kW）成為標準配置，車主將車泊喺感應地板上面就可以自動充電。後軸轉向、Porsche Active Ride主動懸掛等高階配置。保時捷想傳達的訊息很清晰：這不只是一輛電車，這是一輛保時捷。

保時捷的策略是「三條腿走路」。廠方宣布，現時Cayenne車系提供純汽油、混能及純電三種動力選擇直至2030年。這是一種保守的激進：既唔完全擁抱電動化以避開與中國品牌的正面對撼，又透過頂級技術規格守住「豪華電動SUV最後堡壘」的姿態。Coupé版本的推出進一步細分市場，車身高度降低24mm，標配Sport Chrono計時套件及PSAM空氣懸掛，後排改為兩個獨立座椅。換句話說，這是一部「我載人但唔想載太多人」的車，專攻追求個性而非實用的買家。路線更窄，但更深。

米妮認為，Cayenne Electric的定價係「技術溢價」而非「成本加成」。Turbo版2.5秒破百，目前香港市場冇對手。中國電車在20萬至60萬港元區間已建立壓倒性優勢，但100萬港元以上的超豪華電車領域，品牌忠誠度仍然是保時捷最厚嘅城牆。2026年3月底「一換一」稅務寬減政策結束後，豪華電車實際購置成本上升，但Cayenne Electric的客群對價格敏感度較低，政策退坡影響有限。

米妮