星塵55｜「華星三寶」原來係同「車」密友？陳奕迅楊千嬅梁漢文由跳鳳陽花鼓講到拍《大激想》

「華星唱片」成立55周年，為香港樂壇孕育不少歌神天后，要數90年代的代表作，一定是梁漢文、陳奕迅和楊千嬅的「華星三寶」。他們在「星塵55」節目分享當年同車趣事，回味在「華星」大家庭成長的點滴，三人碰頭即雞啄唔斷，現場充滿笑聲。

「華星三寶」梁漢文、楊千嬅和陳奕迅在「星塵55」節目分享「華星」歲月。

觀看相關影片按連結：https://youtu.be/R7L1V7acSho

梁漢文（Edmond）於 1989年參加「第8屆新秀歌唱大賽」後出道，而陳奕迅（Eason）是1995年「第14屆新秀歌唱大賽」冠軍，與同屆的三強楊千嬅加入「華星唱片」。雖然相隔五屆，但他們年紀相約，加上90年代都是他們事業上升期，經常一同出席各大小宣傳活動，被封「華星三寶」。

陳奕迅、楊千嬅、梁漢文

三人首次碰面在1995年Eason和千嬅「新秀」比賽結束後，隨「華星」大隊去慶功party，同場還有師兄師姐Edmond、許志安、鄭秀文、海俊傑、張崇基和張崇德等，非常熱鬧。之後三人經常同坐一架「華星」 媬母車四出宣傳，Eason說：「千嬅最慘，因為佢自己化妝要早兩個鐘起身，公司車第一個接佢，再去接Edmond，佢哋喺九龍，最後過海接我，因為『華星』喺灣仔。收工就放低我先，千嬅最後先落車，返去仲要落妝，即係最遲休息，好慘。」千嬅笑說：「乜我咁慘咩？嗰陣唔會諗蝕底，覺得有得做就好好！」

「華星三寶」

Eason爆料：「梁漢文出名喺媬母車食嘢，而杯奶茶係唔會倒瀉。好高技巧，落糖、攪拌！」Edmond繪形繪聲：「係呀，轉彎、剎車都無事！」主持人Colin都忍不住一齊大笑。千嬅說：「試過坐滿歌手一齊出去做嘢，好逼，真係要好瘦，縮埋一舊。」

「華星三寶」

「華星三寶」外號，他們表示是當年高層吳雨被街頭小食「煎釀三寶」啟發。Edmond說：「嗰陣我哋差唔多時候plug歌，一齊上唔同嘅節目做宣傳，成日都一齊做嘢，然後就醞釀咗《大激想》出嚟！」千嬅說：「我哋好勁㗎，乜嘢舞都識跳，鳳陽花鼓都跳過！」Eason和Edmond手舞足蹈，千嬅在旁笑說：「依家啲關節唔係好掂，跳唔到！」

「華星三寶」

Edmond由1992年跟隨師兄師姐合唱《火熱動感LaLaLa》和1993年《愛情傻戀LaLaLa》，1998年他「升呢」師兄，帶著師弟師妹Eason和千嬅合唱可口可樂廣告歌《大激想》及一系列宣傳企劃，延續「華星」大家庭的傳承美德。令Eason和Edmond最難忘，是拍《大激想》廣告當晚發現成為雜誌主角，Eason說：「嗰晚喺西環拍通宵，千嬅埋位拍嘢，我同Edmond踎喺電車站無聊揭雜誌，見到寫我哋『不和』，好好笑！」

「華星三寶」

Edmond說：「其實『華星』有一種特別氣氛，就好似一間音樂學校，好有系統，透過歌唱比賽，然後咁多年幫呢班歌手做咗好多歌、推出好多唱片，令到佢哋有成就，一代一代咁傳落去，亦維繫到一班歌手嘅感情。」Eason補充：「其實連幕後都係有呢種感情，好似一班舊同學。」

梁漢文、楊千嬅、陳奕迅

今年華星唱片成立55周年，特別推出「星塵55」專訪系列。最新三集專訪主角蘇永康，接受主持人Collin Mak訪問，剖白他與華星長達41年的深厚緣份。在樂壇發展的漫長路上，蘇永康坦言自己深受華星一眾傳奇前輩的照顧與啟蒙，特別是梅艷芳、羅文與張國榮三位巨星，在舞台演出、待人接物以至人生態度上，給予了他一生受用的寶貴教導與溫暖回憶。

蘇永康接受「星塵55」主持人Collin訪問，剖白他與華星長達41年的深厚緣份。

蘇永康1985年參加新秀歌唱大賽，他笑言當年為追星：「因為好想見張國榮和梅艷芳，結果初次面試已經見到晒，仲有呂方添！我畀咗二十蚊報名，賺咗！」比賽得到亞軍後，他簽約華星經理人旗下，但一直未有出碟機會，他說：「多謝當時華星藝員管理部總經理李進先生，佢同我講，每年公司都有得獎者，亦有好多歌手排住隊出唱片，如果出面有其他公司啱就出去試吓，公司全力支持！」1989年加盟其他唱片公司推出首張專輯《失眠》。

影片截圖

2011年機緣巧合下蘇永康再投入娘家懷抱，他說：「我由舊公司轉投林建岳博士旗下，而當時華星係林博士嘅，所以我好自然就返入去，好記得第一日入錄音室就係錄《那誰》。」他憑此歌橫掃各大樂壇頒獎禮，成為年度金曲。蘇永康形容這段緣份極其夢幻且珍貴，直言華星對他而言不僅是一間唱片公司，更是一個孕育無數音樂夢想的「寶庫」，成就了他璀璨的音樂生涯，也讓他在前輩身上學會了永不忘本的行事作風。

影片截圖

在與「大師姐」梅艷芳的相處中，蘇永康深刻感受到對方重情重義且不說教的待人之道。他憶述梅姐雖然從不刻意嚴詞說教，但總透過日常相處點滴影響後輩，即使她生病期間，縱使飽受病痛折磨，仍常常記掛著身邊的朋友。「我好記得2003年9月24日我生日，當時沙士、哥哥（張國榮）走咗，而我剛離婚，覺得無嘢值得慶祝，嗰日下晝梅姐經理人打畀我話梅姐book咗餐廳叫我一齊食飯，佢話：『阿姐唔想你一個人喺屋企。』」這種溫暖體貼的關懷，讓蘇永康銘記至今。

影片截圖

蘇永康感恩出道後，即有機會與一代「歌聖」羅文合唱經典勵志歌《浪淘沙》，當時還有張衞健、杜德偉、歐陽德勛、莫鎮賢、林楚麒和戴蘊慧等跨代合唱，展現樂壇傳承佳話。他說：「羅文好錫所有後輩，佢教畀我嘅嘢不少於梅姐，好記得當年因為《浪淘沙》佢帶我哋去咗好多地方表演，手把手教我哋喺舞台上嘅站位與角度技巧，終生受用。」甚至說話和衣著心得傾囊相授，成為他日後累積演出經驗的重要基石。

影片截圖

除了羅文與梅艷芳外，蘇永康亦憶述了與「哥哥」張國榮相處的溫馨片段。在華星的歲月裡，張國榮對後輩照顧有加，不僅常帶年輕的他們出外用餐、見世面，毫無架子的提攜，陪伴他度過了無數難忘的青春記憶。

觀看相關影片按連結：https://youtu.be/SSNWyZWINuM

觀看相關影片按連結：https://youtu.be/Is2qR172txc

觀看相關影片按連結：https://youtu.be/m4KxXM-G3UA