「熱狗」出沒注意！

最近台灣省嘅政治氣候風起雲湧，先有「侵侵」暗示「台灣有事，唔關我事」，因為佢唔想跑到9500英里外打仗；跟住美角科企巨頭，三番四次返鄉下(台灣省) ，都避咗唔見大當家。唔知係咪呢個「台獨」氣旋，冇乜天時地利人和成唔到形， 所以江湖傳聞話台灣金主又開番條大水喉搞嘢。我零零發都留意到有唔少「黃人」蠢蠢欲動，包括沉寂咗好耐嘅「熱血鬆人」創辦人「熱狗」黃x達，最近都頻頻出片呃like。

47歲嘅「熱狗」喺香港出世，喺「沉大」讀電影，曾經做過幾部電影嘅收音，之後喺2001年加入「三色台」做編劇，但做咗幾年見冇咩起色，喺2010年就唔撈出咗去搞網台。

喺2011年嘅七一遊行，「熱狗」就喺灣仔修頓球場呼籲市民參加「文人力量」嘅靜坐活動，佢亦趁機埋咗「文人力量」嘅「粗口皇」黃X民堆，「熱狗」學足曬「粗口皇」，提出「抗爭有發達」、「暴動即可」等口號，又鼓動用激烈嘅手段達到目的，叫做打響個名堂，增加知名度。2012年，佢同老婆成立「熱血鬆人」呢個組織，去主張「城邦自治」、「香港建國」等港獨激進思想，同年更被「粗口皇」推薦代表「文人力量」參選立法會。 佢以為有加持，啲票源就掂曬，但以佢咁淺嘅政治資歷，落敗係日常！但估唔到隻「熱狗」一輸咗，竟然話自己只不過喺崇拜「粗口皇」，並唔係支持「文人力量」咁話！雖然選唔到啫，都唔使咁反骨喎！

選舉之後，「熱狗」又同老婆創辦「熱血Daily」，出報紙同做網媒，透過節目去推崇本土主義、煽動族群對立，喺當時嘅社會氛圍，的確吸引到一班心智唔成熟嘅青少年，誤信「歪理」，走向偏激。喺2014年佔中期間，「熱狗」更帶隊衝擊立法會，聲援居民抗議新界東北發展計劃前期撥款，同立法會職員、警方衝突，最後被裁定「非法集結」罪成。

佔中過後，喺2015年初，「熱狗」又利用反水貨客嘅群情，公然宣揚對抗中央，激發兩地予盾，佢喺一個「工大」嘅論壇上，口出狂言話香港人要完全排拒「中國人」呢個身份，「香港人」要自主，又不斷叫囂話「香港人好討厭內地人，要畫清界線，鼓吹香港獨立！呢段期間，「文人力量」、「熱血鬆人」同其他本土組織，不停舉辦網聚吸引年輕人參與，為日後挑撥內地同香港矛盾嘅「光復行動」招兵買馬。喺2015年3月嘅「光復元朗」示威，發生咗嚴重騷亂，導致多名示威者受傷及被捕，但最吊詭嘅係，嗰日冇一個「熱血鬆人」嘅成員中招。線人話原來佢哋喺大規模衝突發生前，已經全部「鬆人」，「熱狗」仲叻叻咁喺網台話，所有成員已安全到達元朗西鐵站！其他本土組織同埋一班傻更更被煽動嘅年青示威者隨即媽聲四起，話要聲討「熱狗」! 「熱狗」知衰咗，咁唯有扮嘢作出公開道歉，話當日「熱血鬆人」表現惡劣、自己領導無方咁話！呢啲好明顯就係「推人去送死，自己就返屋企」、「你有你熱血，我有我鬆人」嘅縮骨行為啦！

到2016年5月，「熱狗」為咗要喺立法會選舉出位，於是就喺「熱血Daily」，舉辦網上「香港國旗設計比賽」，話設計要代表本土文明同精神喎，並且會喺七一遊行嘅「熱血鬆人」街站，以升旗禮方式展示優勝作品，想曲線咁宣揚「港獨」、同埋增加年青選民嘅選票。由於當時冇適當嘅法例去作出檢控，所以佢好彩甩到身，不過佢出戰九東選區，最終又係失敗告終。

「熱狗」吹捧嘅「香港獨立」，不嬲都係偽命題，佢呢種政治投機、搏出位、縮骨加埋反骨嘅性格，唔單止冇幫佢儲到政治mileage，相反，喺國安法實施之後隨時會出事，所以「熱狗」喺2021年解散咗「熱血鬆人」之外，連佢搞嘅「熱血Daily」，亦轉向報導大眾化同生活化嘅話題。

「熱狗」本來乖乖地營運個網台，呃吓啲死硬派「黃」人手足支持同課金，夠兩餐咪算囉，但最近佢可能又受唔到金主嘅誘惑，又再開始輕波作浪，對一啲敏感嘅社會議題，口不擇言、粗口橫飛、加鹽加醋咁去制造矛盾試水溫。例如將宏福苑大火同公務員加薪混為一談，公開聲稱話要「一竹篙打一船人」，話公務員今年冇可能可以加人工！佢又講到有個內地人喺沙灘露營丟垃圾被罰款，將窮遊議題無限放大，玩針對……咪以為佢喺度諷刺時弊咁簡單，其實佢樣樣都係對著幹，潛移默化咁加深市民對中央同特區政府嘅不滿，加深兩地嘅矛盾，咁當有咩風吹草動，佢就會借力搞事、搵着數！

「熱狗」似乎想東山再起，不過我零零發奉勸佢修心養性，食吓安樂茶飯好啲，因為高人話雷達從未離開過佢；我零零發亦都奉勸各位「熱血」嘅公民，「熱狗」嘅track record，似乎係「鬆人」多過「熱血」，所以大家都要睇路「鬆人」呀！

鍾情局。零零發

鍾情局

** 博客文章文責自負,不代表本公司立場 **

就大埔宏福苑大火之後嘅長遠居住安排，宏福業主(A-G座)如果想透過「特設銷售計劃」購買同選擇單位，就要喺6月30日前簽署「接受收購建議信件」成為首批揀樓人士，否則就成為第二批揀樓人士(截止日期：8月31日)。宏志閣(H座)業主方面，如果有75%或以上業主喺6月30日前簽署「接受收購建議信件」，政府嘅長遠方案便會包括宏志閣。反之，長遠方案將不會涵蓋宏志閣。

雖然距離6月30日剩返4日，不如都等我零零發分析下呢個收購proposal。
首先大家必須認清一個冷冰冰嘅現實，宏福苑呢個私人屋苑已經無晒市場價值。就算係無被火勢波及嘅宏志閣都已經俾人當做「凶宅」。呢個唔係嚇你，亦唔係危言聳聽，你試吓去任何一個地產網站，揀「宏福苑」嘅「估算價」，得出都係「-」嘅符號。再試吓任何一個銀行網站「網上估價」，得出都係「不適用」嘅答案。大家覺得「-」同「不適用」，等到幾時會有改變？係咪等到大維修(如果有) 之後，等幾耐？

有地產高人指出，政府收購價是合理水平以上嘅價錢，足以令到宏福苑嘅居民重新置業，不單在大埔區，仲可選擇大埔以外嘅地區，甚至有條件選擇私樓。買過樓嘅人都有類似嘅經歷，樓市係瞬息萬變，唔會等人，睇啱嘅心水樓盤，當你猶豫嘅時候，你嘅機會成本不斷增加，可能過多一陣就已經無咗、又或者已經貴咗。

喺法律層面，現時整個宏福苑有啲單位仲有未供完嘅按揭，有啲業主不幸罹難要進行處理遺產程序，甚至有啲業權失聯、根本搵唔到人處理，牽涉一連串複雜嘅法律問題。另外，根據保險投訴局最新公布2025/26年度報告，喺2025年投訴局共接獲857宗投訴個案，較上一年度勁升32.7%，當中主要嘅爭議係保單條款嘅詮釋。同樣，處理法團為屋苑購買嘅火險賠償問題十分複雜，需要法律同保險專業人士處理。咁如果業主同意將業權轉售政府，政府就會承擔相關法律、程序、賠償金額同處理時間上嘅風險。係人都知處理法律細節最麻煩，將啲咁複雜嘅問題交俾政府處理，聽落又真係可以減輕咗宏福業主嘅煩惱。

個人財務方面，今次政府提出嘅收購價，係根據大火前嘅市價，仲要加多啲，金額由三百五十萬到五百萬港元不等，坦白講係幾優厚。平心而論，一個市值已經歸零嘅單位，而家業主有實實在在嘅現金，就可以有最大嘅主動權同彈性，鍾意可以買私樓、買居屋又得、買綠置居都得；想喺大埔原區落腳可以，想搬去九龍、新界其他地方重新出發都得。

正當大家為頭家做一個重大決定嘅時候，偏偏就係有班所謂「有心人」，扮晒災民嘅「代言人」、扮晒「為民請命」，煽動災民去杯葛收購計劃。線人話有一班「有心人」係宏福苑居民，不過佢哋講一套做一套，一邊叫「企硬」、「同政府抗爭到底」，擺出一副同你並肩作戰嘅樣，但另一邊廂，佢哋自己就私底下接受收購，唔知係咪諗住K.O.咁啲人，等少啲人同佢哋爭靚樓? 另一班就係路人「甲乙丙」嘅口水友，成日喺社交媒體搧風點火，又講到政府官商勾結「昆」啲災民賤賣業權咁話，又或者喺度滿腔激情做show……等到一班純真嘅災民誤信讒言、聽佢哋唆擺，miss咗個deadline之後，佢哋就會拍拍籮柚、轉身閃人，對災民日後嘅死活、福祉置之不理！

宏福苑業主嘅選擇，係關乎佢哋未來幾十年嘅生活安排，千祈唔好俾任何別有用心嘅人騎劫！業主一邊要面對失去家園嘅徬徨，一邊又要應付排山倒海嘅法律同財務問題，精神上早已經到咗極限，所以做決定前，真係要保持一份清醒同理性，唔好淨係沉醉喺情懷之中，要認清邊個係真心真意咁幫你重建家園，邊個係攞你嚟做戲！

每個人嘅經歷選擇都好唔同，不過keep住一個唔知幾時可以住、可以放租、可以放盤嘅單位，喺市場上唔應該有人會接手嘅物業，係咪一個適合嘅選擇？「別有用心嘅人」而家就巴巴閉閉，好似「幫緊你、幫緊你」咁，到你錯過咗收購之後，佢哋可能耐唔中喺社交媒體嗶哩吧啦鬧幾句，跟住就人間蒸發…… 你聽咗佢哋講，到時兩頭唔到岸就後悔莫及，仲要面對一籮籮嘅問題，你估佢哋仲會唔會繼續幫你? 不過最重要係，你估佢哋根本有冇能力幫到你先？

鍾情局。零零發