「著草雙紅」- 西門傑 & 攬炒迪

前一排零零發提過四個茄哩啡小花嘅「孽績」，今次就講吓另外兩個被懸「紅」嘅通緝犯，西門傑同攬炒迪，雖然佢哋行嘅戲路同小花有啲分別，但結局都係一樣 : 做緊「二奶仔」 (二等公民)等拉！

鄭x傑 - 西門傑

洋名Simon，35歲，喺屯門大，喺台灣省讀大學主修政治同國際關係，曾經去過北京同東洋做交換生，畢業後去咗英倫讀政治經濟碩士，2017年底返香港之後就去英倫駐港總領館打工。江湖傳聞係2019年黑暴期間，佢扮記者、學生，混入示威現場向「本土派」人士攞料，暗中為英倫主子收集情報。 咁喺8月嘅時候，班「黃友」見佢好耐冇喺暴動現場蒲頭，就幻想佢係「被失蹤」、「被送中」，於是就係社交媒體不斷出post危言聳聽，就係咁，「西門傑」就即刻做咗網紅囉！

「黃友」以為「愛」佢，其實係「害」咗佢。咁樣俾人屈，內地公安唯有公開咗對「西門傑」嘅調查:話說嗰段時間佢返咗深圳開會，但就忙裏偷閒，一共3次光顧同一私人會所，次次與不同女性進入房間逗留超過兩粒鐘，經過內地公安調查後，發現原來佢係嫖妓，而「西門傑」亦坦白承認，而公安亦show咗會所嘅監控錄像，同埋盤問過程嘅影片做證，再加上兩個女證人指出，係西門傑要求提供性服務……證據確鑿，咁仲唔係叫做斷正?！所以公安將佢行政拘留15日。單嘢咁「瘀」，所以「西門傑」選擇唔通知屋企人同律師囉！

「西門傑」回港後就隱咗形兩個幾月唔回應件事，直至2019年11月初，佢就高調出聲明同接受媒體訪問，話自己被毆打虐待，嚴刑逼供，因為想快啲甩身，先至承認嫖妓。當主持人問佢其實有沒有嫖娼，佢就蛇咬都唔認，跟住就扯去第度，話見到一批香港示威者「被送中」而關押緊！如果佢真係被屈打成招，點解返香港唔即刻開記招，俾大家睇吓傷勢? 話晒「西門傑」都係英倫領事館職員，如果真係咁無辜，呢單嘢仲唔提升到國際外交層面，還佢一個公道?! 如果真係有「被送中」嘅示威者，又唔見佢哋啲屋企人報失蹤，開記招？

「西門傑」被訪問之後冇耐，就話自己係被政治迫害嘅難民，跟住唔知點解就辭職，仲嗱嗱臨走咗去英倫。唔使九個月，佢就獲批庇護簽証，可以5年後申請永久居留英倫。佢「生活安定」之後，就開始聯同其他海外「黃友」同逃犯，組織多個團體，好似「避風站」、「英倫港僑協會」同「HK影子議會」等，開闢另一條反華國際戰線；佢又對一啲「黃友」議題不斷賣「假藥」，好似「生果佬案」同「35+案」嘅裁決、23條立法、中央「跨境鎮壓」同反對喺英倫興建中國大使館等等。佢又接受「路邊社」同「彭駁社」訪問，賴叻咁話要成立「流亡議會」及「影子國會」，支援香港「民主運動」，話要由香港人選出有民意代表嘅機構，同國際社會接軌……跟住佢又成日係面書同海外媒體大肆宣揚佢呢個詭計！

西門傑咁肆無忌彈嘅惡行，就順理成章幫佢CV，加多一個被國安處懸紅100萬，通緝佢「分裂國家」嘅身份！

劉x迪 - 攬炒迪

32歲，喺香港土生土長，2015年「乘大」測量學士畢業之後，分別喺香港同新加坡做過吓測量師，之後去咗英倫讀基建投資同金融碩士。雖然黑暴期間，佢仲喺英倫讀緊書，但就喺「連登」討論區以網名「我要攬炒」提出過「攬炒」呢條橋，呼籲外國政府取消特區政府官員、親中派人士以及家人嘅海外護照，等佢哋推行「逃犯條例」時有避忌。自此「攬炒」呢個名詞，就做咗暴徒嘅口頭禪，而佢就彈起埋，被封為「攬炒迪」！

係「生果佬」案審訊提到，因為「攬炒迪」喺「連登」有啲號召力，所以「生果佬」叫從犯証人陳x華收佢做「靚」。喺2020年1月，「攬炒迪」就被安排去咗台灣省「生果佬」嘅別墅，同「生果佬」食晏，期間「生果佬」話要捧佢做「政治明星」，但希望「攬炒迪」去統領「勇武派」同暴徒，等個暴亂可以持續；「生果佬」仲應承提供政治同經濟上嘅人脈，同埋俾錢佢洗。 一個後生仔從未如此被「器重」，同埋見到「錢途」一片光明，於是就積極配合「生果佬」，組成「重光團隊」，喺全世界登報去游說國際社會，經濟封鎖同制裁中國及特區政府。而當時「生果報」就不斷為「重光團隊」加持，而嗰段期間，「重光團隊」更舉辦過4次眾籌掠水，共籌得超過3,700萬港元添！！

後來「攬炒迪」見勢色唔對，唔敢返香港。喺2020年6月，新聞紙話佢喺英倫街頭被人打到變豬頭，有啲「黃友」妄想症隨即發作，話中央用100萬買起佢條命喎？！不過「連登」網民就懷疑「攬炒迪」將眾籌嘅錢私吞，妄顧手足死活，所以先俾人「柄」至真！「攬炒迪」、「黃友」，究竟講金定講心？大家心照啦！點都好，最後「攬炒迪」都逃唔過被國安處以「串謀勾結外力危害國安」罪名，懸紅100萬被通緝嘅命運。

睇而家嘅國際形勢，呢兩個逃犯嘅利用價值越嚟越少，好自為之啦！

鍾情局。零零發

鍾情局

** 博客文章文責自負,不代表本公司立場 **

最近台灣省嘅政治氣候風起雲湧，先有「侵侵」暗示「台灣有事，唔關我事」，因為佢唔想跑到9500英里外打仗；跟住美角科企巨頭，三番四次返鄉下(台灣省) ，都避咗唔見大當家。唔知係咪呢個「台獨」氣旋，冇乜天時地利人和成唔到形， 所以江湖傳聞話台灣金主又開番條大水喉搞嘢。我零零發都留意到有唔少「黃人」蠢蠢欲動，包括沉寂咗好耐嘅「熱血鬆人」創辦人「熱狗」黃x達，最近都頻頻出片呃like。

47歲嘅「熱狗」喺香港出世，喺「沉大」讀電影，曾經做過幾部電影嘅收音，之後喺2001年加入「三色台」做編劇，但做咗幾年見冇咩起色，喺2010年就唔撈出咗去搞網台。

喺2011年嘅七一遊行，「熱狗」就喺灣仔修頓球場呼籲市民參加「文人力量」嘅靜坐活動，佢亦趁機埋咗「文人力量」嘅「粗口皇」黃X民堆，「熱狗」學足曬「粗口皇」，提出「抗爭有發達」、「暴動即可」等口號，又鼓動用激烈嘅手段達到目的，叫做打響個名堂，增加知名度。2012年，佢同老婆成立「熱血鬆人」呢個組織，去主張「城邦自治」、「香港建國」等港獨激進思想，同年更被「粗口皇」推薦代表「文人力量」參選立法會。 佢以為有加持，啲票源就掂曬，但以佢咁淺嘅政治資歷，落敗係日常！但估唔到隻「熱狗」一輸咗，竟然話自己只不過喺崇拜「粗口皇」，並唔係支持「文人力量」咁話！雖然選唔到啫，都唔使咁反骨喎！

選舉之後，「熱狗」又同老婆創辦「熱血Daily」，出報紙同做網媒，透過節目去推崇本土主義、煽動族群對立，喺當時嘅社會氛圍，的確吸引到一班心智唔成熟嘅青少年，誤信「歪理」，走向偏激。喺2014年佔中期間，「熱狗」更帶隊衝擊立法會，聲援居民抗議新界東北發展計劃前期撥款，同立法會職員、警方衝突，最後被裁定「非法集結」罪成。

佔中過後，喺2015年初，「熱狗」又利用反水貨客嘅群情，公然宣揚對抗中央，激發兩地予盾，佢喺一個「工大」嘅論壇上，口出狂言話香港人要完全排拒「中國人」呢個身份，「香港人」要自主，又不斷叫囂話「香港人好討厭內地人，要畫清界線，鼓吹香港獨立！呢段期間，「文人力量」、「熱血鬆人」同其他本土組織，不停舉辦網聚吸引年輕人參與，為日後挑撥內地同香港矛盾嘅「光復行動」招兵買馬。喺2015年3月嘅「光復元朗」示威，發生咗嚴重騷亂，導致多名示威者受傷及被捕，但最吊詭嘅係，嗰日冇一個「熱血鬆人」嘅成員中招。線人話原來佢哋喺大規模衝突發生前，已經全部「鬆人」，「熱狗」仲叻叻咁喺網台話，所有成員已安全到達元朗西鐵站！其他本土組織同埋一班傻更更被煽動嘅年青示威者隨即媽聲四起，話要聲討「熱狗」! 「熱狗」知衰咗，咁唯有扮嘢作出公開道歉，話當日「熱血鬆人」表現惡劣、自己領導無方咁話！呢啲好明顯就係「推人去送死，自己就返屋企」、「你有你熱血，我有我鬆人」嘅縮骨行為啦！

到2016年5月，「熱狗」為咗要喺立法會選舉出位，於是就喺「熱血Daily」，舉辦網上「香港國旗設計比賽」，話設計要代表本土文明同精神喎，並且會喺七一遊行嘅「熱血鬆人」街站，以升旗禮方式展示優勝作品，想曲線咁宣揚「港獨」、同埋增加年青選民嘅選票。由於當時冇適當嘅法例去作出檢控，所以佢好彩甩到身，不過佢出戰九東選區，最終又係失敗告終。

「熱狗」吹捧嘅「香港獨立」，不嬲都係偽命題，佢呢種政治投機、搏出位、縮骨加埋反骨嘅性格，唔單止冇幫佢儲到政治mileage，相反，喺國安法實施之後隨時會出事，所以「熱狗」喺2021年解散咗「熱血鬆人」之外，連佢搞嘅「熱血Daily」，亦轉向報導大眾化同生活化嘅話題。

「熱狗」本來乖乖地營運個網台，呃吓啲死硬派「黃」人手足支持同課金，夠兩餐咪算囉，但最近佢可能又受唔到金主嘅誘惑，又再開始輕波作浪，對一啲敏感嘅社會議題，口不擇言、粗口橫飛、加鹽加醋咁去制造矛盾試水溫。例如將宏福苑大火同公務員加薪混為一談，公開聲稱話要「一竹篙打一船人」，話公務員今年冇可能可以加人工！佢又講到有個內地人喺沙灘露營丟垃圾被罰款，將窮遊議題無限放大，玩針對……咪以為佢喺度諷刺時弊咁簡單，其實佢樣樣都係對著幹，潛移默化咁加深市民對中央同特區政府嘅不滿，加深兩地嘅矛盾，咁當有咩風吹草動，佢就會借力搞事、搵着數！

「熱狗」似乎想東山再起，不過我零零發奉勸佢修心養性，食吓安樂茶飯好啲，因為高人話雷達從未離開過佢；我零零發亦都奉勸各位「熱血」嘅公民，「熱狗」嘅track record，似乎係「鬆人」多過「熱血」，所以大家都要睇路「鬆人」呀！

鍾情局。零零發