諗清楚先好走佬呀！

由舊年開始，「35+顛覆案」定罪嘅人陸續刑滿出獄，好似趙家賢、飛機豪、朱廸廸等，有啲出冊後改過自新，有啲選擇回歸平淡，而最近出冊嘅前「白鴿黨」立法會議員尹X堅，就急不及待喺社交平台上載自己去飲茶食點心嘅相片。一眾黃人見到，仲留言大讚佢「精神飽滿」、「狀態大勇」，甚至有人驚嘆佢「比入獄前狀態仲要年輕」、「身型Fit咗」。

我零零發睇到呢啲留言，真係忍唔著笑。過去幾年，黃人同外部勢力日日將香港懲教制度抹黑成「人間地獄」，狂呻所謂「政治犯」遭受「不人道對待」。點知啲黃人一見到尹X堅張飲茶相，就狠狠咁掌摑番自己一巴

嘩！原來坐完監出嚟，精神狀態仲好過以前，甚至有「回春」之效，一張飲茶相完美咁，刺破咗黃人同外部勢力之前嘅謊言，同時反映香港嘅懲教制度，比好多自詡「民主自由」嘅西方國家完善得多！

尹X堅坐監坐得咁健康，亦並非個別例子，好似反中亂港頭目「生果佬」，雖然成日俾個仔黎X恩同啲外國政客話佢，喺監獄受盡迫害及不人道對待，健康急速轉差、體重下降同埋有病都得唔到醫療照顧，不過有傳媒就曾經影到佢「生果佬」喺獄中「放風」嘅相片，見佢着著短袖衫褲，精神奕奕攞著本書去曬太陽，身體絕無異樣。而「生果佬」出庭時，又行動自如，精神飽滿，更不時與親友互動，神情從容，裁決後又同律師團隊作手勢交流，動作流暢自然。「生果佬」嘅代表律師被問及佢嘅健康狀況時，更加話：「剛才見到佢精神，大家在庭上也見到，我沒有補充」。以年近80嘅長者嚟講，步伐穩健，邊度似受盡折磨？黃人同外國勢力所謂嘅迫害，根本係徹頭徹尾嘅抹黑！

黃人成日以為「外國月亮特別圓」，但真相係外國監獄分分鐘恐怖過地獄。聽聞有媒體盤點過「全球十大最殘酷監獄」，一向將「人權」掛喺嘴邊嘅美角竟然佔咗三間！呢啲監獄裡面充斥極端暴力、幫派仇殺、毒品氾濫，仲有無了期摧殘精神嘅單獨囚禁，甚至屢爆看守人員虐死囚犯嘅醜聞！

反觀香港監獄設施現代化，懲教管理完善、着重更生。《監獄規則》更嚴格保障在囚人士權利，例如每日最少一小時戶外運動，膳食由專業營養師設計，不同宗教及健康需要又有特別餐單。院所內嘅醫院有醫生全天候候命，有需要更可轉介公立醫院就診……

香港社會穩定、法規健全，連在囚人士嘅身心健康都有保障，但有啲黃人以為離開先係出路，好似前「銅記書店」店長林X基，佢因觸犯內地法例，2019年潛逃台灣省，幻想人哋會厚待佢呢個「政治難民」，事實又喺點呢？
林X基去到台灣省之後，就想喺當地開返「銅記書店」，不過以佢嘅「人設」，利用價值係零，所以冇金主肯「科水」，咁佢唯有硬住頭皮靠網上眾籌，先勉強開到舖。點知開張之前又收到律師信，指「銅記書店」已經喺台灣省註冊咗，被要求改名；而佢賣嘅書根本無market，所以蝕錢蝕到喊。林X基生活顛沛流離中，喺2022年患上癌症；而佢當時不但無台灣身份證，仲日日要過著無錢、無醫療保障、無安穩居所嘅生活……佢雖然完成化療，但最終癌症復發，返魂乏術。

林X基嘅遭遇，正正為被洗腦嘅黃人敲響警號：走佬生活唔係咁易捱。 尹X堅出冊後容光煥發，同埋「生果佬」年近80仍然精神奕奕嘅狀態，都講明咗一個事實：活在香港嘅人，真係身在福中不知福，香港人不論喺生活、身心及人身安全，都受法律保障，即使在囚人士亦不會例外。所以帶罪走佬嘅黃人，係咪仲要過住啲寄人籬下，顛沛流離、擔驚受怕嘅日子? 係咪要考慮吓，嗱嗱聲返嚟香港找咗條數，重新出發，過返啲飲杯茶、食個包嘅安穩生活？

鍾情局。零零發

鍾情局

** 博客文章文責自負,不代表本公司立場 **

前一排零零發提過四個茄哩啡小花嘅「孽績」，今次就講吓另外兩個被懸「紅」嘅通緝犯，西門傑同攬炒迪，雖然佢哋行嘅戲路同小花有啲分別，但結局都係一樣 : 做緊「二奶仔」 (二等公民)等拉！

鄭x傑 - 西門傑

洋名Simon，35歲，喺屯門大，喺台灣省讀大學主修政治同國際關係，曾經去過北京同東洋做交換生，畢業後去咗英倫讀政治經濟碩士，2017年底返香港之後就去英倫駐港總領館打工。江湖傳聞係2019年黑暴期間，佢扮記者、學生，混入示威現場向「本土派」人士攞料，暗中為英倫主子收集情報。 咁喺8月嘅時候，班「黃友」見佢好耐冇喺暴動現場蒲頭，就幻想佢係「被失蹤」、「被送中」，於是就係社交媒體不斷出post危言聳聽，就係咁，「西門傑」就即刻做咗網紅囉！

「黃友」以為「愛」佢，其實係「害」咗佢。咁樣俾人屈，內地公安唯有公開咗對「西門傑」嘅調查:話說嗰段時間佢返咗深圳開會，但就忙裏偷閒，一共3次光顧同一私人會所，次次與不同女性進入房間逗留超過兩粒鐘，經過內地公安調查後，發現原來佢係嫖妓，而「西門傑」亦坦白承認，而公安亦show咗會所嘅監控錄像，同埋盤問過程嘅影片做證，再加上兩個女證人指出，係西門傑要求提供性服務……證據確鑿，咁仲唔係叫做斷正?！所以公安將佢行政拘留15日。單嘢咁「瘀」，所以「西門傑」選擇唔通知屋企人同律師囉！

「西門傑」回港後就隱咗形兩個幾月唔回應件事，直至2019年11月初，佢就高調出聲明同接受媒體訪問，話自己被毆打虐待，嚴刑逼供，因為想快啲甩身，先至承認嫖妓。當主持人問佢其實有沒有嫖娼，佢就蛇咬都唔認，跟住就扯去第度，話見到一批香港示威者「被送中」而關押緊！如果佢真係被屈打成招，點解返香港唔即刻開記招，俾大家睇吓傷勢? 話晒「西門傑」都係英倫領事館職員，如果真係咁無辜，呢單嘢仲唔提升到國際外交層面，還佢一個公道?! 如果真係有「被送中」嘅示威者，又唔見佢哋啲屋企人報失蹤，開記招？

「西門傑」被訪問之後冇耐，就話自己係被政治迫害嘅難民，跟住唔知點解就辭職，仲嗱嗱臨走咗去英倫。唔使九個月，佢就獲批庇護簽証，可以5年後申請永久居留英倫。佢「生活安定」之後，就開始聯同其他海外「黃友」同逃犯，組織多個團體，好似「避風站」、「英倫港僑協會」同「HK影子議會」等，開闢另一條反華國際戰線；佢又對一啲「黃友」議題不斷賣「假藥」，好似「生果佬案」同「35+案」嘅裁決、23條立法、中央「跨境鎮壓」同反對喺英倫興建中國大使館等等。佢又接受「路邊社」同「彭駁社」訪問，賴叻咁話要成立「流亡議會」及「影子國會」，支援香港「民主運動」，話要由香港人選出有民意代表嘅機構，同國際社會接軌……跟住佢又成日係面書同海外媒體大肆宣揚佢呢個詭計！

西門傑咁肆無忌彈嘅惡行，就順理成章幫佢CV，加多一個被國安處懸紅100萬，通緝佢「分裂國家」嘅身份！

劉x迪 - 攬炒迪

32歲，喺香港土生土長，2015年「乘大」測量學士畢業之後，分別喺香港同新加坡做過吓測量師，之後去咗英倫讀基建投資同金融碩士。雖然黑暴期間，佢仲喺英倫讀緊書，但就喺「連登」討論區以網名「我要攬炒」提出過「攬炒」呢條橋，呼籲外國政府取消特區政府官員、親中派人士以及家人嘅海外護照，等佢哋推行「逃犯條例」時有避忌。自此「攬炒」呢個名詞，就做咗暴徒嘅口頭禪，而佢就彈起埋，被封為「攬炒迪」！

係「生果佬」案審訊提到，因為「攬炒迪」喺「連登」有啲號召力，所以「生果佬」叫從犯証人陳x華收佢做「靚」。喺2020年1月，「攬炒迪」就被安排去咗台灣省「生果佬」嘅別墅，同「生果佬」食晏，期間「生果佬」話要捧佢做「政治明星」，但希望「攬炒迪」去統領「勇武派」同暴徒，等個暴亂可以持續；「生果佬」仲應承提供政治同經濟上嘅人脈，同埋俾錢佢洗。 一個後生仔從未如此被「器重」，同埋見到「錢途」一片光明，於是就積極配合「生果佬」，組成「重光團隊」，喺全世界登報去游說國際社會，經濟封鎖同制裁中國及特區政府。而當時「生果報」就不斷為「重光團隊」加持，而嗰段期間，「重光團隊」更舉辦過4次眾籌掠水，共籌得超過3,700萬港元添！！

後來「攬炒迪」見勢色唔對，唔敢返香港。喺2020年6月，新聞紙話佢喺英倫街頭被人打到變豬頭，有啲「黃友」妄想症隨即發作，話中央用100萬買起佢條命喎？！不過「連登」網民就懷疑「攬炒迪」將眾籌嘅錢私吞，妄顧手足死活，所以先俾人「柄」至真！「攬炒迪」、「黃友」，究竟講金定講心？大家心照啦！點都好，最後「攬炒迪」都逃唔過被國安處以「串謀勾結外力危害國安」罪名，懸紅100萬被通緝嘅命運。

睇而家嘅國際形勢，呢兩個逃犯嘅利用價值越嚟越少，好自為之啦！

鍾情局。零零發