香港地百物騰貴，買個飯盒動輒都要五六十蚊起跳，想食得平就只有幫襯快餐店或者兩餸飯，但對於追求健康飲食的朋友來說，選擇空間似乎又窄咗啲。最近，一間本地食店在社交平台Threads高調宣傳一款專為「健康、運動人士」而設的「香煎三文魚飯」，豈料餐點份量與售價曝光後，隨即引來大批網民圍攻，直斥「細夾唔抵」，更有人將之與快餐店同類產品比較，結果惹來店家霸氣反擊，一句「啱咪嚟囉，唔啱咪唔嚟囉」掀起熱議。
網上圖片
從店家上載的照片所見，這份索價60蚊的香煎三文魚飯，賣相可謂相當「精緻」——一個拳頭大小的白飯、三大粒西蘭花，再加上一塊煎三文魚，營養價值固然滿分，但份量卻令不少網民搖頭。有網民直言「得3舊西蘭花？三文魚咁細條？60蚊喎」，更有人揶揄「加隻蛋會唔會無咁慘」，認為以這個價錢來說，性價比實在偏低。
網上圖片
最令店家不滿的，是有網民將這份三文魚飯與同樣主打健康餐的快餐店作比較，認為無論份量還是價錢都輸蝕，狠批「搵笨」。面對排山倒海的負評，店家隨即在IG Story發文反擊，強調「60蚊食個100g三文魚餐，邊度貴？」，更霸氣拋下一句：「即係大家有要求係正常嘅，最好添，啱咪嚟囉，唔啱咪唔嚟囉」，態度相當強硬。
網上圖片
雖然店家的霸氣回應被不少網民解讀為「惱羞成怒」，更有人預言「咁嘅態度好快執」，但店家似乎化悲憤為動力，連日來頻頻推出新品，包括同樣賣60蚊的「巨大化照燒雞扒蛋包飯」，以及65蚊的「即燒澳洲牛肉飯」。
網上圖片
從相片所見，這兩款新品的份量明顯比三文魚飯豐盛得多，難怪有網民笑言「極度懷疑出三文魚飯係用嚟吸流量再襯托其他飯」、「今次就差唔多，點解同三文魚爭咁遠」。不過，亦有網民直言「見到你咁樣爆粗X threads友，即刻唔會幫襯」，看來這場「三文魚飯風波」還未完全平息。
