丁子朗與馮榕榕專訪： 一場「共鳴瞬間」背後 是互相成就定互相利用？

走進香港康得思酒店大堂，一幅1.6米長、1米闊的巨型畫作《ILYSMBIDKHTTYBIKYLSE》霸氣佔據視線——纏繞的肢體、拉扯的色階，像一場無聲的角力。這是丁子朗（Karl Ting）首次在酒店公共空間舉辦個人作品展「藝術之旅：共鳴瞬間」的焦點之作，也是他與13a New Street Art Gallery策展人馮榕榕（Ruby）的首次深度合作。

設於酒店公共空間丁子朗「藝術之旅：共鳴瞬間」的焦點作品。

一個是橫跨演藝與視覺藝術的多棲藝人，一個是短短3年內將小眾畫廊推上香港藝術地圖的策展人。兩人看似走在不同軌道，卻因為一場展覽被緊緊綁在一起。他們之間，到底是「互相成就」，還是「互相利用」？訪問中，兩人給出意想不到的坦誠答案。

策展人馮榕榕(左)與丁子朗(右)是次專訪，給出意想不到的坦誠對談。

合作起點：名氣先行，還是藝術先行？

Ruby直言，當初留意到Karl，並非單純因為他的演員光環，但她也毫不掩飾第一印象的真實面貌。「第一次認識佢，你不得不承認，件事係有少少俾佢嘅名氣點吸引到，我唔會話係全部，但的確有少少。」Ruby回憶，第一次認真睇Karl的作品，是2022年與戴祖儀合作的聯展，當時戴祖儀邀請丁子朗畫了一幅畫。「嗰一刻見到佢幅畫嘅時候，你就知道佢唔係一般大家認為嗰種『藝人畫兩筆』嘅狀態，佢真係識畫畫。用色、構圖、筆觸，所有嘢你都覺得係一個畫家嘅路向。」

但她承認，當時自己仍處於觀察階段。「作為畫廊，必須要諗，就算佢識畫畫，有咁嘅功架，但佢會唔會繼續行落去？畫家嘅路，一定要持續先得。」隨後幾年，她看見Karl一直有畫畫，活躍參與不同藝術項目，「你就知道佢真係有心，佢係鍾意，同埋佢有嗰個潛質繼續發展。」

當被問到「如果佢唔係丁子朗，你仲會唔會展出呢批畫？」Ruby回應得乾脆：「完全唔係淨係睇佢藝人名氣。畫廊嘅專業考量，唔係淨睇嗰個人有幾出名，而係佢有冇心繼續喺藝術呢個方向發展！」

丁子朗焦點藝術品《放手》(Let Go)捕足了親密關係變質為毒性依賴時，那段精準而痛苦的掙扎瞬間。

權力角力：策展人與藝術家的拉扯

將私人情感化作公開展覽，本身就是一場權力讓渡。Karl如何看待Ruby對自己作品的「解讀」與「包裝」？他沒有迴避這尖銳問題。

「呢個係雞同雞蛋嘅命題。」Karl笑着說。他指香港好多畫廊其實很有態度，會想找不同方向的藝術家。「Ruby初頭認識我，係因為一個聯展入面我擺咗一幅畫。」

他坦然承認演員身份帶來的加持：「我作為演員呢一份工作，係將一啲生命值同經驗加持咗落丁子朗呢個人度。演員就係好多人對丁子朗嘅最直接認識，亦都係好多人冠俾我嘅標籤。但對我嚟講，演員係一份工，畫畫係我嘅興趣，我主要係一個人，唔係一個藝人。」

他強調，畫畫從來不是追求「靚」。「畫畫唔係淨係畫一啲好靚嘅構圖出嚟，靚嘅大把，尤其是而家呢個年代人工智能，你隨便撳都已經好多靚嘅作品。我畫嘅係我嘅經歷、我嘅價值觀、世界觀，呢樣先係我最想做嘅事。」

那Ruby有沒有扭曲過他的原意？Karl答得堅定：「唔存在呢個問題。我嘅價值唔需要人哋嚟定義，我哋嘅價值係因為大家有相同嘅分量而互相欣賞，呢個先係藝術家之間嘅靈魂交流。」

他更透露，Ruby除了是他的畫廊代表，更是他人生中的好朋友。「我成日都同佢一齊食飯，遇到一個好明白自己嘅人係難得嘅，仲要大家可以搵到一個目標一齊向前行。」

互相成就又好，互相利用又好，最終係大家好，合作無間。

底線與信任：如果Ruby要佢改畫？

如果Ruby為咗迎合酒店場地而要Karl改畫，佢會點？呢個問題直指核心。Karl先解釋自己的「過濾器」機制：「作為演員，幕前經驗令我收到好多批評，有好有唔好。我變咗有一個過濾器，有啲意見係有建設性嘅，有啲純粹係個人喜好。」

但他強調，關鍵不在「改唔改」，而在「點解合作」。「我會問自己，點解我會同呢間酒店合作？佢係咪欣賞我？佢想要我名氣定係要啲乜？當我搵到一間酒店，佢嘅理念同我嘅靈魂係匹配嘅，大家願景差唔多嘅時候，好多嘢都係水到渠成。」

他形容今次合作中，酒店完全尊重他想做的事。「我想畫嗰啲關於愛、人生觀、丁子朗呢個人嘅諗法，佢哋從來冇質疑過『會唔會太老套』、『會唔會唔啱我哋酒店嘅客人』——完全係支持。」

咁Ruby嘅角色呢？「Ruby作為畫廊，佢將我嘅作品由80分推到90分。佢會以觀眾角度俾建議我：『如果咁樣做，有機會令觀眾覺得未夠完整，你會唔會考慮咁樣改？』」但Karl強調，建議歸建議，最後決定權在自己手上。「冇人捉住我隻手去畫畫，牛唔飲水撳唔到牛頭低。有啲建議我覺得可以聽，有啲我覺得要堅持，呢個就係人與人之間好玩嘅地方。」

他引用一句曾聽過的話總結：「和諧唔係全部人都同意同一件事，而係每個人都有唔同意見，但最後都達到一個好嘅結果，呢個先係和諧。」

丁子朗是次作品展包含花的元素，他所畫的花別具個人風格。

策展人有冇就住就住？

問到Ruby，Karl嘅演員身份有冇令妳策展時唔敢太批判？會唔會因為佢係公眾人物而鬆手咗？Ruby答得坦率：「我好誠實咁講，一開始冇咁熟嘅時候，我唔會咁直接。但隨住我哋越嚟越熟，就越嚟越直接。」她甚至爆料：「佢今次呢個展覽，有幾幅畫我直情同佢講：『喂，你呢個整理好先啦，做埋佢先啦。』」

她強調，不存在就住就住嘅情況。「我哋大家方向一致，就係想做好個項目，我哋都希望喺能力範圍內推到最高嘅狀態呈現俾大家。當我哋見到有啲嘢可以再做好啲，就會直接講出嚟。」

Karl在旁補充，這正是他欣賞13A的地方。「作為一個畫家或者藝術創作人，我唔想搵一個淨係跟住我節奏行嘅畫廊，我想有一個拍檔，俾多一個角度我睇件事。尤其係13A呢類有諗法嘅畫廊，佢哋鍾意好多唔同嘅藝術家，唔係淨係對我有意見。」

Ruby補充畫廊的定位邏輯：「本身畫廊有自己嘅定位，揀藝術家時有自己準則。但決定咗同邊個藝術家合作後，我哋會攞一個平衡，我哋好尊重藝術家自己嘅創作，因為每一個藝術家需要有自己風格。如果冇咗呢樣個人特色，佢反而唔會發光發亮。」

藝術作品分別在酒店大堂及Alibi-Wine Dine Be Social展出。

成就還是利用？最後一條問題，兩人同時接住

訪問尾聲，我將最後一條問題同時拋給兩人，你覺得你哋之間嘅關係，似「互相成就」定係「互相利用」多啲？兩人幾乎同時接住呢條問題，對望一眼後，一齊笑了。

Karl先開口：「兩樣都會——成就同利用，好正常，每個人嘅關係都有呢兩樣元素。」Ruby接着說：「我覺得自己有咁嘅能力俾人利用，係一件值得驕傲嘅事。因為我哋兩個嘅價值都夠分量，有呢一份內心嘅價值去俾人互相成就或者互相利用。」

Karl補充：「利用呢個字大家可能覺得負面，但係我哋只不過係將資源整合，做到一加一大於二嘅事。呢個係善用。」Ruby點頭：「我覺得係互相欣賞對方某啲自己唔夠嘅地方。人無完美，每個人都會有缺點，我哋大家互相補位。」

Karl最後補了一句，為整段對話畫上句號：「互相成就又好，互相利用又好，最終就係大家好，已經可以合作無間。」

後記：共鳴，從來不是一個人完成的事

展覽取名「共鳴瞬間」，Karl曾解釋：「共鳴唔係一個人嘅事，係一個人嘅情感打到另一個人，嗰一下先叫共鳴。」

而這場展覽本身，或許正是Ruby與Karl之間那一下「共鳴」的產物，儘管當中有過角力、有過直接到不留情面的批評、有過誰話事嘅拉扯，但正因為呢啲「唔舒服」嘅瞬間，先至令合作不止於一場明星打卡展覽，而係一次真正有意義嘅藝術對話。

正如Karl所說：「畫畫唔係畫靚嘢，係畫經歷。」而這場合作，本身也成為他們各自經歷中，值得被畫下的一筆。

訪問後記｜現場觀察

訪問期間，Ruby與Karl不時對望、互相補飛，甚至搶住答同一條問題，氣氛輕鬆得像朋友食飯傾偈多過正式訪問。當Karl提到Ruby係佢好朋友時，Ruby冇否認，只係笑住講咗句「又嚟呢啲」。那種默契，或許比任何「成就」或「利用」的定義，更直接地說明了他們的關係。

文：陳紀良

 

丁子朗10歲開始學習油畫，他強調演戲係演別人，畫畫係畫自己。

關於丁子朗（Karl Ting）

丁子朗，1997年6月30日出生於香港，2016年參加《香港先生選舉》奪得亞軍及「最上鏡先生」後加入無綫電視，現為經理人合約藝員。10歲起學習油畫，14歲移民加拿大多倫多，在中西文化交錯的成長背景下培養出獨特的藝術視角。他擅長以超現實主義為創作語彙，運用粗糙質樸的筆觸與細膩層次的色調，刻劃人際關係中的親密、博弈與包容。他的作品曾參與多個本地及國際藝術展覽，包括Affordable Art Fair等。他認為繪畫比演戲更貼近真實的自己：「演戲係演別人，畫畫係畫自己，冇得呃人。」

馮榕榕在短短3年間將自家創辦畫廊13a New Street Gallery推上香港藝術地圖。關於馮榕榕（Ruby Fung）

馮榕榕，13a New Street Art Gallery主理人兼策展人、香港傳媒「老行尊」馮兆榮女兒。畢業於英國中央聖馬丁藝術與設計學院，主修時裝設計，其後創辦自家時尚品牌。2020年，她在上環創立13a New Street Art Gallery，短短3年內將畫廊推上香港藝術地圖，曾與世界各地及本地藝術家合作舉辦展覽，包括美國的Mr. Likey、泰國的2CHOEY、本地超現實攝影師SurrealHK，以及92歲的「花婆婆」等，每次展覽均吸引大批觀眾，甚至出現排隊入場的盛況。她本身也是藝術玩具資深藏家，收藏涵蓋村上隆、奈良美智、KAWS等知名藝術家的作品。她相信藝術不應被標籤，選擇合作藝術家時不看對方是否名牌大學畢業，不看市場數據，而是相信作品本身傳遞的真誠與完整度。她的宗旨是為年輕藝術家和收藏家提供合適的平台。

香港康得思酒店 x 丁子朗「藝術之旅：共鳴瞬間」作品展

展期：即日至7月31日

地點：香港康得思酒店大堂（L樓層）及Alibi – Wine Dine Be Social（5樓）

Brand起來！

** 博客文章文責自負,不代表本公司立場 **

在觀塘臨海的全新總部辦公室，窗外是陽光灑落的啓德郵輪碼頭，藍天與海港相映著。德國寶（German Pool）與香港文創新派華服潮牌 SPARKLE by KAREN CHAN 剛搬遷至此，the EDGE有幸率先在Karen(陳嘉賢) 全新辦公室進行專訪。坐在眼前、身穿精緻新派華服的 Karen，眼神中透著一股剛柔並重的靈氣。

剛剛九月初，Karen 帶領著自家品牌 SPARKLE COLLECTION再次登上香港年度時尚盛事 CENTRESTAGE 的舞台，贏得無數掌聲。外界常對她的雙重身份感到好奇：一邊是香港家喻戶曉的家電王國二代掌舵人；另一邊是將以「中西合璧」、「文化傳承」、「活化傳統」為宗旨、將傳統工藝融入日常時尚衣飾的品牌創辦人。在實用家電與寫意藝術之間，Karen 展現出一種超然的優雅與平衡。

Sparkle by Karen Chan 與香港歷史博物館的作品剛於9月初 CENTRESTAGE亮相！(IG@sparkle_by_karen_chan)

撕掉「白紙」標籤：以千倍汗水奠定傳承根基

Karen 畢業後，曾在美國Microsoft及美銀等國際大企業任職，之後決定回港接手家族事業。面對公司陪伴父親打拼多年的老臣子，她坦言當時的自己無異於「一張白紙」。「我好慶幸自己返嚟之前有喺出面打過工，起碼心理上我知道出面世界做嘢嘅遊戲規則。」然而，回到家族企業，她面對的是「二代」這個無形的包袱。「老闆（父親）畀咗個好靚嘅 Title 叫副總裁，但嗰個當下，你係咪真的 Deserve 這個位置？很多同級同事心裡難免會有個 Question mark：『我同你個女同一個 Title？』」

 

初回公司接班面對質疑，父親(德國寶集團創辦人兼董事長陳國民)的智慧助她踏實成長。

面對質疑，Karen 沒有選擇用權威去壓人，而是選擇了「Roll up your sleeves（捲起衫袖）由低做起」。「你要用多 100 倍嘅心機，付出多 1000 倍嘅努力，去做一啲成績令同事認同。」她第一個重頭項目，就是為公司考取Q-mark 認證並建立規範化的 SOP (Standard Operation Procedure) 。她硬著頭皮，從前線 Sales、送貨、維修、聽投訴電話，到 CS、Marketing 同行政，逐個部門深入瞭解。「背後原來系父親嘅智慧，等我可以喺最短時間認識跨部門同事同前線實務。」這份踏實，讓她贏得了老臣子的尊重與信任。

Karen 細心檢視每件作品，注入對香港文化的熱情。

SPARKLE by KAREN CHAN 的華麗紅白藍經典系列

跨界藝術：無心插柳的「SPARKLE」傳奇

如果說德國寶是 Karen 的責任與根基，那麼 SPARKLE by KAREN CHAN就是她靈魂深處的夢想萌芽。這段時尚旅程起源於一次「貪靚」的無心插柳：「我純粹係一個貪靚嘅女仔，去領獎唔想同人撞衫，咪自己做塊布、做件型格嘅旗袍。」這件作品獲杭州絲綢博物館收藏展出，開啓了她的視野。她膽粗粗將香港元素與施華洛世奇水晶結合，製作出閃耀的時尚長衫，連香港國貨與藝術品龍頭「中藝」也對她的作品也青睞有加，成為她的第一個合作夥伴。她更連續 8 年登上香港時裝周 CENTRESTAGE 的舞台，今年更與香港文化博物館、香港歷史博物館和香港藝術館聯合策劃「博物館系列Museum Collection」，將三個館內藝術藏品及香港元素展品轉化為原創的「摩登長衫」及「新派唐裝」的時尚語言。「德國寶係實淨嘅嘢，而我而家做嘅係文化藝術嘅靈魂。」Karen 笑言：「喺香港做文化藝術好難，大部分人最後因為現實揀咗 Business。但我希望透過 SPARKLE 話畀大家知，傳統長衫同香港文化，一樣可以做得好時尚、好國際化。」

Karen換上自家品牌即模特兒附體，成為最佳生招牌。

信仰與心靈梳理：在忙碌與焦慮中尋找「信、望、愛」

身兼妻子、母親、女兒、家族企業高管，再加上香港優質標誌局 Q-Mark 主席、藝發局推廣委員會主席等公職，Karen 的日程表總是排得密不透風。Karen 笑著表示：「真係『上帝早有預備』！祂幫我 Plan 曬所有行程，排到 Perfect，完全冇撞。」但在多重身份之間切換，過程並非一帆風順。Karen 坦言初期自己也曾面對巨大的焦慮感，改變的轉捩點，源於信仰。「以前係靠自己硬撐，人哋一句說話就會影響自己情緒。但近呢幾年信仰幫我消化咗好多，幫我 Re-orient 咗我自己嘅中心。台上就一分鐘，台下就係默默背住人流淚……蝴蝶都要破繭而出，過程嘅痛苦冇人幫到你，只有你自己去成就自己。而家我學識祈禱同交托，遇有神助，係我近幾年最深刻嘅感悟。」

信仰成為心靈支柱，讓Karen在忙碌中學會祈禱與交托。

 

獨門育兒哲學：「快慢必」與「欲擒先縱」

談到家庭，面對已滿 16 歲、長得高過自己的兒子，Karen 笑言自己絕非外界以為的「虎媽」：「其實我係一個『林質質』（軟心腸）嘅媽媽。因為我根本唔夠時間去做『虎媽』，唯有退而求其次做佢嘅朋友，咁樣反而聽到佢心底話。」她笑稱以前教仔仔中文和數學時像「咆哮山莊掌門人」，後來決定「專業嘅人做專業嘅事」，把教學外判，自己則負責教人生觀、價值觀。對於家庭管教，她與丈夫更有著一套獨特的「快慢必」默契：「我係要快、唔可以慢嘅人；我先生就穩重啲。我長期囉嗦，阿仔已經左耳入右耳出；但我先生輕輕一個眼神，阿仔就知道要認真對待。」

Karen 回想初回公司，要為公司考取Q-mark 認證並建立規範化的 SOP ，壓力不少。

傳承與未來：從時尚品牌到跨界「Fashion IP」

面對過去外界給予的「大小姐」或「空降部隊」標籤，Karen 用「信、望、愛」三個詞形容自己的奇幻旅程：「『信』係對自己有信心，亦要信靠天主；『望』即使未知得唔得，仍以堅信去繼續做嘅盼望；『愛』係用 Passion 同愛去做所有嘢，去感染身邊嘅人、企業同社會。」
展望未來，Karen 表示 SPARKLE by KAREN CHAN 不會局限於單一服裝品牌，而是要轉化為一個充滿玩味與文化內涵的「Fashion IP」。除了即將在 PMQ（元創方）開設時裝與時尚生活雜貨店外，她更成功將 SPARKLE 的時尚元素融入德國寶的家電、家品、傢具及酒店主題房設計中。

Karen將時尚美學融入家電設計，擦出不一樣的火花。

「以前大家覺得家電同 Fashion 係風馬牛不相及，但而家我終於有機會將佢哋結合，擦出 Sparkle（火花）！」在啓德海景的映襯下，Karen Chan 用實幹與熱情，繼續在色彩斑斕的跨界舞台上，寫下屬於香港當代女性企業家最優雅、堅韌的篇章。

專訪後記：衝出國際

日前更傳來喜訊，Karen 憑 SPARKLE by KAREN CHAN在9月14日於紐約時裝周（Runway 7 主辦）榮獲「最佳國際時裝設計師獎」！能在全球時尚舞台摘下重磅榮譽，不僅是品牌發展的里程碑，更完美印證了她一直以來將香港傳品牌帶到世界各地、傾力「說好香港故事」的初心與宏願。

文: 見素

 

關於陳嘉賢教授（Prof. Karen Chan, JP）

商界職務：

• 德國寶集團及德國寶電商貿易有限公司執行董事 、SPARKLE by KAREN CHAN 創辦人兼設計總監。

學術/教席(部分)：

• 華盛頓大學雙學位、紐約大學教育碩士、香港中文大學市場學碩士、VTC 榮譽院士；浸會大學及恒生大學客席教授。

公職(部分)：

• 香港工業總會副主席兼香港傢具協會主席、香港優質標誌局(Qmark)主席、香港藝術發展局大會委員、香港藝術發展局藝術推廣委員會主席、THEi 高科院校董會成員 、香港南區女童軍分會會長、閃亮慈善基金創辦人、香港O2O電子商務總會創會會長。