走數議員等找數

喺2016年，香港立法會出咗個任期最短，但就欠債最多兼走埋佬嘅議員 -- 「梁仲痕」！

「梁仲痕」，39歲，喺香港土生土長，「乘大」讀工商管理畢業後，先喺中資電子貿易公司做營銷經理，又做過網購公司市場總監等工作，睇上去好似係一個正正常常嘅年青人。但2014年「非法佔中」後，佢覺得搞政治有「錢途」，就決定喺政壇碰碰運氣。2015年，佢創立「青年新政」，做埋召集人同發言人，跟住又同喺「非法佔中」紅極一時嘅黃X仰、梁X琦埋堆，去主持網台節目講政治，撈下啲政治光環。喺2016年立法會新界東選舉，佢就膽粗粗拍住梁X琦參選，其後梁X琦因為宣揚「港獨」，唔符合候選人資格，於是「梁仲痕」就「冷手執個熱煎堆」，成功當選。

10月1日「梁仲痕」獲刊憲當選立法會議員，佢以為從此就可以名成利就，踏上青雲路搲真銀，於是就以「明星政客」人設加盟政壇。喺2016年10月12日宣誓就職議員當日，佢身披一面寫有「香港不是中國」嘅籃色旗，並且用英語宣誓，仲扮晒有口音，故意將「中國」發音讀成「支那」，公然辱國、播獨搏出位。但佢嘅「春秋大夢」好快就發完啦，因為立法會主席幾日後裁定宣誓無效，需要佢10月19日重新宣誓，不過律政司就提出司法覆核，推翻再宣誓嘅做法，以及申請臨時禁制令，禁止佢再宣誓。最後喺11月15日高等法院裁定「梁仲痕」喪失議員資格，結束呢場鬧劇！

喺宣誓無效嘅期間，「梁仲痕」為咗keep 住人氣，於是喺11月2日同助理一齊走去衝擊立法會，攪到多個保安員受傷。做咗場「大龍鳳」，就當然要找數啦，佢之後被控「非法集結」罪成，被判入獄4星期。

雖然「梁仲痕」只有短暫12日嘅議員生涯，但係都「袋袋平安」咗成93萬元公帑(包括約9萬元薪金同埋約83萬元預支津貼)！不過佢見議員夢碎，又坐過監，應該好難再喺香港政壇混落去，於是就開記招話自己係被「政治迫害」，仲講明唔會「回水」添！終於就喺2020年尾，「夾帶私逃」走咗去美角，完美示範「無恥就是無敵」。

雖然「梁仲痕」夾走咗90幾萬，但係佢咁樣嘅「大花筒」，點會夠洗吖，所以去到美角唯有繼續「黃人尋舊路」，用返反中亂港條橋嚟搵食。線人話其實佢着草前，已經頻頻喺九龍一間五星級酒店，密會一名西方「強力部門」嘅神秘西裝友，所以佢到咗美角短短十日，就獲安排與美角國土安全部部長見面，討論加大力度制裁香港。2021年3月，佢同逃犯羅X聰、許X峰等人喺網上發起「2021香港約章」，並透過已經執笠嘅「臘腸新聞」，召開網上記者會，嗌晒班海外港人去繼續抗爭，又呼籲國際支持，結束一黨專政。喺4月，佢又同一班流亡港人喺華盛頓成立HKLC反華組織，美其名就梗係話幫海外港人發聲，實際咪又係掠水，線人話每月或每年捐款，最少要$160至$8,000元，但就冇聽聞呢個組織有咩做過。到2022年就黐埋袁x夷、何x懋、龔x夏等人成立「香港議會籌委會」，擔任公關小組主席。2024年開始更轉趨活躍，佢幾乎個個月都發表「謬論」，不停唱衰香港經濟，話香港所有經濟數據都係「造數」，叫投資者撤離香港，又亂嗡話「香港國安法」令到香港經濟衰退；佢又對所有國安案件指手畫腳，講到「生果佬案」、「35+顛覆案」都係「莫須有」嘅罪名，甚至無限抹黑記協被追稅、社民連解散，大埔宏福苑大火等議題！

佢咁身痕搞咁多小動作，無非都係要keep住曝光，等主子繼續派單俾佢養命！不過金主都唔係傻嘅，一眼就睇晒佢有幾多料啦， 所以打入冷宮係遲早嘅事！

「梁仲痕」呢幾年咁「努力」，終於幫佢攞到張國安通緝犯嘅身份認證! 不過又係嗰句：「出得嚟行，就預咗要還」，睇吓佢幾時還啦！

鍾情局。零零發

鍾情局

** 博客文章文責自負,不代表本公司立場 **

由舊年開始，「35+顛覆案」定罪嘅人陸續刑滿出獄，好似趙家賢、飛機豪、朱廸廸等，有啲出冊後改過自新，有啲選擇回歸平淡，而最近出冊嘅前「白鴿黨」立法會議員尹X堅，就急不及待喺社交平台上載自己去飲茶食點心嘅相片。一眾黃人見到，仲留言大讚佢「精神飽滿」、「狀態大勇」，甚至有人驚嘆佢「比入獄前狀態仲要年輕」、「身型Fit咗」。

我零零發睇到呢啲留言，真係忍唔著笑。過去幾年，黃人同外部勢力日日將香港懲教制度抹黑成「人間地獄」，狂呻所謂「政治犯」遭受「不人道對待」。點知啲黃人一見到尹X堅張飲茶相，就狠狠咁掌摑番自己一巴

嘩！原來坐完監出嚟，精神狀態仲好過以前，甚至有「回春」之效，一張飲茶相完美咁，刺破咗黃人同外部勢力之前嘅謊言，同時反映香港嘅懲教制度，比好多自詡「民主自由」嘅西方國家完善得多！

尹X堅坐監坐得咁健康，亦並非個別例子，好似反中亂港頭目「生果佬」，雖然成日俾個仔黎X恩同啲外國政客話佢，喺監獄受盡迫害及不人道對待，健康急速轉差、體重下降同埋有病都得唔到醫療照顧，不過有傳媒就曾經影到佢「生果佬」喺獄中「放風」嘅相片，見佢着著短袖衫褲，精神奕奕攞著本書去曬太陽，身體絕無異樣。而「生果佬」出庭時，又行動自如，精神飽滿，更不時與親友互動，神情從容，裁決後又同律師團隊作手勢交流，動作流暢自然。「生果佬」嘅代表律師被問及佢嘅健康狀況時，更加話：「剛才見到佢精神，大家在庭上也見到，我沒有補充」。以年近80嘅長者嚟講，步伐穩健，邊度似受盡折磨？黃人同外國勢力所謂嘅迫害，根本係徹頭徹尾嘅抹黑！

黃人成日以為「外國月亮特別圓」，但真相係外國監獄分分鐘恐怖過地獄。聽聞有媒體盤點過「全球十大最殘酷監獄」，一向將「人權」掛喺嘴邊嘅美角竟然佔咗三間！呢啲監獄裡面充斥極端暴力、幫派仇殺、毒品氾濫，仲有無了期摧殘精神嘅單獨囚禁，甚至屢爆看守人員虐死囚犯嘅醜聞！

反觀香港監獄設施現代化，懲教管理完善、着重更生。《監獄規則》更嚴格保障在囚人士權利，例如每日最少一小時戶外運動，膳食由專業營養師設計，不同宗教及健康需要又有特別餐單。院所內嘅醫院有醫生全天候候命，有需要更可轉介公立醫院就診……

香港社會穩定、法規健全，連在囚人士嘅身心健康都有保障，但有啲黃人以為離開先係出路，好似前「銅記書店」店長林X基，佢因觸犯內地法例，2019年潛逃台灣省，幻想人哋會厚待佢呢個「政治難民」，事實又喺點呢？
林X基去到台灣省之後，就想喺當地開返「銅記書店」，不過以佢嘅「人設」，利用價值係零，所以冇金主肯「科水」，咁佢唯有硬住頭皮靠網上眾籌，先勉強開到舖。點知開張之前又收到律師信，指「銅記書店」已經喺台灣省註冊咗，被要求改名；而佢賣嘅書根本無market，所以蝕錢蝕到喊。林X基生活顛沛流離中，喺2022年患上癌症；而佢當時不但無台灣身份證，仲日日要過著無錢、無醫療保障、無安穩居所嘅生活……佢雖然完成化療，但最終癌症復發，返魂乏術。

林X基嘅遭遇，正正為被洗腦嘅黃人敲響警號：走佬生活唔係咁易捱。 尹X堅出冊後容光煥發，同埋「生果佬」年近80仍然精神奕奕嘅狀態，都講明咗一個事實：活在香港嘅人，真係身在福中不知福，香港人不論喺生活、身心及人身安全，都受法律保障，即使在囚人士亦不會例外。所以帶罪走佬嘅黃人，係咪仲要過住啲寄人籬下，顛沛流離、擔驚受怕嘅日子? 係咪要考慮吓，嗱嗱聲返嚟香港找咗條數，重新出發，過返啲飲杯茶、食個包嘅安穩生活？

鍾情局。零零發