「亞懵」正傳

有個通緝犯一走咗佬去英倫之後，就好似患咗過渡活躍症咁，成日跳扎扎、呱呱叫……咁努力交足「功課」，都因為佢同其他「犯民」逃犯相比，知名度的確低少少，咁唯有爭取曝光率、搏表現、爭出位，提升個人嘅「利用價值」，希望長做長有，「水源」充足可以養家。

呢個「懵兆達」因為「煽動分裂國家罪」，被警方懸紅100萬港元通緝。 54歲嘅「亞懵」，喺香港讀中學嘅時候，就已經參加過學聯喺1990年杯葛中國獲得舉辦亞運會嘅行動；喺「沙田大學」做咗學生會外務副會長之後，佢嘅「反中」思想就越嚟越偏激，所以畢業之後冇搵工，就直接加入「職X盟」，到2012年做埋總幹事。《國安法》立法後，佢就先安排老婆同兩個女去英倫，喺2021年9月自己偷偷哋走埋之後，先至通知「職X盟」劈炮唔撈，你話「亞懵」鬼鼠到呢…… 而「職X盟」係2021年10月都摺埋。如果個組織只係正正當當專注勞工權益，冇勾結外國勢力去做反中亂港嘅嘢，用不着喺《國安法》出台就嗱嗱臨解散；如果「阿懵」冇做違法嘅嘢，就唔使急急腳走佬啦！

究竟「職X盟」係一個咩組織？高人話表面上係一個工會聯合組織，去團結唔同行業嘅工人去爭取權益，但實際上係利用勞工界，擴大動員網絡，將權益議題政治化，推動工會參與社會運動，向政府施壓，達到以港遏華嘅長遠目標。翻查資料發現，「職X盟」自1990年成立以來，長期接受同美角情報機構關係密切嘅「國家民主基金會 (NED) 」旗下嘅勞工組織，約1300萬港元捐款，聽聞啲錢係要用嚟推動所謂「民主運動」，而有部份更講明要用於推動「非法佔中」添！

「亞懵」到英倫之後，喺2022年4月就成立咗「香港勞權監察 (勞權) 」，繼續做所謂「爭取勞工權益」嘅代言人，佢聲稱「勞權」喺海外監察香港勞工權益嘅狀況，並透過研究、分析、倡議等工作，為香港勞工嘅聲音帶到國際咁話喎。但係「亞懵」身處9600公里以外嘅英倫，點樣可以監察香港勞工權益呢？

「職X盟」又煙消雲散埋，邊個組織可以駁腳幫「勞權」為香港嘅勞工階層發聲呢? 所以呢個「勞權」，其實可能都只不過係「海外版職X盟」，冇嘢做就寫吓報告、擺吓盤，有嘢嘅時候，就跳出嚟充當外國勢力嘅棋子，到處發表吓抹黑嘅言論咁囉！

收得人錢梗係要有KPI啦，所以為咗唱衰香港，「勞權」成立冇耐就出版刊物「國安法下的香港工會運動 : 威權統治的兩年」，大肆污名《國安法》，寫到香港變咗極權社會，又將維護國家安全必要採取嘅措施，抹黑成為打壓示威、公民組織、媒體等嘅強暴手段，仲話呢啲係對反修例示威者嘅報復行為咁話。之後「亞懵」又代表「勞權」，頻頻去歐洲多國發言，總之就不停咁講中國、香港政府的不是！

2022年6月，「亞懵」出席法國一個工會組織大會嘅時候，就發言鼓吹香港從國家分裂出去，喺尾段更加以廣東話大叫「港獨」口號: 「光復香港，時代革命」，喺法國唔聽法文，都要講英文啦，有邊個會知呢兩句噏乜？「亞懵」擺明唔係講俾現場參加者聽，而係特登講俾黃人聽、等黃媒報道、做show比金主睇㗎啦！

喺2025年4月，「亞懵」又聯同許X峰，鍾X華、鄭X傑等9個逃犯聯署俾英倫外交大臣，要佢哋制裁香港官員，又多次喺唔同社交平台，以及唔同地方舉辦嘅研討會，反對喺英倫起中國大使館、提議取消特區政府經貿辦同外交豁免權等等。佢呢啲仲唔係鼓動分裂國家，以及勾結外力去進行敵對國家嘅行為？

「亞懵」經常發表對特區政府嘅「高見」，好似記協主席鄭x如被「華x街日報」炒魷，律政司唔介入鄭x如嘅私人檢控僱主案件，都被佢扭曲成為政治決定，佢又污蔑「國安法」同香港司法制度、話警察利用「國安法」去濫捕「生果佬」、「黃痴瘋」、「AV仁」、「李x人」、「不幸彤」……相信大家都明白佢要keep住有曝光，有Air Time，不過佢最樣衰嘅，就係話自己離開咗香港，拋棄咗坐緊監嘅「犯民戰友」，感到內疚喎! 呢啲咁風涼、咁肉麻嘅說話，係佢先講得出！佢既然咁內疚，咪返嚟自首，同所謂「戰友」同倉同眠囉！

雖然「亞懵」要搵錢俾兩個女讀書啫，但都唔使咁搏，成日拋頭露面喎! 因為江湖傳聞話「職X盟」解散前最後一份嘅財務報告，應該有成2000萬港元資產，當時仲話會將啲錢分番俾啲屬會，但最後好似冇人知究竟去咗邊！而當年亦有其他屬會爆料，話「職X盟」連同其轄下擔保公司嘅資產，應該有6000萬港元先至啱！

如果係真，咁大筆錢最後去咗邊？會唔會有人走佬時夾帶私逃？不過「亞懵」而家佢咁勤力出show賺錢，唔通啲錢佢真係冇落袋？如果係咁，啲錢又去咗邊？

我零零發覺得「犯民」嘅錢一貫來歷不明，去向不清，永遠都係個謎！

鍾情局•零零發

鍾情局

** 博客文章文責自負,不代表本公司立場 **

最近有人話傳媒界有個新工會，叫「國際臨記怯會」。我零零發孤陋寡聞，完全冇聽過呢個組織，於是請教業界老best，佢即刻笑出聲，話呢個工會咪係由「記怯」演變出嚟囉！

原來「記怯」喺6月要搞執委會換屆選舉，而根據佢哋會章，最少要有五位會員報名參選，但因為唔夠人報名，所以搞唔成。於是而家嘅執委就決定加長提名期三個月，同埋無限期延長自己任期，直至選出新一屆執委。東拼西湊下，「記怯」終於搵到五條友湊夠數參選，喺上星期六就鬼鬼祟祟咁搞咗個所謂選舉，呢五個人就自動當選成為主席同理事囉。

咁究竟呢個小圈子選舉係乜嘢人參加呢？等我零零發同大家介紹吓：

「鄭X如」
成功連任嘅主席，佢自2024年7 月1日開始做「記怯」主席，而當時佢仲喺美角《華X街日報》嘅駐港記者，但上任主席17日，就被美角總公司「炒魷魚」。自此，佢就以「炒散」記者嘅身份，為不同外媒打工，過住手停口停嘅日子。「鄭X如」一向政治掛帥，唔放過任何機會唱衰香港。好似最近，稅局隨機抽樣調查發現「記怯」同幾個網媒欠稅，於是追討欠款，「鄭X如」就即刻跳出嚟話稅局「打壓新聞自由」，完美示範乜嘢叫賊喊捉賊。

「丹尼仔」
英籍「丹尼仔」早排都仲喺《英角廣播公司》做駐港記者，唔知點解喺7月就突然轉咗做「炒散」。佢做《英角廣播公司》果陣，好鍾意訪問「衣冠聰」、「黃痴瘋」呢啲亂港份子，不但幫佢哋宣傳，又不斷美化用暴力、攪亂香港。疫情期間，佢更用經過設計嘅引導性問題，採訪中國尼日利亞商會主席，將廣州嘅防疫措施抹黑成種族歧視，破壞中尼友誼！不過，2024年「丹尼仔」當選「記怯」理事之後就即刻唔撈，唔知玩邊科？今次唔知又會點呢？

「麥X庭」
作為《法角國際廣播電台》香港特約記者嘅「麥X庭」，佢做「記怯」會員多年，期間除咗推動亂港事務，仲有份編寫多本特刊及期刊，發表大量反政府同抹黑香港法治嘅言論。2019年黑暴時期，佢仲同「白頭李」、「李X人」及「衣冠聰」等反中亂港頭目，去美角游說外部勢力插手香港事務。

「包X哲」
呢位80幾歲瑞士籍嘅退休鐘錶工人，自稱喺「炒散」嘅攝記。佢最出名嗰單嘢就係2019年10月，一班暴徒喺中環搞搞震嘅時候，一名不認同暴徒行徑嘅男子諗住入大廈避難時，「包X哲」就故意阻住佢，又閂咗大廈玻璃門，令到嗰名男子被暴徒圍毆，行為認真無恥！

「蘇X揚」
現屆執委之一，淨係知佢喺「蚊型」網媒任職，冇乜料到，唔多人識。
近年「記怯」嘅執委會換屆選舉，已經多次傳出鬧劇。 喺2024年，當時有位同執委理念唔同嘅參選人，喺提名期最後一刻，被無理DQ。跟著又有兩個參選人，喺公布結果前想退選，但因為冇退選機制，被迫當選，之後就嗱嗱臨辭職。2025年嘅選舉，「記怯」除咗唔比傳媒採訪之外，又唔公開當選嘅執委名單。 而選完之後，同樣有一個當選執委之後，即時劈炮唔撈。呢啲彈出彈入，選完又唔撈嘅操作，唔知係為咗夾硬湊夠數搞選舉，定係要「黑箱作業」確保自己友順利當選？到今年，「記怯」更加連幾時搞換屆選舉，有乜參選人都唔公開，仲叫會員唔可以報導……如果唔係老best收到風，都冇人知佢哋搞咗場內定嘅選舉。

除咗選舉黑箱作業之外，「記怯」嘅財務情況都好吊詭。2025年有會員行駛會員權要求查賬，卻遇到諸多限制，於是向職工會登記局查閱「記怯」過去20年嘅帳目。一查之下，發現「記怯」每年平均嘅存款係3-400萬，但係唔知點解，喺2014同2019年竟然會有成900-1000萬嘅存款? 啲錢喺邊度嚟？用咗去邊？

「記怯」多年嚟以工會之名，行亂港之實，佢哋嘅惡行真係幾日都講唔完。「記怯」為咗可以苟延殘喘，就搵一班「炒散」、臭味相投，以亂港為樂嘅nobody出嚟參選，再透過唔知有幾多人投票嘅小圈子選舉，令佢哋成功當選。呢班國際臨「記」，真係可以代表本地業界？

鍾情局●零發發