如有雷同，實屬巧合

被國安處以「串謀勾結外力危害國安」罪名，懸紅100萬通緝+依法刊憲嘅指明潛逃者「攬炒迪」，最近自爆佢喺英角Wise開設嘅個人及商業戶口，以及《棱角》主要營運戶口，喺2026年8月3日被停用。據佢講，Wise只提及基於「內部政策」及銀行合作夥伴協議，所以要關閉佢嘅戶口。於是「攬炒迪」連同「香江監察」幾個跨黨派國會議員及上議院議員，就喊曬冤，將事件包裝成所謂「金融跨國鎮壓」!

首先，Wise絕非普通網上找換店。Wise 全名 Wise PLC (Public Limited Company) ，喺2011年成立，主要提供跨境匯款、多貨幣戶口及商業支付服務。截至2026財政年度，Wise約有1,900萬名活躍客戶，全年跨境交易額達2,430億美元。Wise亦係納斯達克指數及倫敦證券交易所掛牌，服務對象甚至包括摩根沏士丹利、渣打銀行等大型金融機構，現時市值約130億美元。根據一份國際研究報告《Research and Markets》指，Wise 喺全球市場佔有率係排第二，僅次於Western Union。而且根據Airwallex (國際金融科技平台)，Wise喺消費者市場中嘅透明度達到最高「黃金標準」，一般消費者對佢地信心十足。

Wise雖然唔係傳統銀行，但同樣受金融機構監管，需要履行客戶身分核實、資金來源審查、交易監察及反洗黑錢等法律責任。事實上，唔同國家同地區都有打擊洗黑錢嘅法例，金融機構一旦發現可疑交易、或者收到執法及司法機關命令，就有權限制交易、暫停服務甚至關閉戶口。而Wise作為受監管嘅西方金融機構，處理跨境匯款同商業支付，必須執行客戶審查、交易監察同反洗黑錢程序。一間咁具規模嘅國際金額上市公司，會唔會無端端攞自己聲譽同監管風險「較飛」?

「攬炒迪」以前成日無理要求制裁、截斷人哋資金鏈，今次輪到自己俾人「截水」，梗係質疑人哋背後有「政治考量」啦! 其實金融監管、風險控制制度，係應用於所有人同機構，所以無論掛住「民主」、「人權」定「賣國賊」嘅招牌，只要交易模式或合規風險出現問題，一樣要接受審查，係冇任何「政治特權」㗎！其實今次「攬炒迪」個人同公司戶口出事，又會唔會係啲資金來源、交易對象同資金流向有問題? 如果佢唔係「身有屎」，就應該攤開紀錄、交代帳目同資金用途，等全世界為佢評下理囉！

Anyaway，我零零發嘅水晶球顯示，喺不久嘅將來，「攬炒迪」就應該會嗌曬救命告急，跟住話啲錢凍結咗，要眾籌先可以繼續推行民主運動，需要各位「手足」嘅支持！其實橋唔怕舊，最緊要有人信！但前車可鑑，咁大家「科水」比佢(哋)嘅時候，就要自行判斷喇，因為「手足」死慳死抵嘅血汗錢，有可能跌咗落鹹水海、或者被私吞變成海外逃犯嘅享樂費！

好似之前「星期二得盜」兩個幕後玩家蔡X達同霍X誌，就曾經借中槍暴徒「健仔」嚟籌咗幾百萬。查實租架大飛幫人著草，頂多咪十萬八萬蚊，但佢哋都唔肯拎出嚟，最後仲「篤灰」將「健仔」交俾警察…連嗰少少都「食埋」，而家就喺外國飲紅酒食牛扒！

另外，袁X夷靠「反中」噱頭， 2021年喺美角孖住前國務卿蓬佩奧，搞咗場反中亂港講座，門票500美元（近4000港元），聽聞吸引2000人入場，「吸金」高達100萬美金（約8百萬港元），但最後冇人知啲錢去咗邊！

Last but not the least, 之前爆過「職X盟」時任總幹事「懵兆達」喺2021年9月辭任後潛逃英角，「職X盟」隨即解散，而當時「職X盟」嗰幾千萬資產，同時人間蒸發咗，點解讀呢？

最後我零零發想警告各位「手足」，如果金錢援助「指明潛逃者」，係有機會觸犯法例㗎！

以上情節絕非虛構，不過如有雷同，實屬巧合，請對號入座！

鍾情局•零零發

鍾情局

** 博客文章文責自負,不代表本公司立場 **

有個通緝犯一走咗佬去英倫之後，就好似患咗過渡活躍症咁，成日跳扎扎、呱呱叫……咁努力交足「功課」，都因為佢同其他「犯民」逃犯相比，知名度的確低少少，咁唯有爭取曝光率、搏表現、爭出位，提升個人嘅「利用價值」，希望長做長有，「水源」充足可以養家。

呢個「懵兆達」因為「煽動分裂國家罪」，被警方懸紅100萬港元通緝。 54歲嘅「亞懵」，喺香港讀中學嘅時候，就已經參加過學聯喺1990年杯葛中國獲得舉辦亞運會嘅行動；喺「沙田大學」做咗學生會外務副會長之後，佢嘅「反中」思想就越嚟越偏激，所以畢業之後冇搵工，就直接加入「職X盟」，到2012年做埋總幹事。《國安法》立法後，佢就先安排老婆同兩個女去英倫，喺2021年9月自己偷偷哋走埋之後，先至通知「職X盟」劈炮唔撈，你話「亞懵」鬼鼠到呢…… 而「職X盟」係2021年10月都摺埋。如果個組織只係正正當當專注勞工權益，冇勾結外國勢力去做反中亂港嘅嘢，用不着喺《國安法》出台就嗱嗱臨解散；如果「阿懵」冇做違法嘅嘢，就唔使急急腳走佬啦！

究竟「職X盟」係一個咩組織？高人話表面上係一個工會聯合組織，去團結唔同行業嘅工人去爭取權益，但實際上係利用勞工界，擴大動員網絡，將權益議題政治化，推動工會參與社會運動，向政府施壓，達到以港遏華嘅長遠目標。翻查資料發現，「職X盟」自1990年成立以來，長期接受同美角情報機構關係密切嘅「國家民主基金會 (NED) 」旗下嘅勞工組織，約1300萬港元捐款，聽聞啲錢係要用嚟推動所謂「民主運動」，而有部份更講明要用於推動「非法佔中」添！

「亞懵」到英倫之後，喺2022年4月就成立咗「香港勞權監察 (勞權) 」，繼續做所謂「爭取勞工權益」嘅代言人，佢聲稱「勞權」喺海外監察香港勞工權益嘅狀況，並透過研究、分析、倡議等工作，為香港勞工嘅聲音帶到國際咁話喎。但係「亞懵」身處9600公里以外嘅英倫，點樣可以監察香港勞工權益呢？

「職X盟」又煙消雲散埋，邊個組織可以駁腳幫「勞權」為香港嘅勞工階層發聲呢? 所以呢個「勞權」，其實可能都只不過係「海外版職X盟」，冇嘢做就寫吓報告、擺吓盤，有嘢嘅時候，就跳出嚟充當外國勢力嘅棋子，到處發表吓抹黑嘅言論咁囉！

收得人錢梗係要有KPI啦，所以為咗唱衰香港，「勞權」成立冇耐就出版刊物「國安法下的香港工會運動 : 威權統治的兩年」，大肆污名《國安法》，寫到香港變咗極權社會，又將維護國家安全必要採取嘅措施，抹黑成為打壓示威、公民組織、媒體等嘅強暴手段，仲話呢啲係對反修例示威者嘅報復行為咁話。之後「亞懵」又代表「勞權」，頻頻去歐洲多國發言，總之就不停咁講中國、香港政府的不是！

2022年6月，「亞懵」出席法國一個工會組織大會嘅時候，就發言鼓吹香港從國家分裂出去，喺尾段更加以廣東話大叫「港獨」口號: 「光復香港，時代革命」，喺法國唔聽法文，都要講英文啦，有邊個會知呢兩句噏乜？「亞懵」擺明唔係講俾現場參加者聽，而係特登講俾黃人聽、等黃媒報道、做show比金主睇㗎啦！

喺2025年4月，「亞懵」又聯同許X峰，鍾X華、鄭X傑等9個逃犯聯署俾英倫外交大臣，要佢哋制裁香港官員，又多次喺唔同社交平台，以及唔同地方舉辦嘅研討會，反對喺英倫起中國大使館、提議取消特區政府經貿辦同外交豁免權等等。佢呢啲仲唔係鼓動分裂國家，以及勾結外力去進行敵對國家嘅行為？

「亞懵」經常發表對特區政府嘅「高見」，好似記協主席鄭x如被「華x街日報」炒魷，律政司唔介入鄭x如嘅私人檢控僱主案件，都被佢扭曲成為政治決定，佢又污蔑「國安法」同香港司法制度、話警察利用「國安法」去濫捕「生果佬」、「黃痴瘋」、「AV仁」、「李x人」、「不幸彤」……相信大家都明白佢要keep住有曝光，有Air Time，不過佢最樣衰嘅，就係話自己離開咗香港，拋棄咗坐緊監嘅「犯民戰友」，感到內疚喎! 呢啲咁風涼、咁肉麻嘅說話，係佢先講得出！佢既然咁內疚，咪返嚟自首，同所謂「戰友」同倉同眠囉！

雖然「亞懵」要搵錢俾兩個女讀書啫，但都唔使咁搏，成日拋頭露面喎! 因為江湖傳聞話「職X盟」解散前最後一份嘅財務報告，應該有成2000萬港元資產，當時仲話會將啲錢分番俾啲屬會，但最後好似冇人知究竟去咗邊！而當年亦有其他屬會爆料，話「職X盟」連同其轄下擔保公司嘅資產，應該有6000萬港元先至啱！

如果係真，咁大筆錢最後去咗邊？會唔會有人走佬時夾帶私逃？不過「亞懵」而家佢咁勤力出show賺錢，唔通啲錢佢真係冇落袋？如果係咁，啲錢又去咗邊？

我零零發覺得「犯民」嘅錢一貫來歷不明，去向不清，永遠都係個謎！

鍾情局•零零發