請外傭最怕遇上「極品」，有網民分享外傭照顧家中狗隻的經歷，疑因對方懶得放狗，屋企竟累積約20篤狗屎，而僱主要求清理後，外傭更反過來指責「咁少事都要嘈」，甚至擅自決定放長假，令事主大感無奈。事件曝光掀起網民熱議，有人更擔心多隻狗交由對方照顧會有安全風險，慨嘆「畀錢買難受」。
示意圖片，非涉事外傭
事主在社交平台Threads以「工人姐姐」為題發帖，表示「尋晚返到屋企，4隻狗屙咗20篤屎」，心知不妙下翻查閉路電視，證實「真係冇放狗」。至翌日早上，事主質問外傭，對方直認「係，冇放」，並以「你話鬼節唔好出街」作為辯解。事主隨即反駁，指對方在鬼節期間明明「日日帶啲狗落街、行山，夜一夜都唔返屋企煮飯」，怒轟對方「宜家你講緊咩」，對其荒謬藉口感到極其無賴與勞氣。
示意圖片
示意圖片，非涉事外傭
更令事主氣憤的是，外傭竟反客為主發脾氣，大聲喝斥事主「你夠啦，我今日放假，咁少事你都要嘈，你平時成日好多要求，我都冇話過你」。事主直言「大佬，佢已經hea到乜」，並指對方平時「一日都唔使煮到一餐，淨係放狗、執屋，仲要都唔係真係好乾淨，我都冇嘈過佢」。事主最後向外傭下達通牒，表明如果想辭職就「俾一個月通知我，唔好喺度發神經」，並透露對方已「先斬後奏買咗機票放聖誕節假，逼我同意」。
示意圖片，非涉事狗
貼文引來網民熱議，大家一面倒力勸事主：「炒啦」、「直接賠錢炒」、「未經同意放假就係曠工啦，炒得」、「工人啲態度反應成個廢老公咁，咁多人質狗質喺佢手，最好換咗佢啦、「真係畀錢買難受」、「一係直接賠錢炒，一係和氣啲啦」。
