Ivy年度壓軸單曲《葬花辭》注入粵劇韻味 以古典造型演繹花落之美

樂壇女子組合COLLAR成員Ivy蘇雅琳，昨日（10月22日）推出本年度最後一首個人單曲《葬花辭》，今次歌曲同樣地由Ivy親自填詞，以苦戀為題，大玩古典風及小調式音樂。為配合曲風韻味，Ivy在MV大晒多個典雅造型，散發濃濃的女人味，還滲入粵劇元素，為童年曾接觸粵劇的Ivy勾起不少回憶。

COLLAR成員Ivy蘇雅琳推出年度最後一首個人單曲《葬花辭》，親自參與填詞，以苦戀為題大玩古典風及小調式音樂。

Ivy於本年度先後推出親自填詞的個人單曲《給你一隻大口仔》、《原地拖手》，來到第三首的《葬花辭》，她同樣參與填詞，「今次我都有份填詞，不過搵咗鄭敏老師幫手，因為今次比較高難度，第一次試古典啲、小調式音樂，所以想填出古典味重嘅詞。」歌曲關於一段苦戀，講述一個堅強女仔，愛上一個不應愛的人，最後就像葬花般淒慘，Ivy表示：「一聽到Demo時，好快就覺得首歌係講一段苦戀、一個遺憾，最後選擇用葬花呢個詞嚟貫穿成首歌。」

MV中她大晒多個典雅造型，散發濃濃女人味，更滲入粵劇元素，勾起她童年學粵劇的回憶。

Ivy童年時的粵劇造型。

預告明年單曲活潑風
提到新歌的最大挑戰，Ivy笑說：「遇到最大挑戰唔係我，而係梳化服團隊，因為要喺短時間之內襯出古典造型，真係好大挑戰。」MV中最令Ivy深刻一幕，莫過於滲入粵劇元素，「因為我細個學過粵劇，當初聽完首歌，都諗住用粵劇作故事部分題材，好開心導演喺MV畫面上加插粵劇元素，令我泛起好多兒時回憶。」

Ivy笑言新歌最大挑戰落在梳化服團隊，要在短時間內襯出古典造型。

《葬花辭》是Ivy本年最後一首推出的個人單曲，她希望來年會有更多不同風格的嘗試，「COLLAR試咗好多不同嘅快歌、跳舞，所以喺個人單曲上，我揀Demo時，會揀啲自己有興趣又未試過嘅曲風，而下年嘅Demo已經揀，比今年3首歌會較輕快啲，可以留意下年活潑啲嘅雅琳。」對於年底即將舉行的樂壇頒獎禮，Ivy對此未感緊張，「每次出歌都等於mid-term成績表，出歌後大家嘅反應、喜唔喜歡令我更在意，頒獎禮順其自然，大家喜歡我每首歌已經滿足。」

她透露明年已揀好Demo，曲風會比今年3首歌輕快，讓大家看到活潑一點的雅琳。

對於年底頒獎禮，她表示順其自然，大家喜歡每首歌已感滿足。

今年首度「單飛」出歌的樂壇女子組合COLLAR成員Candy王家晴，繼推出《直白》、《燈神》兩支以愛情為題的個人單曲後，昨日（10月22日）推出年度最後一首歌曲《連名字你都說錯》，並找來George歐鎮灝擔任MV男主角，新歌貫徹淒慘情歌風格，繼續以虐心愛情故事作牽引；而對於樂壇成績表即將年底派發，Candy對此冇有怕，皆因出Solo見證着自己心態成長及進步，已是最大得著。

COLLAR成員Candy王家晴今年首度單飛，繼《直白》、《燈神》後推出年度壓軸《連名字你都說錯》，再邀Wyman填詞，找來George歐鎮灝任MV男主角。

明年計劃出勵志歌
新歌《連名字你都說錯》，是Candy 3 首個人歌曲之中，最具故事性的作品，「今次再一次搵Wyman黃偉文填詞，當初收到Demo時，『連名字你都說錯』係其中一句歌詞，Wyman一聽到，佢已經諗到成個故事起承轉合，佢話好想引用番呢句做故事主題；而故事中同男主角，一切嘅曖昧、所有嘢原來都係我一廂情願，起初我以為大家一見鍾情，但最後人哋連我個名都唔記得，所有嘢都係自己幻想。」

故事講述曖昧原來一廂情願，對方連名字都記錯，貫徹虐心風格。

提到本年3首作品均以虐心愛情為題，Candy自言喜歡唱慘情歌，「唱歌嘅話，我鍾意唱虐心嘅歌，唱嘅時候幾有feel。今年想貫徹統一一個形象。」不過連續3首慘情歌，Candy笑指發現「問題」，她說：「最近發現出太多慘情歌唔好嘅位，就係嚟緊公司有好多school tour，我覺得唔係好啱feel，對住一班學生應該要唱啲好開心或激勵嘅歌，但我3首全部都係慘情歌，就係因為咁，下年我諗住出首開心啲嘅歌，又或者勵志歌都可以，其實我自己作為聽眾，我好鍾意Winka啲勵志歌。」

Candy自言喜歡唱慘情歌，但笑言連續3首慘情歌令校園騷唔啱feel，計劃明年推出開心或勵志作品。

MV中與George有頭碰頭親密動作，她直言唔尷尬：「尺度幼稚園都不如。」

對獎項未有諗法
而MV拍攝期間，Candy與男主角George難免有些頭碰頭等親密動作，而向來「怕生保」的Candy自言不感尷尬，她表示：「BB班MV拍攝，都冇乜身體接觸，尺度嚟講幼稚園都不如，同埋好彩同George啱啱合作拍緊劇，所以要埋位嘅時候唔需要熱身。」Candy透露聽完MV故事後，她第一直覺需要一個高冷及神秘感嘅男主角，剛巧她跟George合作拍劇，認為對方非常合適，「佢眼神好識演戲、好charm，當要拍啲畀佢眼神『電』到嘅鏡頭，我完全feel到點解喺MV度，我會有錯覺佢係鍾意我。」

Candy大讚George眼神識做戲、好charm。

即將踏入年底，又是樂壇各大頒獎禮派發成績表的時候，問到Candy心情可有緊張？她謂：「冇緊張，冇特別心情，今年有好多女新人，有好多都係《全民造星IV》已認識，見證大家一齊成長同奮鬥，所以我對獎項冇太多諗法；出Solo最大成長係心態，而家自己唱歌、做訪問都冇以前咁『騰雞』見到自己呢一年成長同進步，反而更開心。媽咪心情會唔會緊張過我？媽咪從來都唔會畀獎項嘅壓力我，只要我開心就好，如果我冇獎，可能媽咪頒另類獎畀我，喺我好忙嘅時候，媽咪煮飯我食，就係我忙碌完嘅獎品。」

談到年底頒獎禮，她表示冇緊張，最大得着是心態成長。