黃色掠水局 鋪鋪都咁伏

仲有一個月就到12月嘅傳統零售旺季，預計好多商家店舖會推出優惠吸引顧客，相信好多朋友亦唔介意到時使多少少。但我零零發想提醒各位，幫襯之前一定要睇清睇楚，一時唔小心幫襯咗「黃色經濟圈」，隨時貼錢買難受，如果一個唔覺意資助咗佢哋，仲隨時惹官非。

乜嘢係「黃色經濟圈」？其實就係黑暴時期由黃人以政治取態區分嘅經濟活動，簡單嚟講係「肥水不流別人田」、「黃人光顧黃店」，令相同政治信念嘅「自己人」賺錢。不過有部分黃商人一邊做生意，一邊潛移默化宣揚反中亂港、甚或「港獨」訊息，令「黃色經濟圈」成為分化社會、增加對立及煽動仇恨情緒嘅一種「軟對抗」。

上個月，警方以涉嫌「出於煽動意圖作出具煽動意圖的作為」罪，拉咗兩個喺「黃色經濟圈」搵食嘅亂港份子。呢一男一女，分別係黃XX同埋佢個女性朋友。零零發個政界老best話，黃XX喺黑暴時期搞咗個社交媒體專頁專sell保險，唸著借「黑暴」光環賺錢，有人認為有食「黃色經濟圈」條水，掠「手足」一筆之嫌。

黃XX本身有保險中介人牌照，但就搵咗一個冇保險中介人牌照嘅女性朋友，一齊做專頁管理員。專頁經常透過帖文，暗示由黃人營運，又經常宣傳不同黃店同「黃色經濟圈」手機Apps「懲罰May」，借「黑暴」光環經營，吸引「手足」幫襯。

嗰專頁有咩問題？我零零發問過個保險界老best，佢就話根據《保險業條例》，任何人從事銷售保險、或者就保險合約提出申請或作出建議等受規管嘅活動，必須持有相關牌照。可能為咗掩飾友人冇相關牌照，嗰個專頁好似黑箱作業咁，完全冇講由乜人營運、有冇相關保險牌、同埋收幾多錢，所有嘢都要聯絡咗佢，佢先會私底下再慢慢同你傾，一啲都唔透明。老best仲話，由無牌人士經手嘅保單，投保人嘅利益未必得到保障，claim錢出現問題嗰陣，更加係追究無門，損失慘重。如果有「手足」經嗰個專頁購買保險，真係要自求多福。
個專頁除咗推銷保險之外，仲有好多支持黑暴、抹黑中央及特區政府，同宣揚「港獨」嘅帖文。《香港國安法》生效後，舊嘅煽動帖文仲繼續保留喺度，新嘅就用「#Hashtag」、「藏頭詩」等較為隱晦嘅方式發表，企圖繼續潛移默化荼毒社會大眾。好彩警方將佢哋拘捕，如果唔係，又唔知有幾多人不知不覺間被佢洗咗腦。大家千奇唔好以為今次黃人sell保險係個別事件，被DQ嘅前區議員朱x瑋，喺2023年就曾經因無相關牌照推銷MPF而被捕。

事實上，嗰啲人唔知係咪顧著搞煽動同掠水，忘記咗做生意最基本嘅操守，好多「黃色經濟圈」嘅店舖都被指質量有問題。呢班黃商人諗著食「黑暴」水搵錢，搏懵搞唔同嘅生意掠水，貼隻當年黃人icon嘅豬頭貼紙係門口，吸引「手足」幫襯，但提供嘅商品同服務就非常參差。

有網民就曾話，「光X冰室」係sell理念，唔係sell質素，揶揄「黄店出品屎都要食！」；「黃偽人」杜X澤亦曾話「龍X冰店」嘅食物質素「好X大鑊！」仲有啲黃店直頭連法規都唔跟，好似由朱X瑋創辦嘅「餘X」網購平台，自去年起因售賣未有適當加上標籤嘅食品，被食環署票控多達9項罪名；「光X冰室」九龍灣店多年嚟無牌經營，喺2025年被法庭頒令封舖；「膳X小館」喺2024年因無牌製造月餅被票控；「光X米線」就因為冇食物製造廠牌照製造食物被票控，同埋違反地契條款而被要求結業。大家又估吓有冇「手足」食過黃店食物之後肚痛呢？

除咗飲食，有啲黃人又透過營運書店搞「軟對抗」，佢哋表面sell啲好似係推廣本土情懷、本地研究嘅書，實際都係一啲反政府、宣揚「抗爭」嘅刊物。今年3月到7月期間，警方就分別拉咗多間出售呢啲煽動性刊物嘅負責人，包括「一權書館」、「田完書屋」及「樓下書舍」等書店。

所有以上事件都證明，「黃色經濟圈」只係黃商人用嚟宣揚反政府訊息同呃錢嘅「掠水局」，對消費者利益保障成疑。搞到咁烏煙瘴氣，就連黃店「阿X泰」創辦人都忍唔著喺2023年講句「黃色經濟圈就是一個錯誤的示範」，宣佈同「黃色經濟圈」割蓆！

除咗「黃色經濟圈」，黃人又經常用「支援同路人」、「抗爭」等為藉口，向「手足」進行情緒勒索，呼籲「課金」，但啲錢去咗邊？好似「A小妹妹」騙案咁，奀星阮X安虛構一個被控暴動罪嘅19歲「A小妹妹」出嚟，去勒索「手足」嘅同情心，發起眾籌掠咗逾165萬。奀星之後拎咗100萬去豪賭；其餘嘅就俾佢老婆用嚟去歐洲旅行shopping。

再講近啲，早前因參與「悼念騷」搞煽動被捕嘅「爆炸頭」，最近都話自己所有銀行戶口被凍結，叫「手足」改去Patreon「課金」比佢。冇錯，又係Patreon。其實不少亂港分子，都鍾意用Patreon呢類平台搞眾籌同收取外國嘅政治酬庸。國安通緝犯許至瘋曾以檢控警方為名，眾籌逾350萬訴訟費，但就被人揭發佢私相授受，將當中113萬比咗代表佢嘅前「白鴿黨」黨友楊X然。到許至瘋走佬嗰日，佢都無交待另外嗰200幾萬去咗邊；去到外國佢仲喺Patreon開戶口，以「國際倡議」、「游說」等為名呼籲「課金」。高院喺2025年頒令充公許至瘋夫婦同佢母親嘅香港財產時，更估計其Patreon收入可達1200萬。嘩！成千萬，用咗去邊呢？ 你問零零發，如果警方採取行動拉幕後金主嗰陣，捐過錢嘅朋友會唔會因為曾經資助他人進行危害國安活動而惹官非，我真係唔夠膽講。但零零發就記得多名營運「懲罰May」嘅前「香港X志」成員同埋另外4名男女港人，就曾經因為支援國安通緝犯衣冠聰同許至瘋，喺2023年被警方拘捕。

我零零發呼籲大家唔好幫襯「黃色經濟圈」，提防反中亂港分子借「軟對抗」宣揚虛假及煽動性訊息之餘，亦要小心唔好資助「指明潛逃者」，否則隨時中伏變成資助危害國安活動！

鍾情局。零零發

鍾情局

** 博客文章文責自負,不代表本公司立場 **

仲有兩個星期就係「哈、囉、喂！」，但係有班友喺兩個月前嘅8月31日，已經搞咗場嘩鬼「悼念騷」，演員都係嗰班熟口熟面嘅黃人、道具係花束蠟燭黃傘。問題係，呢套「悼念騷」早就俾事實拆穿，所有官方數據、片段全部攤晒出嚟，連所謂嘅「死者」都「生勾勾」現身講到明自己安然無恙，證實所謂「8.31事件」根本係無中生有嘅假新聞。但黃人唔理，因為對佢哋嚟講只要仲有人睇直播、仲有利用價值，呢個「悼念騷」就要年年上演。

今年亦都唔例外，黃人照舊出動，喺太子站外排晒花束蠟燭，擺好個「陣」；中間企滿黑衣人士，負責做「茄喱啡」；最前面就搵啲骨幹黃人出嚟演主角，有啲皺眉、有啲落淚、有啲握拳，配合住高分貝口號。再加上一班自稱所謂「記者」或者「網媒」嘅人，你拍我、我拍你，對住鏡頭不斷炒作謊言，一班人圍住一個謊言做戲。

演員全部係「老戲骨」，當中就包括「煽暴」牙E李X姿同埋反政府網媒記者鄧X榮(又名爆炸頭)。先講李X姿，佢係反對派組織「社民連」出身，多年嚟沉迷街頭示威同反政府活動多過專心睇牙，成日喺街度煽仇煽暴、散播顛覆信息，搞到社區烏煙瘴氣。有市民早就投訴佢根本唔似一個專業人士，每逢「大時大節」就走出來，反而似政客多一啲。

當年黑暴期間，李X姿同一班「黃醫」走出嚟簽咩「人道危機」聲明，亂咁抹黑警方執法。《香港國安法》生效之後，李X姿都係冥頑不靈，仲成日孭住條印住「XX必亡」嘅煽暴絲巾周圍晃，佢見到人唔理係病人或普通人，都口口聲聲叫人「要反抗」。《香港國安法》都生效咗6年，佢每逢乜嘢紀念日仲到處晃，結果俾人炒魷，冇大機構夠膽再請佢，佢專業水平如何，大家自己諗啦。更離譜係，佢好似嗰啲所謂「送車師」、「旁聽師」咁，在審理黑暴案件的法庭外，企定定做政治騷，令人不禁質疑佢係咪想向法庭施壓。講專業？佢一啲都唔似專業牙醫，似十足專業政客，搞壞晒真正醫療界人士的名聲。在《香港牙醫專業守則》導言中講明，香港牙醫管理委員會要「致力保障市民的權益和建立公眾對牙醫專業的信心」。唔知李X姿這些激進行為，有無建立公眾對牙醫專業的信心呢?

而另一名「老戲骨」爆炸頭，佢一向以極度偏頗嘅角度講政治，不斷煽風點火、刻意挑起對立情緒，分化社會。喺「8.31事件」、「梁凌杰逝世」、「周梓樂逝世」呢啲黑暴敏感日子，有人經常現身，表面話自己做「採訪」，實際就喺現場阻礙警方執法，再喺頻道開直播，利用網絡散播煽動訊息，企圖喚起黑暴記憶、煽動仇警及反政府情緒。

2020年開始，有人開咗間公司，喺多個社交平台營運，仲刻意開Patreon收月費，打正旗號話「支持同路人」、睇採訪片同日常生活vlog，表面就話係俾「同路人」支持創作，係咪想收來歷不明嘅「黑金」呢？咁就可以長期俾錢佢搞對抗、繼續煽仇煽暴。喺度都要提醒公眾一句，千萬唔好隨便資助呢啲可疑平台，唔單止俾人當水魚「掠水」，如果資金最終被指用作支援違法活動俾錢啲「指明潛逃者」，仲有機會觸犯法例、自找麻煩。

成場「悼念騷」入面，零零發最擔心嘅，其實係企喺人群邊緣嘅一批學生同年輕人。可能佢地咁啱路過，見到有人攝影、有人直播、有人喊口號，就好奇停低兩步，點知俾人拉入人群，叫佢「一齊支持」、「一齊見證」，慢慢變成背景板；再加上有人不斷喺佢哋耳邊重複：「真相被掩蓋」、「官方唔可信」，企圖對呢班心智未成熟嘅年輕人洗腦，為下一輪政治操弄播種。最慘嘅係，呢啲年輕人未必知道，自己實際係俾人利用做臨記，幫謊言製造新一輪「畫面」。

近日亦有例子擺喺眼前，早前就有一間中學嘅學生會候選內閣，被揭發竟然搵咗一個以精神病患者為噱頭命名嘅網絡聯盟幫手拍片拉票。表面話係創意合作，但明眼人一睇就知呢個網絡聯盟劣跡斑斑，當中有人涉嫌寄刀片去公營機構、學校恐嚇，而被警方拘捕；亦有成員因刑毀黃家駒墓碑而被判囚。面對呢啲違法違規嘅問題人物，年紀輕輕嘅學生哥一個唔覺意，就好容易俾啲極端組織吸引，甚至一步步被這些組織游說加入，踩入不法行為嘅危險地帶。

上一篇文都提過，最近因「串謀分裂國家」罪成入獄嘅前「建國聯」成員陳X森，喺獄中寫血書踢爆「姜+偉」真面目，事前打住「追求公義」、「手足團結」嘅旗號，點知「手足」出事俾人拉，主事人轉頭就當冇見過，用完即棄，冷血至極。呢啲就係黃人嘅一貫卑劣手法，專門揀心智未成熟嘅後生仔女上前線違法送死，自己就企後面收割名利，永遠都係「叫人衝、自己鬆」咁食人血饅頭。

其實，唔同嘅政府部門，包括警方，消防及醫管局都講咗N次，有幾多傷者、幾多人被送院、有咩紀錄，全部有根有據，多間主流媒體亦從未報道有任何人死亡。至於黃人口中嗰位「死者」，其實係喺英國定居嘅港人王X俊，之前更加喺英國現身說法，證明自己仲係龍精虎猛。換句話講，「8.31事件」完全係無中生有嘅假新聞。

照道理，正常人都會認真檢討一下自己係咪被人誤導，甚至為自己曾經散播嘅謠言感到後悔。可惜黃人從來唔會認錯，仲將呢場「悼念騷」年年重演，死都要撐落去。因為對佢哋嚟講，真相早就唔重要，重要嘅係可以繼續博取公眾眼球、吸曝光、刷政治存在感，將自己包裝成受害者。

更荒誕嘅係，呢套「悼念騷」，唔單止係本地上演，已經發展到國際。本地黃人負責提供現場煽動畫面，海外反中亂港分子就接力，將呢啲畫面剪接成所謂「香港人權記錄」，再配上各種煽情英文字幕作包裝。外國政客就擺出一副「關心香港」嘅樣板姿態。只要「悼念騷」仲有得演，少數黃人就可以繼續向「外國主子」搖尾乞憐，大大聲話「你睇，我哋仲喺香港搞搞震架。」，睇吓可唔可以換多啲打賞。

假新聞絕對唔係小事，2019年黑暴完全就係因為網上不斷瘋傳嘅假新聞而發生。黑暴帶畀香港係實實在在嘅破壞，85個地鐵站被破壞、740組交通燈被打砸、街頭被堵塞、普通市民被圍毆放火燒傷，經濟民生深受衝擊，國際形象嚴重受損。

今日香港好唔容易由動盪中走返出嚟，社會逐步回復穩定，市民係想正常生活、向前行。但偏偏就有一小撮黃人死心不息，搞所謂「8.31」根本係一場圍繞假新聞嘅政治「悼念騷」。所以，香港人唔好覺得唔關我哋事，反中亂講分子做嘅所有嘢，背後都係靠害香港人，我哋要感激國安處嘅果斷行動，否則就會俾呢班各懷鬼胎、X卡聯盟攬住一齊墮落深淵。

鍾情局‧零零發