一名港男與太太到日本福岡旅行，買完免稅品竟忘記取回護照，結果錯過登機時間，最終需要多花超過7,000元買機票兼訂酒店。事主事後發文大呻，不過就完全未有怪責太太，而是批評日本店員「好唔專業」，指對方沒有主動歸還護照。然後帖文一出即惹來網民圍攻，紛紛問事主：「自己嘅護照都唔識保管，怪得邊個？」更有網民爆笑指其「唔敢怪老婆，所以怪店員」
福岡。網上圖片
福岡。網上圖片
該名港男在Threads發文，講述與太太在福岡旅遊的遭遇。他指太太在市區選購免稅商品後，「唔記得同店員取回護照」，夫妻二人亦一直未有察覺，直至抵達福岡機場辦理登機手續，才發覺證件不在身上。
示意圖片
二人隨即由機場折返，前往位於天神的店舖取回護照，然而當兩人再度回到機場時已錯過時限，「航空公司話已經太遲唔畀check in」，最後要被迫滯留當地，「最後要買第二日的機票和訂即晚酒店，使多七千幾蚊......」，損失慘重。
《愛回家》劇照，示意圖片
事主在帖文中極力維護太太：「我又唔係好責怪太太，反而日本的商店職員好多都沒有主動將護照還給客人的習慣，一味只顧包裝和收錢。我們離開咗櫃枱都唔職（識）呼叫我哋取回護照，好唔專業。」他又透露，「我自己都做服務行業，經常接觸客人證件，我好小心一定盡快將證件歸還俾客，因為證件真係好重要。唔可以輕視。」
帖文曝光引來網民熱議，不過大部分網民認為，妥善保管旅遊證件是旅客本身的責任，指反而是是事主推卸責任：「幫大家做個總結，我好大方同埋錯嘅一定係人哋」、「完美演繹痾屎唔出賴地硬」、「西客最大特徵：本末倒置」、「你唔出現係日本咪冇事」、「你做服務業咁小心，但做遊客唔小心」、「你話『因為證件真係好重要。唔可以輕視。』你老婆連自己個證件都可以輕視，你反而怪陌生人輕視你哋嘅證件？！」、「自己嘅嘢唔保管好仲要將責任推卸俾日本店員？嘢就識買，證件唔識自己袋好？怪自己好過怪其他人啦！你兩個係做人嚟（呢）方面都唔係好專業。」
還有網民針對其「寵妻」態度留言：「放心啦，你老婆做錯乜都好，最後一定會願（原）諒你」、「你係唔敢怪老婆，先推哂個波落店員度」、「其實成件事最應該怪嘅係你自己，冇提到你太太記得要拎返護照」。
