美角一手培植嘅「星級代理人」而家當Condom？

由細犯案到大嘅「黃痴瘋」上周四因「串謀勾結外國勢力危害國家安全」罪成被判囚10年。法官判刑時講到明話「黃痴瘋」同「衣冠聰」係案中「主腦」，係勾結外國勢力呼籲對中國同香港實施制裁嘅「最前沿倡議者」，屬「罪行重大」，法官以13年做量刑起點，認罪扣減3年，「黃痴瘋」最終被判囚10年。

同案主腦「衣冠聰」喺《國安法》生效前一早著草走佬，喺海外風流快活，賴低「黃痴瘋」喺香港坐監，有人問，明明「黃痴瘋」當年就係美角一手培植嘅「星級代理人」，點解美角竟然唔出手救佢？

其實早前已經有兩個美角記者出書大爆美角拒救「黃痴瘋」嘅內幕。原來「黃痴瘋」喺《國安法》生效前夕好驚、想著草，但佢當時因為包圍警總案被控煽惑非法集結等罪，俾法庭扣起護照，無得離港。「黃痴瘋」於是向美角主子求助，要求進入美角駐港總領事館接受庇護，但美角佬就睬佢都傻，求其安排喺美領館對面嘅商業大廈同佢見下面打發佢。

被拒之門外，「黃痴瘋」唯有再試其他辦法，當時身在美角嘅前「香港X志」常委「敖X軒」，就以「黃痴瘋」嘅名義發電郵畀時任美角國務卿「蓬X奧」，正式提出政治庇護要求。「蓬X奧」隨即召集6個高級官員開會，嗱，呢啲咪「黃痴瘋」同美角勾連有幾深嘅鐵證囉！即刻開會喎！經商討後，美角認為救「黃痴瘋」對美角根本無著數，決定棄卒。「黃痴瘋」就係咁由美角嘅「星級代理人」，淪為被用完即棄嘅「Condom」。

事實上，被美西方當「Condom」嘅，又點止「黃痴瘋」一個？仲有千千萬萬誤信美西方會為佢地提供「保護傘」嘅黑暴「手足」！佢地以為做咗反中亂港嘅嘢唔緊要，離開香港有美西方收留佢地做一等公民，點知近半年來，美角、英角、楓葉角相繼收緊移民政策、對「手足」落閘，搞到海外「手足」人心惶惶。

早前美媒報道，自今年六月以來，美角移民及海關執法局（ICE）喺美角多個機場，拘留至少12個持「延期強制離境」（DED）身份留美嘅港人。有被捕港人話俾ICE人員逼簽「自願離境」文件，威脅如果唔簽就要坐幾個月監；各人後來雖然獲法院釋放，但就要戴電子腳鐐，活動範圍受限制，人身自由被嚴格監控。

有人話DED明明出年2月先到期，有乜理由提前拉人！但美角國土安全部就回應，話DED只係工作許可，唔賦予合法居留身份，當局隨時可以啟動遣返。有「手足」更發現美角一間大學嘅研究資料顯示，原來今年1至8月一共有38個港人被ICE拘留。

事件喺留美「手足」社群引發恐慌，有DED「手足」話ICE人員成日喺佢屋企附近出現，搞到佢連續幾個禮拜都唔敢出街，但更令佢哋擔心嘅，係美角政界傳出消息，話DED出年2月到期後就無得再續。

其實過橋抽板又點止美角呢？仲有楓葉角同英角。楓葉角聲稱為港人而設嘅「救生艇」計劃喺今年8月已經宣佈結束，個計劃收咗三萬幾份申請，涉及人數超過四萬，但就只係批咗八千幾份申請，佔比三成都無，有成三萬人仲未獲批，前路茫茫。有移加港人形容自己半天吊，喺當地淪為「廉價勞工」，又唔知等幾耐先有個身份。

英角嗰邊，上星期又公佈新嘅收緊移民政策方案，正規移民申請永居原本住夠5年就得，依家就要10年；但如果係做醫護或者教師，就可以5年搞掂；年薪有12.5萬鎊嘅高薪一族更加3年就搞掂；至於違規或者非法入境就要等20至30年。

班移英「手足」喺方案公佈前聽到風聲話5年變10年，淨係有錢人同醫護教師先可以維持5年，就鬧爆話咁同投資移民、專業技術移民有乜分別？驚左一大輪，最後英角公佈話BNO「5+1」年獲永居維持不變，但班移英港人都話英角佬其實態度曖昧，話就話「5+1」唔變，但其實加咗好多魔鬼細節，新增嘅四大永居條件BNO無得豁免，包括無犯罪紀錄、英文達A-Level水平、無欠稅、同持續供國民保險，有案底嘅「手足」同英文唔掂嘅「手足」，睇怕都無得留低。

其實英角自舊年7月工黨政府上台後，最少有12個因2019年黑暴被香港法庭定罪判囚嘅港人，申請BNO簽證時被英角內政部拒絕，拒簽信仲引用香港法庭判詞，話佢哋喺香港嘅犯罪行為，喺英角同屬違法，所以不獲批。明眼人一睇就知，現屆英政府根本就想同黑暴分子割蓆，唔歡迎呢啲會威脅社會治安嘅暴徒喺英角居留。

美角、英角、楓葉角齊齊對「手足」落閘，再次反映美西方從來只當佢地係棋子，無利用價值仲點會繼續幫你？美角就最狠，連「黃痴瘋」呢個一手培植嘅「星級代理人」都照當做「Condom」，對留美「手足」仲狠到又拉又鎖、又電子腳鐐、又話隨時將你驅逐出境，睇嚟依家班「手足」終於睇清楚美西方虛偽嘅真面目。我零零發就覺得，好彩當年班反中亂港分子搞顛覆、搞攬炒無得逞，惡夢無變成真，如果唔係香港就有排亂，依家班反中亂港「手足」喺外國就做「Condom」，而我地香港就由治及興、背靠祖國、安定繁榮。

下星期深圳將會舉行APEC領導人會議，多國領導人都會親自出席，包括美角「侵侵」都話會去。逢親中國搞呢啲國際盛事，班竄逃海外嘅反中亂港分子，都會出嚟大肆污衊抹黑，計我話，今次佢哋一定會繼續消費「黃痴瘋」呢個「Condom」判囚嚟抹黑叫囂，將呢個「Condom」嘅最後一滴剩餘政治價值都榨乾榨淨嚟博取美西反華主子打賞。月尾仲有首次在港主辦嘅國際刑警組織全體大會，預計會有過千個來自196個成員國嘅警隊一哥同高層出席，身為香港人無比光榮， 但班國安逃犯就肯定唔happy又會跳晒出嚟單單打打妖言惑眾，無辦法，呢排大家等睇班白卡聯盟表演馬騮戲！

鍾情局●零零發

鍾情局

** 博客文章文責自負,不代表本公司立場 **

仲有一個月就到12月嘅傳統零售旺季，預計好多商家店舖會推出優惠吸引顧客，相信好多朋友亦唔介意到時使多少少。但我零零發想提醒各位，幫襯之前一定要睇清睇楚，一時唔小心幫襯咗「黃色經濟圈」，隨時貼錢買難受，如果一個唔覺意資助咗佢哋，仲隨時惹官非。

乜嘢係「黃色經濟圈」？其實就係黑暴時期由黃人以政治取態區分嘅經濟活動，簡單嚟講係「肥水不流別人田」、「黃人光顧黃店」，令相同政治信念嘅「自己人」賺錢。不過有部分黃商人一邊做生意，一邊潛移默化宣揚反中亂港、甚或「港獨」訊息，令「黃色經濟圈」成為分化社會、增加對立及煽動仇恨情緒嘅一種「軟對抗」。

上個月，警方以涉嫌「出於煽動意圖作出具煽動意圖的作為」罪，拉咗兩個喺「黃色經濟圈」搵食嘅亂港份子。呢一男一女，分別係黃XX同埋佢個女性朋友。零零發個政界老best話，黃XX喺黑暴時期搞咗個社交媒體專頁專sell保險，唸著借「黑暴」光環賺錢，有人認為有食「黃色經濟圈」條水，掠「手足」一筆之嫌。

黃XX本身有保險中介人牌照，但就搵咗一個冇保險中介人牌照嘅女性朋友，一齊做專頁管理員。專頁經常透過帖文，暗示由黃人營運，又經常宣傳不同黃店同「黃色經濟圈」手機Apps「懲罰May」，借「黑暴」光環經營，吸引「手足」幫襯。

嗰專頁有咩問題？我零零發問過個保險界老best，佢就話根據《保險業條例》，任何人從事銷售保險、或者就保險合約提出申請或作出建議等受規管嘅活動，必須持有相關牌照。可能為咗掩飾友人冇相關牌照，嗰個專頁好似黑箱作業咁，完全冇講由乜人營運、有冇相關保險牌、同埋收幾多錢，所有嘢都要聯絡咗佢，佢先會私底下再慢慢同你傾，一啲都唔透明。老best仲話，由無牌人士經手嘅保單，投保人嘅利益未必得到保障，claim錢出現問題嗰陣，更加係追究無門，損失慘重。如果有「手足」經嗰個專頁購買保險，真係要自求多福。
個專頁除咗推銷保險之外，仲有好多支持黑暴、抹黑中央及特區政府，同宣揚「港獨」嘅帖文。《香港國安法》生效後，舊嘅煽動帖文仲繼續保留喺度，新嘅就用「#Hashtag」、「藏頭詩」等較為隱晦嘅方式發表，企圖繼續潛移默化荼毒社會大眾。好彩警方將佢哋拘捕，如果唔係，又唔知有幾多人不知不覺間被佢洗咗腦。大家千奇唔好以為今次黃人sell保險係個別事件，被DQ嘅前區議員朱x瑋，喺2023年就曾經因無相關牌照推銷MPF而被捕。

事實上，嗰啲人唔知係咪顧著搞煽動同掠水，忘記咗做生意最基本嘅操守，好多「黃色經濟圈」嘅店舖都被指質量有問題。呢班黃商人諗著食「黑暴」水搵錢，搏懵搞唔同嘅生意掠水，貼隻當年黃人icon嘅豬頭貼紙係門口，吸引「手足」幫襯，但提供嘅商品同服務就非常參差。

有網民就曾話，「光X冰室」係sell理念，唔係sell質素，揶揄「黄店出品屎都要食！」；「黃偽人」杜X澤亦曾話「龍X冰店」嘅食物質素「好X大鑊！」仲有啲黃店直頭連法規都唔跟，好似由朱X瑋創辦嘅「餘X」網購平台，自去年起因售賣未有適當加上標籤嘅食品，被食環署票控多達9項罪名；「光X冰室」九龍灣店多年嚟無牌經營，喺2025年被法庭頒令封舖；「膳X小館」喺2024年因無牌製造月餅被票控；「光X米線」就因為冇食物製造廠牌照製造食物被票控，同埋違反地契條款而被要求結業。大家又估吓有冇「手足」食過黃店食物之後肚痛呢？

除咗飲食，有啲黃人又透過營運書店搞「軟對抗」，佢哋表面sell啲好似係推廣本土情懷、本地研究嘅書，實際都係一啲反政府、宣揚「抗爭」嘅刊物。今年3月到7月期間，警方就分別拉咗多間出售呢啲煽動性刊物嘅負責人，包括「一權書館」、「田完書屋」及「樓下書舍」等書店。

所有以上事件都證明，「黃色經濟圈」只係黃商人用嚟宣揚反政府訊息同呃錢嘅「掠水局」，對消費者利益保障成疑。搞到咁烏煙瘴氣，就連黃店「阿X泰」創辦人都忍唔著喺2023年講句「黃色經濟圈就是一個錯誤的示範」，宣佈同「黃色經濟圈」割蓆！

除咗「黃色經濟圈」，黃人又經常用「支援同路人」、「抗爭」等為藉口，向「手足」進行情緒勒索，呼籲「課金」，但啲錢去咗邊？好似「A小妹妹」騙案咁，奀星阮X安虛構一個被控暴動罪嘅19歲「A小妹妹」出嚟，去勒索「手足」嘅同情心，發起眾籌掠咗逾165萬。奀星之後拎咗100萬去豪賭；其餘嘅就俾佢老婆用嚟去歐洲旅行shopping。

再講近啲，早前因參與「悼念騷」搞煽動被捕嘅「爆炸頭」，最近都話自己所有銀行戶口被凍結，叫「手足」改去Patreon「課金」比佢。冇錯，又係Patreon。其實不少亂港分子，都鍾意用Patreon呢類平台搞眾籌同收取外國嘅政治酬庸。國安通緝犯許至瘋曾以檢控警方為名，眾籌逾350萬訴訟費，但就被人揭發佢私相授受，將當中113萬比咗代表佢嘅前「白鴿黨」黨友楊X然。到許至瘋走佬嗰日，佢都無交待另外嗰200幾萬去咗邊；去到外國佢仲喺Patreon開戶口，以「國際倡議」、「游說」等為名呼籲「課金」。高院喺2025年頒令充公許至瘋夫婦同佢母親嘅香港財產時，更估計其Patreon收入可達1200萬。嘩！成千萬，用咗去邊呢？ 你問零零發，如果警方採取行動拉幕後金主嗰陣，捐過錢嘅朋友會唔會因為曾經資助他人進行危害國安活動而惹官非，我真係唔夠膽講。但零零發就記得多名營運「懲罰May」嘅前「香港X志」成員同埋另外4名男女港人，就曾經因為支援國安通緝犯衣冠聰同許至瘋，喺2023年被警方拘捕。

我零零發呼籲大家唔好幫襯「黃色經濟圈」，提防反中亂港分子借「軟對抗」宣揚虛假及煽動性訊息之餘，亦要小心唔好資助「指明潛逃者」，否則隨時中伏變成資助危害國安活動！

鍾情局。零零發