林鄭團隊受關注 戴健文做傳媒聯絡

林鄭在中央公佈免去佢職務後，即刻開記者會正式宣布參選特首跑馬仔。隨住有關通知發俾傳媒，公關大員名單陸續浮出，其中較受關注係前港台副廣播處長戴健文。

戴健文話，今次係義工方式，幫忙林鄭月娥聯絡傳媒，稱與林鄭認識廿多年，十年前籌備回歸十周年的活動時，雙方有更多合作。他又指，林鄭在清拆皇后碼頭，及佔領中環時，均參與調停工作，雖然「出嚟嘅效果或者不理想」，但認為對方是願意主動做好溝通工作的人，因而願意幫忙對方，會幫助她到三月尾。

戴健文2016年初退休，退休前官至副廣播處長，港台一向與政府撐到行，身為港台高層的戴健文，在位時幫港台爭取興建大樓，最後無功而還，退休後，他提名泛民的葉建源出任港大校委，似乎與泛民頗有交情。林鄭找來戴健文幫手，似乎係想改變與CY 屬同路人的印象。

Ariel

** 博客文章文責自負,不代表本公司立場 **

中央批准「鬍鬚曾」辭職後，佢都會大力殺上，消息指「鬍鬚曾」搵咗前食物及衛生局常任秘書長李淑儀同前公務員事務局常任秘書長黎高穎怡做佢競選團隊核心，用AO班底助選。

傳聞「鬍鬚曾」早前曾經搵過東亞銀行主席李國寶做選舉辦主席，呢個做法係翻抄過去「煲呔曾」過去參選兩次的模式，不過寶哥哥諗過度過之後，都決定唔制，所以「鬍鬚曾」選舉辦主席呢個位唔知搵邊個做。

而李淑儀和黎高詠怡都係「鬍鬚曾」選舉辦核心，可能由李淑儀打頭陣，佢地兩個近日已四出找人傾計，既為「鬍鬚曾」參選造勢，亦吸納各方意見，加入「鬍鬚曾」政綱之內。

李淑儀之前做過政府新聞處、經濟科、工商科、貿易署、公務員事務科等部門高層，仕途末段先後做經濟發展局及食衛局常秘，被視為陳四萬的手袋黨成員。陳四萬最近發表挺「鬍鬚曾」、打林鄭之言論，未知是否由李淑儀一力促成。