政事
特首賽入戲肉，重量級選手林鄭入局，有人問仲有無「真命天子」?
有一個和林鄭及「鬍鬚曾」皆友好的商界選委被人問起，佢係唔係支持「鬍鬚曾」，佢搖晒頭否認。再問佢係唔係支持林鄭，佢就支吾以對。政壇八卦友分析，呢啲商界選委怕後面仲有「真命天子」，所以取態咁含糊。
選委手上只得一票，要諗清楚才落注，相當正常。但以為林鄭之後，還有其他什麼「真命天子」，就有點表錯情了。
政壇高人話，擇選已放晒上枱面，林鄭、「鬍鬚」、葉劉、胡官，係咁多，無其他人會再出來，有買就趁手。
佢又話，呢個局連泛民都睇到，大狀黨率先下注買「鬍鬚」，亦都因為見到只得4家牌，左等右等都無謂啦。呢個世界唔好等一定會選上的「天子」去益你，應該問問誰最有能力，最適合做特首，同埋你可以做什麼去推動這個候選人當選。
Ariel
** 博客文章文責自負,不代表本公司立場 **
林鄭選舉辦公室拉咗唔少猛人加入，聞說最新一位是前立法會議員林大輝。
林大輝曾是唐英年家臣，是公認的唐營人物。知情人士話，大輝是「ABC」（Anyone but CY），最不喜歡CY，對林鄭和曾俊華ok，最後選擇了支持林鄭。
不過不要以為大輝支持林鄭，唐英年也全力撐林鄭。唐英年今日發表聲明，對林鄭月娥宣布，正式參選行政長官，表示歡迎及支持。又話林鄭先後處理過不少重要社會事務，屬於有心、有力及有經驗的參選人。
不過唐英年最後講多兩句，話「他會鼓勵所有有能力、有志向者參選行政長官。」唐唐咁即係鼓勵「鬍鬚曾」快啲出來喎。
另外，大輝支持林鄭，有一個人一定無運行。大輝日前先至狠批教育局局長吳克儉，話佢至今的工作表現非但無改善，更是江河日下，身兼特首選委的他表明絕不支持下任特首繼續沿用吳克儉做局長，「好清晰㗎啦！任何一個想我支持佢，必須話畀我聽仲用唔用呢個人。有呢個人，天王要我俾選票，我都唔會俾！佢實在太差、太差喇！差到唔可以忍受喇。」
如今大輝加入林鄭選擇辦，若林鄭當選，吳局長肯定無運行喇。
