葉劉直播抬玉腿 全場嘩然

特首參選人葉劉淑儀，忽然來一招「美腿橫陳」，頓時哄堂嘩然。

究竟因何無故有咁「香艷」一幕? 話說商台主持人志雲大師（陳志雲）同葉太玩fb live直播，他問葉太有冇老花，葉太話冇。

志雲大師上次訪問另一參選人林鄭月娥時，要求林太除低眼鏡，等大家睇下佢冇戴眼鏡嘅樣子，但葉太本來就無戴眼鏡，志雲大師就問：「若果請你除一啲嘢，選擇除啲咩呢？」葉太答：「至多咪除外套。」之後就馬上除咗外套。

志雲大師大讚葉太嘅上衣、手袋、皮鞋都襯到絕，清一色藍色，就喺呢個時候，葉太竟然抬高玉腿，抬到枱面上，顯示她的藍鞋，播音室馬上一片嘩嘩嘩聲，但葉太就萬二分淡定話：「我係喜歡玩時裝嘅。」然後順便拉票：「攞啲零售票啦，我長期幫襯架。」

商台fb圖片

商台fb圖片

呢次fb live直播短短7分鐘，笑點不絕，喺呢個時候都算係難得一見嘅輕鬆場面。

Ariel

** 博客文章文責自負,不代表本公司立場 **

林鄭月娥宣布參選後，就馬不停蹄展開選舉工程，連星期日都無得抖，皆因「不任命論」的報道搞到佢要急急見記者澄清。

佢見記者時仲自爆，星期六搬離咗政務司司長官邸，去咗競選辦附近一個單位住，半夜三更仲搬緊屋，點知到午夜先發現「連廁紙都無」，於是又要走落街，諗住去便利店買返一兩卷，但係去到先知道，原來便利店係無廁紙賣嘅。

點算？林鄭咪唯有搭的士，夜麻麻走返去CS官邸囉！

林鄭話大學畢業後就加入政府，無間斷工作咗超過36年，到上個禮拜一無咗公職人員身分，仲要時間調整心態和工作步伐，佢話分享呢件「廁紙故事」，係想說明呢幾天發生了太多事，佢仲需要時間嚟適應。

政壇八卦友說，面對呢次「關公危機」，林鄭選擇咗用自嘲的方式來化解，希望公眾包容同諒解，都好過硬崩崩澄清。