今時今日要做發言人，除咗要熟悉所代表的部門或者機構的情況，仲要有sound bite，即係要有精警的句子入到屋。
美國總統奧巴馬繞住中國行咗一圈，日本、南韓、菲律賓，由東北亞行到去東南亞，明眼人都估到佢想點，但人家口頭就講無意遏制中國喎，你做外交部發言人點答好呢？
中國發言人秦剛昨日就俾咗句Bite傳媒喇。唔少分析都認為奧巴馬總統此次亞太之行沒有來中國，意在針對中國，秦剛就說奧巴馬及美方其他官員在不同場合都說過，美國無意遏制中國，至於「是不是針對中國，我們要看美方是怎麼說、怎麼做的。至於來不來中國，一句話：你來，或者不來，我就在這裡。」
呢句：「你來，或者不來，我就在這裡。」真係幾高喎，有少少氣勢又唔算太寸。
美國今次都算擺明車馬，直頭有啲兵臨城下之勢，不過，喺地球的另一邊，外長王毅正在巴西，為習主席夏天訪問拉美做準備，回應咗奧巴馬的圍堵中國遊，話「中國有能力保持戰略主動，不會因一時一事或某些人、某些場合的言論而受到影響或者左右。」
係人都知拉美係美國的後花園，習主席今夏再到訪拉美四國，都算係回應奧巴馬的出招。
毛拍手
** 博客文章文責自負,不代表本公司立場 **
今年進入踏春季節，神州大地好似特別多風吹，多名的退休常委頻頻在新媒體和社交網站上出現，其中以前國家主席胡錦濤的消息最詳盡，由湖南遊到貴州，仲有上屆常委吳邦國、賈慶林、李長春，內地網站有圖文講講他們露面的消息。前國家主席江澤民就特別，他遊上海、揚州的消息就由海外媒體出口轉內銷方式曝光。
而兩位前總理的「露面」方式就轉折啲，話說卡塔爾國際能源獎基金會頒個終身成就獎給溫總，由中國駐當地大使代表上台領獎，溫家寶有份答辭，內容就幾官式講吓中國同卡塔爾關係。
另一位前總理朱鎔基的「登場」亦有少少特別，前日清華大學經濟管理學院舉辦建院30周年活動，經管學院網站就登咗篇《首任院長朱鎔基致信祝賀清華經管學院建院30周年》的文章，講到朱對經管學院發展深感欣慰外，還深情講到：「作為一個清華人，我的心永遠和你們在一起！」
朱鎔基2011年出席清華百年校慶(網上圖片)
本來朱老闆(毛拍手始終覺得呢個稱號好稱朱鐵面)寫封信祝自己的Baby(朱係首任院長)30歲生日，係平常事，但有海外媒體就報道，呢則新聞發布日期是3月6日，但慶祝活動就在前日，懷疑其中有小動作刻意等朱老闆「露面」。
不同解讀同猜想一轉發得多，無嘢都會變有嘢，今日內地各大網站即刻轉條新聞，話朱老闆原定前日參加慶祝活動，但身體不適，不能前往，只能托校長向同學問候。
毛拍手收到獨家風，朱老闆近日患感冒，已經無事好番，但醫生叫多休息，老人家緊遵醫生的話，所以無去到經管學院的校慶活動。消息仲話封信就係4月26日果封，並不是什麼3月寫定已發布，昨日曝光內容主要集中講朱老闆對經管學院的祝福和期望，估唔到出街後有人有太有聯想，封信其實亦有講到因不適未出席慶典，身邊人主動澄清，就是費事大家瞎猜。咁又係，外界諗多咗亂估就無謂啦！
查實近期神州大地那麼多風聲，咁多前領導人周圍去，你話正常，其實他們年年如是，踏入春天出去行行，你話唔正常，社交媒體今年又真係報得比往年多一些，不過，最矚目的人，包括周永康就未有露面喇，又用那句「你懂的」啦。
