政事
特首選舉到尾段，有關林鄭的醜聞爆唔出乜嘢勁嘢， 最後終於整一篇自稱資深政務官的「褟中仁」的公開信，指林鄭雙重標準、中央集權云云。政壇高人就形容，呢啲手法似曾相識。
高人話，呢次選前一大段都幾乾淨，唔似2012年唐梁之爭咁樣大爆醜聞，三個候選人林鄭、鬍鬚曾和胡官都係比能力、比政綱、 比人和，相對理性。
但到最後十日，林鄭的對手開始忍唔住出招，先有肥佬黎發功為鬍鬚曾箍票，持槍上陣，直鬧胡官和教協激進成員韓連山係「中共臥底」。無幾耐就出現自稱資深政務官的「褟中仁」的匿名信。
高人話，既然林鄭衰到咁，資深政務官又可以咬長糧天不怕地不怕，何不公開亮相鬧林鄭呢？幾方的團隊都各自有前高官支持，作封匿名信隊對手，話都無咁易，所以大家都唔使太認真看待。
高人慨嘆，本來期望呢次係比較乾淨的選舉，估唔到去到最後亦有人出陰招，單單都係只隊林鄭， 無人隊鬍鬚曾和胡官，都可知乜嘢人搞到個選舉cheap晒。 呢種手法同上次選舉後段針對CY話佢「你呃人」的手法好類似，都係人格謀殺，可以話係熟口熟面的選舉工程。兩個司長同出一門， 如今相煎何太急！
Ariel
** 博客文章文責自負,不代表本公司立場 **
早前泛民選委宣布特首選舉投票，以戴耀廷搞的民間全民投票結果為重要參考，被外界視為舖定下台階，讓泛民可以全投建制派候選人曾俊華。但民間公投甩晒轆，本來想有100萬人參加，但如今快結束只有4.4萬人參加，泛民對民間公投近乎放棄。
民間投票發起人戴耀廷昨日承認民間投票參加者距離100萬人目標相當遠。他估計參與民投的人數不多，與手機程式Telegram難以使用、市民擔心網絡保安和私隱問題、市民覺得特首選舉大局已定，以及市民不想支持任何人有關。
但政界人士卻認為，主因是公投搞得差，一出來就出現涉露私隱問題，之後話搞好咗重新開始，但又無好清楚咁交待，搞到參加者失晒信心。
泛民見民間公投反應咁差，已經半放棄，教協、公民黨、民主黨都話到明自己的選委會全投鬍鬚曾，都唔理公投結果了。
另外，「23萬監察」王國興唔放過戴耀廷，早前再去信個人私隱專員公署，質疑民間投票未能保障投票人個人資料。公署昨日回覆王國興，表示會密切留意及審視投票活動的發展。公署的回信予王國興提到，投票網頁已按有關條例下收集資料的原則告知參加者收集個人資料的目的，若有申明目的以外的情況出現，監管機構會作出跟進。
特首候選人還有林鄭月娥、胡國興。
