博客文章
泛民發動325票全投鬍鬚曾，搞到有少少反效果，先係想用民間公投搵出「最高支持者」來合理化投鬍鬚曾，然後由肥佬黎公開屈胡官和韓連山係「中共臥底」，搞到有些泛民非主流派有少少㷫。
昨日新民黨在下午分別與林鄭、鬍鬚曾和胡官3位行政長官候選人會面。胡官就借機說，特首選舉民間全民投票的投票人數較預期少，不能作有效的指標。
有激進泛民人士私下話，而家三個候選人都係建制派，因為無一個反對23條立法和人大8.31決定，唔明泛民大黨點解夾硬要泛民選委綑綁全投鬍鬚曾。萬一鬍鬚曾當選，佢要推事先講明會推的23條立法，泛民支唔支持? 係唔係要在選舉為鬍鬚曾找數？
佢話，如果夾硬要在鬍鬚曾和胡官中二選一，胡官的政綱民主過鬍鬚曾，所以不排除有少部份泛民選委唔會聽「大台」枝笛，不一定全投鬍鬚曾，有個別人投吓胡官都唔出奇。反正照目前狀況睇，鬍鬚曾當選的機會不太高，泛民選委只要唔投林鄭，投鬍鬚、投胡官、投白票其實都無分別。
行政長官選舉有三名候選人，分叮是曾俊華、林鄭月娥和胡國興。
Ariel
** 博客文章文責自負,不代表本公司立場 **
特首選舉到尾段，有關林鄭的醜聞爆唔出乜嘢勁嘢， 最後終於整一篇自稱資深政務官的「褟中仁」的公開信，指林鄭雙重標準、中央集權云云。政壇高人就形容，呢啲手法似曾相識。
高人話，呢次選前一大段都幾乾淨，唔似2012年唐梁之爭咁樣大爆醜聞，三個候選人林鄭、鬍鬚曾和胡官都係比能力、比政綱、 比人和，相對理性。
但到最後十日，林鄭的對手開始忍唔住出招，先有肥佬黎發功為鬍鬚曾箍票，持槍上陣，直鬧胡官和教協激進成員韓連山係「中共臥底」。無幾耐就出現自稱資深政務官的「褟中仁」的匿名信。
高人話，既然林鄭衰到咁，資深政務官又可以咬長糧天不怕地不怕，何不公開亮相鬧林鄭呢？幾方的團隊都各自有前高官支持，作封匿名信隊對手，話都無咁易，所以大家都唔使太認真看待。
高人慨嘆，本來期望呢次係比較乾淨的選舉，估唔到去到最後亦有人出陰招，單單都係只隊林鄭， 無人隊鬍鬚曾和胡官，都可知乜嘢人搞到個選舉cheap晒。 呢種手法同上次選舉後段針對CY話佢「你呃人」的手法好類似，都係人格謀殺，可以話係熟口熟面的選舉工程。兩個司長同出一門， 如今相煎何太急！
