777得票話題多 由無7到全777

今次特首選舉的得票數字成為話題，特別是林鄭的3條777， 相當頂癮。

昨日網上最流行的笑話是 :

曾生一年hea 足365 日， 所以得365 票; 胡官 21 點以為大晒，點知大家玩緊三公，得1點輸晒; 林鄭明知山有虎，偏向虎山行，所以係玩緊老虎機，攞777，中jackpot。

 

第二個笑話是 :

拜拜689(88+689)果然= 777

第三個笑話是 :

CY 同林鄭之分別是：689一個無7，777一個全7。

第三個爛笑話可以講多兩句，「689」是上屆CY的得票，將689當CY的稱謂，源自2012年12月黃毓民的一次立法會發言針對CY的發言，話以後要用「689」稱呼佢。黃毓民用如此稱呼， 表面上是諷刺CY得票低、民望低，其實是指689從數字排序來看 ，缺了「7」字，黃毓民以刺諷刺CY「無7用」(粗口諧音)。

政壇八卦友話，由CY上次得票獨缺7，到今次林鄭得票三條全7， 上天對林鄭不薄，從得票已顯霸氣。

Ariel

** 博客文章文責自負,不代表本公司立場 **

林鄭當選特首，記者在選前追問選委林鄭民望低，會否無法管治？有高人話中總會長蔡冠深回答時講得幾到題。

蔡冠深話，不能單睇選舉期間的候選人的民調，林鄭和曾俊華過去都係司長，要睇番佢地的往績的民望。

嘉華集團主席呂志和就答得搞鬼，話「民望係你地(記者)寫，你地唔好亂寫，要公道啲。」

政壇高人話，鬍鬚曾的選舉工程的確做得好啲，網上網下宣傳精美，加上長久做功夫，自然拉抬了選舉期間的人氣。但揀特首不是比選舉工程，也不主要是比人氣，否則搵影帝發哥出來選，就一定要選佢做特首。

高人話蔡冠深講到一個最重要的問題，做過司長有往績，要睇佢地做嘢做成點，做嘢時民望如何，可以比較立體咁睇到一個人。