魔童搞網購年蝕2億幾得人驚

港視主席王維基周五以校友身份返中大同師弟妹分享創業心得，話佢中五開補習社收400幾個學生，月入幾萬蚊夠俾首期買樓，又試過賣台灣水貨書都好成功，到90年代搞IDD回撥更加掂；但亦有失敗經驗，例如在加拿大賣女裝睡衣、前幾年搞電視都係失敗之作，而家網購仲捱緊。

魔童講起網購條數又幾誇吓，佢話投入網購現時日蝕50、60萬元。吓，蝕咁多？兩日就推一架賓士落海喎。計吓數如果日蝕50萬即係年蝕1.8億，日蝕60萬即係年蝕2.2億， 魔童仲話：「我做咗兩年，但我會擺多10億落去，輸晒未必再玩，但一定會做好。」

不過一個財演就咁分析，年蝕2億，再放多10億可以玩多4年，呢條數話多唔多，睇你同邊個鬥。魔童做網購同百佳、惠康鬥，人地係巨人，魔童年蝕2億太少啦，肥佬黎當年搞蘋果速銷，兩年蝕15億，一年輸7億以上，遠比魔童大手筆，都打唔低對手，魔童年蝕2億咁細手筆，而家百佳、惠康都未使回應。

魔童做網購的香港電視市值13.7億，資產淨值20.1億，咁搞法都唔係可以輸得好耐咋。

小鯊

** 博客文章文責自負,不代表本公司立場 **

灣仔有個猛人綽號「傻佬泰」，後生時係江湖猛人，在上世紀六、七十年代，稱霸灣仔，駱克道歸佢睇晒，手下有麻將館和浴室，又買埋大量舖頭，收入可觀。

傻佬泰年紀大咗不止做正行，仲做埋行醫濟世的中醫，主要做艾灸，醫好唔少人。

不過泰哥能醫不自醫，近日因為糖尿病併發症過咗身。佢只信中醫唔信西醫，幾抗拒西醫的治療方法，不過最後也不能用中醫方法醫好糖尿病。

人稱「灣仔皇帝」的泰哥，講嘢聲如洪鐘，好有霸氣。七十年代港督麥理浩成立廉政公署，追查警察貪污，多個華探長呂樂、張秀、鍾長有等避居加拿大。呂樂移民前托「傻佬泰」處理他在港的生意。但後來呂樂懷疑「傻佬泰」和他的對頭張秀、鍾長有暗中交往，兩人因而反目。

後來在九十年代有人向美國參議院投訴「傻佬泰」為香港江湖元老，他就被查十多年，後終查明無事。一代江湖人物，就此過身， 遺下三房太太，以及數以億計的身家。