啱啱睇到《明報》搞的民調，支持阿爺屬意的「篩選方案」支持度再升2個百分點到51%，反映民意離激進泛民愈來愈遠。
《明報》係委託港大民研計劃做追踪調查，由去年4月開始做，做咗一年有多，最近公布5月調查，有兩條問題較重要，第一條係特首選舉有提委會初選，確保所有候選人唔會對抗中央，然後才一人一票選舉，5月呢一期有51%人支持呢個方案，比1月上一期調查升咗2個百分點，反對的是28%，比1月調查跌咗4個百分點。支持阿爺方案的民意首次佔過半數多數，正反差距再拉大。
另一題係問佔領中環，5月有56%反對，比1月跌1%，而5月有24%贊成佔中，同樣比1月時跌1%。反對與贊成兩者齊微跌，但反對佔中仍佔壓倒性多數。想知調查詳情可以搵份《明報》睇睇。
《明報》民調結果和我睇到其他民調大致相近，都係反佔中的人多，支持佔中的人少。支持阿爺用提委會篩選的人多，反對的人少。今次調查特別的是支持此方案有上升趨勢。
Ariel斷估，阿爺不斷講不能由對抗她的人做特首，香港人十分務實，唔想同阿爺鬥，亦想有一人一票，咁就接受先篩選再普選的方案。
Ariel
** 博客文章文責自負,不代表本公司立場 **
昨天行政長官答問大會史上首次腰斬，「拉布三子」因叫囂或向特首梁振英擲物被逐離場，呢場立法會大龍鳳雖然事隔一日，但仍然喺政壇起風雲。
先係「長毛」梁國雄，佢昨天俾曾主席點名要走，但佢賴死坐喺度唔肯就範，佢今早上電台話，曾時只是企咗喺身，未有動作未掟包，不滿曾主席以「防範於未然」為理由逐佢出會議廳，批評曾鈺成理據不足。
但有政壇高人聽完「長毛」咁講，就覺得係詭辯。高人話舉個極端啲的例子，如果有恐怖份子攞位把刀去劈友，未殺人前都唔可以拉佢，唔通真係要佢斬咗人先叫停咩！梗係喺佢「手起」未「刀落」之前嗌停佢，等佢斬死人先制止就大遲啦！而且長毛都認咗叫「郁佢」，明顯係主謀啦，曾主席做法都合理啫。
趕長毛走呢一筆各說各話，另一筆係特首CY昨天提到有商界有意向「佔中」者提出民事訴訟索償，亦引起議論喎。
有商界的立法會議員就話無聽過。但金融服務界議員張華峰對信報表示，聽過有投資銀行諗緊，一旦「佔中」令到佢哋有損失，就入稟提出訴訟，仲諗緊設立設個後備辦公室添！
中華廠商聯合會會長施榮懷亦話，有少數工商界人士同會員睇緊「佔中」可能導致的損失，徵詢緊法律意見。工業總會劉展灝主席亦說，部分企業已傾緊「佔中」，不過唔係響應，而係諗法子應變。
聽落又係好似各說各話，其實都係不同陣形對「佔中」議題的表述啫，可見嚟緊壁壘都會愈來愈分明喇。
