中國財政部上月發表諮詢文件，建議向香港會計師參與內地企業核數「落閘」，在境外上市的內地企業的核數工作不再由香港北上會計師負責，要由內地會計師負責。香港會計師自然大力反對，怕會影響香港會計師、特別係年青會計師生計，暫時未知能否叫阿爺回心轉意。
呢單嘢表面上係因為內地會計師熟悉內地情況多啲，由佢地審核番內地企業，可以提升核數質素。但事情沒有咁簡單，近年出現愈來愈多外國政府或沽空機構針對內地企業的事故，阿爺會唔會懷疑海外會計師就係洩密源頭，要一舉堵塞漏洞？
中國近期有好多防洩密的動作。據英國《金融時報》報道，中國政府開始禁止國有企業使用美國顧問公司之間服務，包括麥肯錫、波士頓諮詢、貝恩和博斯公司。中國擔心這些公司趁機為美國政府竊取中國情報。
另外內地互聯網新聞研究中心今日(26日)發表《美國全球監聽行動紀錄》，直指斯諾登透露美國國家安全局代號為「棱鏡」的盜取機密計劃，中國有關部門經過了幾個月的查證，發現針對中國的竊密行為的內容基本屬實。
《紀錄》指美國的監聽行動，涉及到中國政府和領導人、中資企業、科研機構、普通市民、廣大手機用戶等等，這些行為應當受到全世界的共同抵制和譴責。呢個報告新嘢在於證明美國「竊密行為的內容基本屬實」。
中國打擊民間洩密行為亦漸升溫，早前廣東省公布一單由境外人物「飛哥」在內地買通網民盜取機密案，案件本身不大，但過去好少公布這些案件，如今突然高調揭牌，就是提醒國人不要為外地勢力盜取機密，否則後果嚴重。
中國接連出招，一般相信是回應美國司法部早前通緝五名中國軍官，指控他們侵入五家美國公司的電腦系統竊取商業機密。中國要有力還擊。
毛拍手覺得一定同回應美國的行動有關，但也不限於回應美國動作，因為單純是回應無可能這麼快搞這麼多東西出來。自習大大做咗國安會主席後，開始揸正嚟做，其中一項主要工作就係反洩密，所以早就部署一系列反制行動，遇著美國佬弄出通緝五個解放軍事件，咪加多兩錢肉緊，推多啲嘢出街。睇嚟中國反洩密的行動，仲會陸續有來。
毛拍手
** 博客文章文責自負,不代表本公司立場 **
神州大地不平靜，新疆再爆大鑊，兩架汽車撞向人群再引爆，造成百多人死傷，最慘情係死者大部份係習慣行早市的老人家，多國紛紛向中國表達慰問，毛拍手就發現咗一個稀客，就係美國喇。
美國白宮發表聲明，譴責早些時候新疆烏魯木齊發生的暴力恐怖襲擊案件“卑鄙兇殘”，向遇難人員及其家屬表示哀悼。
聲明仲表示，這是一起針對無辜平民卑鄙兇殘的暴行，美國堅決反對各種形式的恐怖主義行為，「我們向此次襲擊事件中的遇難人員、他們的家屬和所有受到影響的人員表示哀悼和慰問」。
本來對一個國家遭受咁嚴重的恐襲，美國發表一份咁樣的聲明似係正常不過，但內地傳媒都炒到幾大。唔講可能大家冇留意，關鍵就喺「恐怖襲擊事件」呢六隻字，原來今次係美國首次在正式聲明中將在新疆發生的暴力事件定性為恐襲。
中國一直都認為，最困擾新疆安全來自新疆獨立運動或東突厥斯坦伊斯蘭運動，官方多次認定在新疆多地，乃至去年天安門前的汽車爆炸、今年三月的昆明火車站斬人血案都認定係疆獨勢力發動的恐襲。
但美國一直對中國的判斷有保留，早前美國國務院都講緊仲未能得出結論，天安門爆炸事件是恐怖襲擊，對新疆之前發生的多宗襲擊事件亦從來不承認係恐怖襲擊。直至到三月的昆明火車站斬人血案，美國先承認係恐襲，今次就係第一次承認係新疆內發生的暴力事件係「恐襲」。
美國點解遲到依家先承認新疆的襲擊係恐襲，一係佢情報工作原來唔係想像中咁勁，一係就政治判斷有偏差。其實美國對新疆獨立運動的態度一直模糊，甚至有時搬出人權標準來質疑中國的新疆政策，因為佢一直支持新疆西藏的獨立運動，成日話要保障當地人權。雖然2002年聯合國已定性「東伊運」係恐怖組織，但近期更有報道指美國將東伊運剔除出監察名單，可見兩國喺呢個問題分歧有幾大。
今次新疆恐襲後，靈通消息人士對毛拍手話，相信美國應該係被逼要表態，一來事件太明顯係有組織的恐怖襲擊，傷亡咁大，唔當佢係都唔得。更重要係美國亦開始不得不考慮，東伊運同拉登為首的恐怖份子網絡，有重要關連。美國從來對伊斯蘭世界都不是友好，加上前車可鑑，為對付前蘇聯入侵阿富汗，自己親身培植的拉登，最終傷害自己最深，睇嚟今次表態只係唔想俾人覺得支持伊斯蘭極端勢力，並唔係同中國關係有好轉的趨勢。
