唔好以為退休就安全

前排聽啲熟悉內地政界的朋友，講起十八大後中紀委「大開殺界」，內地記者日日要睇住中紀委的網站，隨時都會公佈官員被查，漸漸就發現個規律，叫做「週一拍蠅週末打虎」，即係星期一公佈大多數係違反中央八項規定的細案，多數係作風有問題、用公款公車大吃大喝等，而且針對的都係所謂「小官」，科級、廳局級多啲; 相對地好多高官(省部級以上)都係喺周未公佈被調查，呢個現象都幾有趣。

不過，可能要打的老虎都唔少，今個星期就週一(26日)傍晚又公佈一位省部級官員被查，係湖南省政協前副主席陽寶華。睇到呢單新聞，好多人都係水過鴨背，因為近排內地都太多打貪新聞，引唔起太多注意。估計呢位陽寶華兄，可能同早前衡陽五百幾名人大代表賄選案有關，本來毛拍手都唔太注意，但睇睇佢的簡歷，聽聽內地傳聞，集中在另一個角度，值得同大家分享吓喎。

呢位陽主席已經66歲，去年湖南宣佈佢退休，按照內地規定，省部級官員的退休年齡係65歲，咁陽主席算係正常退休咗一年。內地官場有好多不成文的慣例，包括官員只要喺正常年齡退休，就叫「安全著陸」，安享晚年，反腐之風幾強烈，都唔會郁到呢班平安著陸的退休人士。

呢位陽主席退休成年，當地的媒體仲有報道佢老人家退休後的生活，練習書法、參加畫展等，去年十月《郴州日報》仲報道陽主席去過一個市考察，你知啦，一位前地方領導人可以見報，顯示呢位陽主席，仲有一定影響力。到今個月初湖南政府的紅網仲有報道佢的活動。

 

今日內地媒體就走去訪問咗啲學者，高調咁講：「陽寶華辭去職務時已年滿63歲，過了副部級幹部退休年齡，因此被認為屬“光榮退休”。但十八大後，中紀委的“打虎”行動密度和力度屢屢刷新反腐紀錄，一個顯著特點是，作為“安全著陸”標誌的“退休”不再“安全”。」

睇嚟喺習大大主政的呢輪反腐潮中，退休=安全呢個固有觀念，可能要退下火線囉，退休後去吓參觀考察，喺媒體上露吓面，都唔係代表百分百安全喎。

毛拍手

** 博客文章文責自負,不代表本公司立場 **

中國財政部上月發表諮詢文件，建議向香港會計師參與內地企業核數「落閘」，在境外上市的內地企業的核數工作不再由香港北上會計師負責，要由內地會計師負責。香港會計師自然大力反對，怕會影響香港會計師、特別係年青會計師生計，暫時未知能否叫阿爺回心轉意。

呢單嘢表面上係因為內地會計師熟悉內地情況多啲，由佢地審核番內地企業，可以提升核數質素。但事情沒有咁簡單，近年出現愈來愈多外國政府或沽空機構針對內地企業的事故，阿爺會唔會懷疑海外會計師就係洩密源頭，要一舉堵塞漏洞？

中國近期有好多防洩密的動作。據英國《金融時報》報道，中國政府開始禁止國有企業使用美國顧問公司之間服務，包括麥肯錫、波士頓諮詢、貝恩和博斯公司。中國擔心這些公司趁機為美國政府竊取中國情報。

另外內地互聯網新聞研究中心今日(26日)發表《美國全球監聽行動紀錄》，直指斯諾登透露美國國家安全局代號為「棱鏡」的盜取機密計劃，中國有關部門經過了幾個月的查證，發現針對中國的竊密行為的內容基本屬實。

《紀錄》指美國的監聽行動，涉及到中國政府和領導人、中資企業、科研機構、普通市民、廣大手機用戶等等，這些行為應當受到全世界的共同抵制和譴責。呢個報告新嘢在於證明美國「竊密行為的內容基本屬實」。

中國打擊民間洩密行為亦漸升溫，早前廣東省公布一單由境外人物「飛哥」在內地買通網民盜取機密案，案件本身不大，但過去好少公布這些案件，如今突然高調揭牌，就是提醒國人不要為外地勢力盜取機密，否則後果嚴重。

中國接連出招，一般相信是回應美國司法部早前通緝五名中國軍官，指控他們侵入五家美國公司的電腦系統竊取商業機密。中國要有力還擊。

毛拍手覺得一定同回應美國的行動有關，但也不限於回應美國動作，因為單純是回應無可能這麼快搞這麼多東西出來。自習大大做咗國安會主席後，開始揸正嚟做，其中一項主要工作就係反洩密，所以早就部署一系列反制行動，遇著美國佬弄出通緝五個解放軍事件，咪加多兩錢肉緊，推多啲嘢出街。睇嚟中國反洩密的行動，仲會陸續有來。