政事
特首CY話要削20%自由行，搞到商界牙痛咁聲。Ariel昨日遇到一個大集團老細，佢係咁問Ariel知唔知特首搞乜嘢，話而家旅客生意本來已開始轉差，若削自由行經濟實唔掂咁話。
商界眾口一詞，但政界好多猜測，泛民一族話CY係唔係用削自由行嚇佔中？不過Ariel同高人傾一傾，佢認為呢啲講法有啲九唔搭八，佢問乜佔中班人會關心零售關心經濟嗎？若然佢地根本唔關心，咁削自由行佔中派又點會驚呢？ 當然，佔中一搞大，唔止自由行，好似曼谷咁，其他遊客都唔敢來，但就同而家話削自由行扯唔上關係。
高人話係人都知唔少市民反對太多大陸遊客來港，咁CY打開口牌話削自由行，斷估可以攞吓分啩。
諗落又係，過去政府愛自由行愛到不得了。政府亦朝住繼續開放大陸旅客入境的方向盲目飛行，商務及經濟局蘇局長搞出將來可能有1年有1億大陸旅客訪港的預測。聞說呢個1億數字出街時，CY頭都痛埋，問點解咁無政治常識講呢啲嘢?
如今要剎車就由CY自己操刀，講到削20%咁多，講到商界媽媽聲，都有益於特首民望喎。
Ariel
** 博客文章文責自負,不代表本公司立場 **
港視主席維基哥未搞到電視台，出招搞網購。佢計劃投資1至2億元，喺年底前，搞一個「網上又一城」網上購物平台。目標係有超過百家商鋪同50萬件商品，俾消費者在網上選擇。
魔童嘅網購如意算盤，點樣同電視節目結合呢？佢計劃將之前已經製作好，但未播出嘅1000小時節目放在購物網站內。網友透過網站購物儲積分，用積分換「金幣」睇電視節目同劇集。魔童估計每日可以吸引到數十萬人次瀏覽網站，希望在六個月內吸納會員一萬人。魔童講明網站嘅角色會好似「虛擬嘅地產商」，只係叫人放貨在網上賣，自己唔會賣貨。
Ariel覺得維基哥嘅打不死精神，值得支持，佢就好似隻小強咁，呢度唔掂就去嗰度，捐窿捐罅搵出路。剩係呢個創意劍精神，就值得鼓掌啦。
不過，Ariel同零售業朋友傾過，佢哋都未睇好呢壇生意。佢講主要原因有兩個，首先係本地購物太方便，好多人樓下就係商場，網購唔係好得。其次係市面上可以隨手買到好多上網盒，乜都有得睇，例如小米盒子解碼版，或者再勁啲，去鴨寮街買「非法電視盒子」，每月百零蚊，就可以睇到成萬套電影劇集，同埋所有球賽。魔童要買嘢換金幣，先至睇到劇集，會唔會麻煩咗少少？除非套劇好睇過《星星》啦，仲可以考慮。
Ariel聽完上述意見，我半信半疑，話網購唔得，只係傳統思維作崇，唔作得準。但後者提到換金幣睇劇太麻煩，比較靠譜。
無論如何，維基哥咁有創意，大家又不妨放長雙眼，睇睇佢可唔可以創出新路。
