最近油價跌到七個一皮，美國原油跌到每桶42.74美元水平，創了一年低位。年初時，很多專家預計今年油價會升上60美元水平，現在油價跌到這樣，他們都要重估今年油價走勢。
油價1年圖
揸了油股的朋友要損手，但有人辭官歸故里，有人漏夜趕科場。我有一位富貴朋友，他最近就走去買中海油（883）。我問他條數點計？他說這是笨笨投資法，不會發達，但可以搵到兩餐「晏仔」。方法是這樣的，找一些大股，特別是一些週期性大股，見到佢大跌時，只要不行業遇到永遠沉淪的問題，認為佢跌咗將來會上番，就每當見股價跌得多時，就買一些。買入之後可能還會再跌到「面懵懵」，但坐它半年，甚至一、兩年，通常都會反彈回升，賺到10%或以上的回報。
我這位朋友身家很豐厚，擁有很多物業，最近沽樓套了現，錢放著沒用，買股都是一球一球的買，他說買200、300百萬元股票，博一成賺它20、30萬元，慳慳地已經夠一年的開支，買入後暫時唔得就坐吓先。他形容這是一個笨方法，不像買騰訊（700），可以見到股價嘭嘭聲上，但也不用擔心會升得多會出現無底深插。
像油價這樣，已跌穿43美元，當然，還有很大機會會插穿40美元。但他觀察國際大型外匯或者商品，下跌時通常都會越跌越急。主要是有很多人用「孖展」造了好倉。當跌穿了某些止蝕位，就會引發大量沽貨離場。大家都按市價斬倉，所以越跌越急，但大量斬倉盤會清去了沒有實力的孖展戶，剩下的都是有實力的長線持貨者。當急速跌穿大位後-，反而得到支持。
朋友說，石油也是講供求，美國頁岩油商搏命泵油，也不跟從石油出口國組織（OPEC）的規律，人家限制出口，她們卻拼命出口，便搞到油價很低。但當油價急跌到這些頁岩商無利可圖時，例如跌到45美元，很多油商要停產，試想像一下，若油價再狂跌，跌至35美元，大部份美國頁岩油商都可能要停產。油價將會重拾平衡。
所以，朋友見到油價跌會買一些，再跌又再買一些，累積一定的貨，坐一年半載，油價回升，就食糊走人。他說中海油不錯，盈利下跌也派4厘息，股價不升，也可以坐著收息。他說這個笨方法不適合資本很少的散戶，如果你要投資很多錢，又想瞓得著覺，就應該買這類股份，不用擔心會無底大跌。
陸羽仁
陸羽仁
** 博客文章文責自負,不代表本公司立場 **
最近油價下跌，樓價高升，一班朋友中環飯局，不期然討論到呢啲話題。
有朋友話樓價升到顛，愈細間價錢愈顛，有個細發展商在深水埗的鉛筆樓樓盤Ava 61開售，全部是250呎以下的小型戶，平均呎價20282元，同一個區富豪酒店（078）去年中推出的樓盤尚都主亦都係賣細單位，呎價僅13840元，即係呢個盤比同區一年前的樓盤貴近五成。
呢個新盤係33個月遠期樓花，即供最高折扣8%，折實價由276.8萬到479.1萬元不等，近500萬買個250呎蚊型單位，真係誇張到呢。150呎比一個車位仲細，250呎大約一個半車位，咁細單位賣到咁貴，個樓市真係傻咗。而傳媒訪問買家，好多都係家長，想俾首期幫仔女買樓，話樓價無得跌咁話。
我識一個發商展有樓盤申請緊售樓同意書，好心急話一攞到即刻推售，想賣晒佢鎖定利潤，好怕個市忽然逆轉。發展商心急賣樓心態，同市民心急上車心態，形成強烈對比。
現在個樓市發展到只係一手、只係細樓熱賣的地步，皆因細樓銀碼相對細(其實500萬都真係唔係細數)，加上發展商提供的樓按買二手樓提供唔到，所以買樓焗住買好貴的一手樓，即使同區二手樓係一半價錢，都無乜成交。
好似呢個盤Ava 61，發展商提供最高樓價七成的一手按揭，年期最長20年，首年按息P減1厘，之後全期P息，昨日P為5.25厘，買家要提供入息證明，但不用做壓力測試，即係你只要唔怕捱貴息，就唔怕去銀行上唔到會，唔怕銀行只借你5成，發展商包借。但息價而家都比街外同銀行借貴2厘以上。
以樓價400萬計，借7成即係280萬，唔計首期3成要借錢，只以按揭7成的借款計，以第二年P息計算，只係7成樓按一年俾息都俾14.7萬，一個月1.2萬，加埋還本金要1.5萬樓上。
睇悉歷史，遠的不講，最後一次加P息係2006年，亦係因為美國聯儲局由2004年中加息引起，聯儲局由1厘加到大2厘樓上後，香港P息才開始加，由2005年初起動，一年半內，由5厘升到8厘。若未來P息加到8厘，上述樓盤一年俾息22.4萬，月息1.9萬，加埋還本要2萬幾。一加息供樓腳都軟晒。
朋友亂吹，話最近油價大跌，跌到44.41美元，咁跌法短期插穿埋40美元都唔奇，連帶隻中海油(883)都跌到8.62元，唔知後市點。
紐約期油1年圖
我話如果你唔係短炒，有實力長揸，都唔怕中海油跌，跌咗會上番去。我話400、500萬買間深水埗納米樓，不如買中海油，你買300萬中海油，佢派4厘息，一年收息12萬，每月1萬，已經租到好靚的納米樓。
中海油1年圖
唔係話中海油唔會跌，若油價再大跌，佢跌穿8元都可以，但過半年一年又會上番去，現價唔係貴。但樓價就好貴，跌起上來好難搞，若不斷加息亦難捱。有時又唔係逼住一定要買樓，好似呢個Ava 61樓盤，係33個月遠期樓花，到3年後入伙時，又邊個知道樓市係點?
