政事
隨着林鄭宣佈司局長新班子，常任秘書長亦大執位，部份資深政務官升級出任常秘。現任地政總署署長甯漢豪將任發展局常任秘書長（規劃及地政），現任特首辦秘書長劉焱將升任財經事務及庫務局常任秘書長（庫務），海關關長鄧忍光就升任政制及內地事務局常秘，運輸署署長楊何蓓茵亦升級出任教育局常秘；4人皆由原來首長級薪級表D6級升至署理最高級的D8級別。
提起常秘升職兼執位，高人話政制及內地事務局候任局長聶德權識揀人，佢搵的常秘和副局長都比較有料到。官場傳言新政府本來想搵鄧忍光升做保安局常秘，因為佢讀過法律，而呢屆政府任內可能就23條立法，但後來鄧忍光變咗做政制局常秘，唔知係唔係局長聶德權搶人成功。
至於政制局的副局長人選更出人意表，係現在運房局的副秘書長陳帥夫，佢而家係AO，離隊轉做副局，走上從政生涯，都可以話係大轉變。官場中人話陳帥夫好叻仔，而家由D2轉去做D4職級的副局長，唔係睇人工，而係決心從政。
聶德權集齊猛人入去政制局，觀察家靠估話，難道林鄭想再搞政改?
Ariel
** 博客文章文責自負,不代表本公司立場 **
林鄭新班子亮相，唯一一個外人入局係前民主黨大腦羅致光，佢出任勞工福利局局長。
有建制派中人條氣有少少唔順，話教聯會的蔡若蓮可能出任教育局副局長，就俾教協插到暈，但民主黨的羅致光做勞福局局長，工聯會係唔係可以大力反對先?
佢咁講當然係諷剌泛民佢地自己友入政府就得，對家入政府就大鬧。不過呢個說法亦反映咗一個現象，就係羅致光入政府，唔等如建制派無情緒喎。
有件事睇到羅致光好聰明，之前政府有一份副局長人選名單，俾各個候任局長去揀，來自民建聯的民政事務局政治助理徐英偉，都可以在升做副局的名單之上。羅致光一句唔該，就揀徐英偉做勞福局副局長。
民建聯的人物，自然俾反對派的媒體踩到似廢物，點解聰明如羅致光會搶往去揀? 佢一則固然是睇中徐英偉的潛質，二則是看上徐英偉的民建聯背景。勞福局推動的法案若想在立法會通過，如果得唔到民建聯這個大黨支持，都幾難過到關。問題是若民建聯唔想見一個來自民主黨的局長，可以點算? 最簡單的方法，就係搵個民建聯的副局長，由佢先去搭路，民建聯都會俾吓面啩。
政壇高人話，新政府可能更加需要和建制派抱緊，特別注意「更加」這兩個字，是和現屆CY政府比較，CY本來有建制支持，唔需要特別下功夫，但林鄭來自公務員體系，若然得唔到建制派支持，在立法會寸步難行。羅致光睇得通呢個局，所以就在揀副局就早著先鞭了。
