政事
CY早幾日請假離港，沒有公布去向，惹起一番猜測，先有人估佢要避開周日的六四遊行，更有評論員話佢上大陸面聖，處理黨事，華潤前董事長宋林事件和摩根大通中國前行政總裁方方事件有關，佢要北上解話咁話，總之猜測甚多。
Ariel睇番成件事，估計真相唔係咁。首先話佢避開六四遊行，六四主菜唔係遊行，係六四集會，無端端走開兩日避咗個遊行，跟住返來，又唔避個集會，有少少無厘頭。加上記者今日問CY六四佢都唔答，咁避又好唔避又好無乜分別。
至於話佢北上面聖，大家有無留意CY離開搭晚上11點幾、12點飛機，呢啲機似去英國，唔似返大陸喎，無理由飛去歐洲再繞個大圈返大陸啩。
Ariel八咗一下，CY有家人在英國倫敦，過去辦啲家庭事，唔係公事，期間並無返過大陸，亦無見過大陸官員。
Ariel
** 博客文章文責自負,不代表本公司立場 **
政務司司長林鄭昨日(周日)為西九文化區發展補補飛，她早前在立法會說，在文化水平未趕上前，興建西九第三批文化設施是浪費，後來被文化界批評。林鄭昨日強調，日前的說法並非針對表演者水平，亦無貶低文化界之意，反而是希望在未來幾年，多在文化軟件方面精益求精，希望文化界人士放心咁話。
林鄭話有信心216億元的注資可完成第一批及第二批項目，並一定會建設第三批項目，只是建設的時間仍要檢討。
林鄭出來解釋吓都係好事，不要令人覺得佢講到香港文化界好唔得，Ariel相信她當日的說法只是「到時先算」的意思。西九明顯超支，216億無可能起晒三期，政府的策略是斬件，第三期工程費唔向立法會申請住，以免要和立法會大對決，但政府仍希望在今年暑假休會前，能夠得到立法會財務委員會通過3億元的撥款搞區內基建工程。
既然第三期起幾多要到2017年下屆政府先至定，要打仗都係下屆政府打，而家未知起唔起，所以林鄭沒有必守的立場，也不用同任何一個界別發生口角，自然也唔想得罪文化界啦。
