唔好俾自己窮

世界盃今晚開波啦！巴西號稱足球王國，但搞世界盃就搞到一榻糊塗。今晚賽事開鑼，但開幕戰的聖保羅哥林多球場（Corinthians Arena）及其他至少兩座比賽場館仍未完全完工，呢個國家搞世界盃搞到好牙煙。

由6月開始，巴西抗議、罷工浪潮此起彼落，據聞身為主辦國元首的巴西總統羅賽夫，為了躲避巴西群眾的喝倒彩，不出席開幕式，成為歷屆世界盃開幕典禮的特色。當然，開幕禮能否順利舉行，仍是未知之數。惟一慶幸嘅係聖保羅地鐵工會同意恢復營運，不致令公共交通癱瘓。

香港人對巴西瞭解不多，睇波的朋友知道巴西足球了得，炒股的就知佢係「金磚四國」之一，就係知咁多啦。2001年，高盛首席經濟師奧尼爾（Jim O'Neil）首次提出金磚四國概念。四國是巴西（Brazil）、俄國（Russia）、印度（India）和中國（China），取其第一個字母，加起來成為BRIC，就係「磚」的發音。2003年，奧尼爾在一份題為《與「金磚四國」一起夢想》的研究報告中預測，到2050年，世界經濟格局將重新洗牌，「金磚四國」將超越包括英國、法國、意大利、德國在內的西方已發展國家，與美國、日本一起躋身全球新的六大經濟體。

當年好多香港人都有買過「金磚四國」嘅基金，不過，如果揸到依家，就十居其九「瀨嘢」啦。巴西以至好多新興經濟體的確威咗10年，增長好快。巴西更一度躍升至全球第六大經濟體的地位。不過由於巴西經濟太過依賴原材料出口，尤其係鐵礦，2008年的金融海嘯及國際市場的疲弱，對原材料需求大幅下降，直接打擊巴西經濟。2011年和2012年的經濟增速明顯放緩，巴西2011年國內生產總值（GDP）增長只有2.7%，2012年再降到0.9%，去年略為反彈，亦只有2.3％。今年仲差勁，市場剛剛將巴西經濟增長預測從1.5%調降至1.44%，2015年的預期則由原先的1.85%調降至1.8%。以新興國家計，相比起中國7.5%的增長，巴西呢啲低增長率等同衰退。

巴西經濟增長率大降，但物價急升，通貨膨脹率高踞不下，一個漢堡飽賣130港元一個，民眾根本挨唔住，加上犯罪活動日益猖獗，政治非常唔穩定。巴西人民見到國家主辦世界盃花費了約110億美元，自然感到非常憤怒，唔抗議逼政府改善生活至奇啦。

藉著世界盃這件盛事，巴西的情況亦見見日報，使我們對巴西多些瞭解。巴西的經歷給了我們一個教訓，經濟搞唔好，國家窮困，人民受苦，講乜都無用。

至於香港，將要面對的一個難點，就是如何處理自由行的問題。香港政府提出要削減自由行，商界憂慮不已，但市民額首稱慶，據友人反映，週六周日，沙田新城市廣場，自由行旅客多到水洩不通，已經造成市民好大不便，怨聲四起。民意所趨，看來政府不減不行。關鍵係究竟如何落刀？削減幾多？政府出手時務必十分小心，不要落藥過猛，搞瓜經濟，睇波之餘睇吓巴西的經濟慘劇，記住唔好俾自己窮呀。

盧永雄

阿爺發表《一國兩制在香港特別行政區的實踐》白皮書，幾個泛民團體去中聯辦請願，話無咗高度自治。唔好介意我咁講，政改正朝雙輸的方向發展，佔中運動愈來愈激，阿爺愈來愈硬，令政改滑向破裂的敗局。

這個局面是一步一步發展出來。泛民從來都有激進派與溫和派，激進派唔喜歡同阿爺妥協，鍾意借外國力量逼阿爺。溫和派其實都好堅持民主理念，但係唔怕同阿爺談判，民主黨就在2010年同中央達成政改協議，推動政制向前發展，當年司徒華華叔未死，有膽有力去做。但事後民主黨被激進泛民不斷狙擊，陷入比較被動的局面。在這個背景下，佔中運動就出來了，而且愈走愈偏。

第一個偏差，以佔中取代談判。佔中的本義是佔領中環，無論如何將之包裝成「愛與和平」，它都是一種激烈行動。佔中由學者戴耀廷發起，初時只是一個概念，慢慢變成具體行動，演化出來的形式充滿浪漫化兼夾理想化，又有商討日，又有全民投票，將希臘城邦式民主帶到現實裏。但不管這個運動如何浪漫，其本質都是放棄同阿爺商討，想以社會運動逼阿爺就範。恕我直接問一句，香港社會大眾準備好上街和共產黨抗爭嗎？為何未經細思，就放棄談判，走上街頭對抗之路呢？阿爺出白皮書預備了一年，就是為了回應年幾前開始的佔中運動。你激，阿爺也激。

第二個偏差，以激進方案取代溫和方案。理想主義的學者，唔搞慣政治運動，當然唔夠政客玩。佢哋在投票選擇那三個方案俾6.22全民公投時，就俾激進派偷襲，以全部三個都包含公民提名或政黨提名的方案，佔晒三個位，所有沒包含公民提名的溫和方案全數出局。佔中運動到這一刻已被激進派騎刧，三個方案都無得揀，都係激嘢。佔中的投票就好像泛民批評的特首選舉一樣，都係無得揀的假選舉，以確保不會選出可以和阿爺協商的溫和方案。你咁搞，咪逼阿爺出手囉。

  

第三個偏差，未發生，但好大機會發生，到真正佔中時，你想用「愛與和平」？唔使旨意，激進派唔用愛亦唔會和平，佢哋實會騎劫整個運動，好快打交，而且粗口橫飛，打到頭破血流。阿爺當然唔會客氣，實會同你硬打硬。港澳辦主任王光亞早兩個星期見一個訪京團時已講明，必要時可以出解放軍。可以用「無眼睇」三個字總結，咁樣香港可以爭到普選嗎？唔會吧，政制只會原地踏步。

激進泛民有意搞激，但係仲有好多泛民本來不是如此，點解成件事要俾人騎刧，走上不會成功的道路？點解唔可以行番出來，行出一條新路，避免政制原地踏步呢？

盧永雄