係咪減少自由行，係近期社會熱話，傾到熱哄哄，就連特首梁振英前日開行政會議前，亦主動講到。但梁特首短短五分鐘講話中，有句說話原來暗藏玄機，唔知係咪呢排新聞多，無引起太多注意。
話說CY講到早前聽到的係一方面意見，過去兩、三個禮拜，開始有另外一種聲音出現，就係工商界同旅遊界，但最終點做，就要由返中央決定。
照字面睇，好似無咩嘢。但如果留心啲聽，講話中先後兩次講到「希望不會太遲」。有人就推測中央已經就收緊自由行的研究結果應該到咗幾乎收筆的階段，好快就會扑鎚，所以CY就開到聲，話「希望不會太遲」啦，咁就真係要睇吓遲遲唔發聲的工商、零售界人士，最後的「齊」發聲會唔會「太遲」。
正路推算，嚟緊6.22投票同7.1兩個關，自由行的決定唔似在7.1前公布，應該去到7月中先公布啩。
講開工商界，做過旅發局主席的田北俊又重提建議，將「一簽多行」改為「一日一行」，話打擊到水貨客之餘，又唔會影響真正的旅客。
但建議就被政府一巴打散。商務及經濟發展局局長蘇錦樑尋日喺立法會，回應議員質詢時提到，原來96.5%的一簽多行旅客本身已經係「一日一行」，純粹實施「一日一行」，對減少旅客人次作用唔大。
田大少話晒佢都做過旅發局主席六年，今次有啲唔熟書喎，定係自由行模式近一、兩年變太快？
Ariel
** 博客文章文責自負,不代表本公司立場 **
阿爺強硬出招，整本「一國兩制」白皮書出嚟，引起香港政壇震撼。據聞，有泛民中人拎住本白皮書左睇右睇，希望搵到新論點再出嚟反撃，就連特首回應白皮書的記者會內容，一樣成為泛民的「溫習」目標。
講到最惹人注意的回應，都要首推大律師公會的四頁聲明，聲明引用咗2008年時公會的一份聲明，話本港司法制度獨立於行政、立法之外，並非管治團隊一員。當時大律師公會的主席，就係而家貴為律政司司長的袁國強。
袁國強之後急急澄清，話當時聲明重點係，法官唔應該被視為行政機關一部分，認為呢個觀點至今都無錯，又話白皮書的講法同當年公會的聲明無衝突。
西環同添馬艦中人都好留意住外界對白皮書的反應，政壇高人覺得從阿爺角度睇，司法機構執行法律，亦可解釋香港內部事務的法律條文，刑事案有罪與否就係由法庭裁定，橫睇掂睇，都好難講司法機構無參與治港。
高人又話喺《基本法》下，有關行政、立法、司法機關的內容，全部都放喺「政治體制」的章節內，所以好明顯北京會覺得司法機關係治港班子的組成部分啦。
至於做過大狀公會主席的湯大狀話有法官係外國人，點樣愛國呢？
高人聽完冇好氣咁話， 1997年7月1日凌晨李國能率終審法官出來宣誓，阿爺諗法好直接，認為不同普通法地區有不同的政治體制，香港實行普通法，是在一國兩制下的普通法，本地或外國法官都應接受這一政治現實，宣誓效忠後按基本法履行職責是對香港法官的基本要求。
資料來源：YouTube截圖
聽聞政府都預咗呢場仗唔易打，各種力量都可能摩拳擦掌出招回應白皮書，總之這個暑假不平靜呀。
