世界波開鑼，同朋友吹水，話題離唔開睇波同賭波。陸羽仁鍾意睇波但向來唔喜歡賭波，因為賭錢係失金遊戲。不過見朋友講得興高彩烈，都加把口。
其中有個朋友話瑞士隊勝出嘅賠率100倍，係唔係買得過？瑞士隊編在E組，當中對手比較強嘅係法國，其他兩隊雞雞哋，厄瓜多爾同洪都拉斯，第一輪出線應該唔係問題。
惟一考功夫的地方係下一輪對手係F組，當中有阿根廷、伊朗、波斯尼亞同尼日利亞，阿根廷絕大機會首名出線，所以瑞士一定要贏到法國隊，先至唔會碰上阿根廷，才有機會入八強。當然，瑞士要捧杯，機會相當細，所以賠率至有100倍，但你話佢有無機會打入八強，甚至四強？又未必唔得。
有朋友又話，瑞士隊雖然無表面睇咁冷，但即使打入八強、甚至四強，但捧唔到杯，最終係要輸錢。我睇到黃國英有個賭法，又幾得意，可以分享一下。佢話落注瑞士隊，見到佢入到八強，就不斷落注買佢嘅對手。這就好似買保險一樣，如果瑞士贏到冠軍，固然盤滿砵滿啦，那些買對手輸掉的，就當保險費，蝕了算數。若果瑞士隊中途在八強、四強玩完，買對手贏嘅錢，又可以保番買瑞士隊所輸嘅錢，我覺得這個策略幾有趣。賭波同炒股一樣，愈熱愈難買，賠率根本反映唔到當中的風險。
吹水過程中，我又發現一個唔係好多人留意的馬會必勝玄機：香港賭波的賠率差過英國。有個朋友聽到我哋話瑞士隊賠率有100倍，於是走去馬會落注，但發現只有80倍，佢問會唔會係瑞士隊嘅贏面高咗，所以賠率下降呢？但我查一查英國嘅賠率，仍然係100倍，只係香港馬會賠得少。馬會收盤之後，轉頭射去英國落盤，無風無浪，已經食硬其中的差價啦。所以你話點夠馬會賭呀！
陸羽仁
** 博客文章文責自負,不代表本公司立場 **
人人都喜歡炒作，炒股、炒樓、炒Bitcoin。炒作的時候，當然向好的方向想，打響算盤，想著可以賺幾多錢。但現實上，炒燶的機會卻比較多，以下就是一個炒燶樓的例子。
話說有位朋友最近到沙田名城睇樓，與經紀聊天，提到一名北方客炒樓損手慘劇。四年前樓市興旺，名城挾著強勁廣告推出，有北方老闆來到名城，牛刀小試，先買一個單位玩玩。他買入一個建築面積980方呎、實用面積739方呎的中型單位，位處高層，買入價908萬元，建築呎價9265元、實用呎價12280元。
經紀覺得這名內地買家是炒家，因為建築期付款比較貴，即供會比較便宜，而這位仁兄選擇了建築期付款，估他是想放低首期，未必要等到1年後收樓，若樓價已升，便沽出獲利，去銀行上會都唔使。
但好衰唔衰，特首選舉唱到行要增加供應，樓市高位呆滯，振英哥上台，連推「雙辣招」，辣到樓市痾血不止。北方客間樓不升反跌，被逼收樓上會，可能打算市道好轉，便馬上沽貨走人，期間沒有積極放租，結果挨多三年，單位在最近才賣出。沽出價825萬，建築呎價8418元、實用呎價11163元，賬面上，樓價唔見咗83萬元，加埋厘印費、律師費都唔見130萬以上，傳媒會話損失仲係有限數。
不過這個講法絕對是隱惡揚善。因為內地人向本地銀行借錢，最多只能夠借到五成，即係借大約454萬，呢筆數一年利息12萬元，4年都近50萬。但相對他投入的首期加上手續費大約500萬元現金，支付本地銀行的利息，其實只屬「毛毛細雨」而已。
以國內近幾年現金緊拙的環境，內地人放數俾人，即使對方攞間樓嚟抵押，都要收20厘年息，如果沒有抵押，隨時收30至40厘。即係話，如果這名溫州人沒有跑到香港炒樓，將錢留在內地放數，一年少少地收100萬元利息，4年已經收到接近400萬元。
來香港炒樓的結果卻是，樓價加手續費輸130萬，香港供樓4年利息輸50萬，再加上原來可以賺到的400萬元放數利息的機會成本，這位仁兄其實損失580萬元！你話傷唔傷?
大市向上的時候，炒作賺錢容易，放低些少資本，打個電話，講幾句就搞掂。但市道逆轉，隨時死得人，大家見到以上的例子，樓市其實仍屬少跌階段，樓價由908萬跌到825萬，只不過係跌了9.1%，表面睇唔係好多。但對炒家而言，已經跌得好傷，如果插深啲你話點算?
據聞這名北方客後來唔肯來港賣樓，直情無眼睇。要經紀飛到北方追他簽約，才做成這單生意，可見這個炒樓經驗對他而言，是何其慘痛呢！炒嘢唔係咁易呀。
