星期五晚立法會財委會審議新界東北撥款引發成衝擊事件，繼續喺政壇發酵。
由梁特首到林司長，今日再有保安局長，齊聲譴責暴力衝擊立法會，報章引述政府消息點名六個團體，指涉暴力衝擊議會的大批青年來自包括土地正義聯盟、左翼二十一、青年重奪未來、香港人優先、古洞北發展及學聯等組織。
那邊廂組織集會的八個團體就開記者會，反駁係財委會主席吳亮星不公，沒有權力限制議員發言，突然決定剪布，觸發場外示威者憤怒，衝擊立法會。
香港基本法委員會副主任梁愛詩則話擔心「佔中」行動，會像日前衝擊立法會，和平開始，暴力收場。雖然阿爺官方暫時沒有出聲，但Ariel今日睇到中央電視台的新聞網，發現央視新聞台報道咗立法會被衝擊的事件，記憶應該第一次報道香港呢類新聞。
http://news.cntv.cn/2014/06/15/VIDE1402801921259813.shtml?from=singlemessage&isappinstalled=0
北京消息就認為央視新聞唔係隨便乜嘢都會上，咁樣係顯示北京嚴重關注事件。睇嚟六、七月政治氣氛可能愈趨繃緊，今年的暑假，政界人士要有心理準備，冇往年咁輕鬆去個長途旅行囉。
Ariel
** 博客文章文責自負,不代表本公司立場 **
立法會周五晚反新界東北大衝擊，當時立法會財委員主席吳亮星突然話收到立法會秘書處通知，因為立會外有衝擊，要腰斬會議馬上休會，泛民當然叫好，但建制派就媽媽聲，唔知吳亮星點解作呢個「明智」決定。
後來立法會主席曾鈺成在周六凌晨向記回應衝突時主動話，「由於出面嘅混亂情況，當時我見到咁，建議財務委員會主席考慮早一啲結束個會，避免喺底下個衝擊、暴力嘅情況，會造成更加大嘅事故」。
原來吳亮星口講的「立法會秘書處」，係曾主席，吳亮星幫曾主席保密，但曾主席就自爆，唔介意俾人知係佢建議腰斬會議。
不過當時財委會內部正有大好形勢可以剪布，拉布的主力長毛入咗冊，當晚會議雖然陳志全、陳偉業、梁耀忠等仍然係咁提臨時動議，但好多泛民無開會、或者無出聲，不排除部份人都放水想新界東北前期撥款快快過。哈哈，但吳亮星剪布都唔識，俾激進泛民質兩質又縮手，結果曾主席訊息一來，一建議休會，吳亮星就洩埋氣，馬上腰斬會議，錯過周五剪布的好機會。
政壇高人話，曾主席叫休會避免更大暴力事故，邏輯欠通。今個星期五不剪布，下個星期五剪、或者再下個星期五剪，就無暴力? 下星期五貼近6.22投票，再下個星期五貼近7.1遊行，唔搞更大單嘢，點發動人投票同遊行r呢，拖得愈遲，暴力愈多，咁顯淺的道理都唔明? 難怪建制派議員對當日的休會決定媽媽聲啦。
