立法會上周五的新界東北撥款大龍鳯餘波未了，贊成或反對示威的朋友短訊、短片飛來飛去，不過其中一條應該是有線的直播新聞片都幾有意思。
鏡頭所見，一個示威者瞓喺地，一個便衣差人去拖佢起身，示威者一腳伸去差人個肚度，腳一撑差人就向後飛開。到差人爬番起身，個示威者就扮暈瞓喺地。
傳片俾我的朋友投訴，你地傳媒工作者乜唔係報道事實，點解呢啲示威者踢完差人就扮暈的新聞片，閃現一次後就唔再出呢？
我話老老實實呢啲咁深嘅問題我唔係幾識答，不過好簡單，我搵個地方幫你貼出來咪好多人睇到囉，結果我就夜媽媽寫咗呢篇文啦。大家自已睇片啦。
小鯊
** 博客文章文責自負,不代表本公司立場 **
王維基的香港電視昨日宣布裁員207人，同時又話再申請免費電視牌照，又話司法覆核。老實講我雖然好想港視開台，但睇王維基的新聞睇到有啲悶，日又講夜又講，只有口水不見人來。
唔好介意我事後孔明去講（其實一早有此感覺），王維基早前開晒記者會炮轟通訊管理局，講到好似好惡，但實情係想撤退。睇埋昨日港視的通告，直情覺得王維基係大撤退，搞咁多大龍鳯，主題只有一個：責不在我。
小鯊開宗明義支持港視攞免費電視牌照，但係真係唔想食佢個公關套餐，特別係昨日那場戲，炒咁多人都唔打算做咯，唔做就唔做，可以話「我唔做只因一男子唔俾我做」，唔好好似而家咁一路炒人一路又話申請牌照，乜有政府招收申請咩？佢咁搞令人有個錯覺覺得佢過幾個月會開台，實情係點大家心照。王維基的手法好似劈緊友的黑社會個口一路喊打，兩隻腳一直後退。
小鯊始終唔明，港視已行到呢一步，點解唔做手機移動電視（按足通訊局話得的制式），甚至網絡電視都可以做住先，一路做一路爭。我又唔係幾明點解王維基覺得網絡電視咁無得做，死都唔肯搞。佢咁迷信免費電視，都係一種舊思維。
最後想講句，唔該王維基將「警界線」其餘咁多集放埋上網，唔好吊住大家癮啦。
臨尾想收筆時，睇到蘋果日報話維基有Plan C，搞網上購物平台，俾各戶在佢哋網站上銷售產，港視為啲客拍廣告短片，希望佢今次係搞真啦。
