政事
立法會曾主席今日發威宣布進一步加強立法會的保安措施，可以話嚴陣以待聽日議會內外可能出現的大龍鳳。
曾主席話發現去立法會參觀的導賞團有異常狀況，有班後生仔在參觀過程中，到處影相，拍攝大樓內場地的設備，又嘗試進入各個地方。亦有持立法會出入證的人士，攞住平面圖逐層去睇，呢啲現象引起立法會職員的注意。
知情人士話，通過閉路電視，見到呢啲情形，就好似大型活動前，啲人去踩吓場睇定點走位咁，知情者仲話持有出入證的人士係一位泛民議員助理。據聞呢種情況不單令立法會行政管理委員會唔敢掉以輕心，政府高層亦都關注，並研判有理由相信衝擊活動係有預謀，唔係示威者所講的臨時起義。
聽落似係充滿摩拳擦掌的氣氛喎，難怪各方都高度關注喇。
Ariel
** 博客文章文責自負,不代表本公司立場 **
《東周刊》有勁料，爆出美國國防部前副部長沃夫維茲密會肥佬黎五粒鐘，單新聞有震撼性。曝光後肥佬黎就回應話只係好友聚吓舊。
千萬唔好以為沃夫維茲退咗休，只係智庫組織「美國企業研究所」的一名成員，查實佢係猛人一名，屬鷹派人物。Ariel索到料，佢暗中代表美國政府遊走亞洲，推動各國圍堵中國，線人爆料話佢可以直入緬甸總統吳登盛的辦公室，亦可以一個電話打俾印尼的蘇西洛總統就可以去見佢。若然佢只是一個退休副部長，就無呢種力量啦。
線人相信佢的動向，同美國最近連串圍堵中國的動作有密切關係，例如本來緬甸同中國幾Friend，近呢兩年，美國出招拉攏總統吳登盛同反對派領袖昂山素姬和解，吳登盛放番昂山出來，緬甸跟手投入美國陣營，疏遠中國。
Ariel又觀察到東周有張狗仔相見到沃夫維茲拖住個喼，上遊艇啫，拖咗個喼有啲奇怪，聞說原來佢今趟嚟香港時間只有兩日，主要見肥佬黎，見完就飛去亞洲其他國家繼續串連，由此可見肥佬黎的重要性。
唔好以為香港小小地方只係一個氹仔，得個一呎水，其實好多世界級的巨龍都會嚟香港玩水，真係睇到有啲滴汗啦。
