世界杯開打，人人睇到眼矇矇，不知日夜。爆冷連場，西班牙大熱倒灶，首圈出局，葡萄牙C朗無料到形象，深入民心。
早兩日約了位細侄食早餐。基於保護隱私關系，就改佢個名叫Richard啦。Richard在美國名牌大學畢業，在外資銀行做分析員，佢老竇搵我同佢講講炒股心得。不過，成個早餐，講股票時間不多，主要都係噴其他口水。講世界杯之餘，又講佢公司新來的靚女同事。
Richard仔講起這位靚女同事就眉飛色舞啦，話呢位美女樣子有九成似C朗女友、俄國名模伊琳娜，樣靚身裁好。雖然身為分析員，平日上班穿著端莊，包實魔鬼身段，仍然叫同事睇到眼突突。Richard 沒有問我太多關於股市的運作，話題總在這位女同事身上打轉。又話前兩日收工後一班同事一齊去老蘭吹水，同佢傾得幾投契，佢覺得個「伊琳娜」對佢有意思，仲話如果娶到佢做老婆就正啦，講到流晒口水的樣子。
我描一描Richard的尊容，6呎差8吋，既無C朗身型，更無C朗樣貌，似馬勒當拿多啲。佢讀書確係幾叻，不過，在外資大行工作的，邊個讀書唔得叻？即使讀書唔叻，都會有個好叻的老竇，先至入到去打工啦。論智力，論家底，個個同事都唔會弱過Richard，呢個「伊琳娜」，又邊會輪得到Richard呢？
正當我遐想連篇的時候，Richard又問我，「Uncle，你覺得呢個同事，追唔追得過呢？」我反問Richard，「你點解要追佢？究竟係想追求短暫的興奮，抑或想娶佢做老婆？」
Richard一臉認真，話佢剛剛畢業，要以事業為重。以前在美國，要追女仔，好容易，晚晚玩到天光都得，不過老竇教落，可以玩，但唔可以玩得太癲，所以佢唔會好似那些典型美國仔，晚晚換畫。佢只想搵個固定的女朋友，將來可能結埋婚，圓埋父母心願，都講唔定。
我不知Richard的說話是真是假，但見他一臉誠懇，而且佢的確無花花公子的本錢，我就答佢，呢種機會，輪唔到你啦。你估做「伊琳娜」男友咁易做？以你這樣的沉實外貌，「伊琳娜」身裁樣貌好過你，學歷智慧又唔差過你，以佢的本錢，老闆鍾意佢，客戶又鍾意佢，好容易就向上爬升。「伊琳娜」做分析員都未發揮到盡，改行去投資銀行部，升得仲快！長遠而言，你根本騎佢唔住。佢叻過你，你頂唔頂得順？
我怕佢唔明，愈講愈白。更大劑的，這種靚女，樣貌身裁太爆，想平實都唔容易，因為有好多烏蠅會飛埋，白一點講句，如果Richard你好似C朗咁型咁威，好多烏蠅照完鏡後，或者會唔敢埋嚟，但以你副尊容，好多人都會覺得好你好多，唔撲埋嚟至奇，趕極都唔散，到時得個煩字。呢種紅海無謂游埋去啦，不如揀個樣貌得，但能力同你差好遠，或者能力唔錯，不過個樣唔得的藍海，至游埋去，會幸福好多。
Richard聽完我說話，相當頹喪，可能係對呢位「伊琳娜」念念不忘。我話人貴自知，最緊要係多照鏡也。
黃毅力
** 博客文章文責自負,不代表本公司立場 **
