習大大的青蔥歲月

上周較忙，無時間整理早前睇到的一段有關習大大的片段，依家先同大家分享吓。

早前毛拍手在內地各大門戶網站睇到一段習大大十年前接受訪問，講述佢四十多年前到延安梁家河村做農民的經歷，呢段故事都俾人炒咗好多次，尤其係內地官媒，喺習大大上任前後都有好多文章講到，多數都集中講佢點樣同農民一奮鬥，努力為村民呢啲正面報道。

官媒再炒番呢段新聞都係「平民情懷最動人」的非常正面寫法，但由於上載全個訪問，訪問中習大大坦言當初去到農村只係為咗逃避文革的鬥爭，又話自己當時有偷懶唔願挨苦等等，仲承認半年後返番過北京，後來無路可走再番去延安，就真正融入農民的生活，由怕被蚤咬、食唔慣粗糧、做農活輸俾十五、六歲的大姑娘，到後來克服晒所有的困難，訪問雖然長啲，有耐性的網友可以睇吓，你就發覺習大大講真係幾平民架。

 

或可按此觀看：http://star.news.sohu.com/20140613/n400789091.shtml

好多政論家都話，上山下鄉呢段經歷，對習大大影響好深刻，毛拍手曾經聽一過太子黨友人講過一段感受，佢話「近平和熙來(薄熙來)，就是文革兩人不同的經歷，有了不同的結局。」

佢覺得習大大願吃苦去了陝北最窮的地方，雖然苦，但那裡的人民相對純樸，沒有戴有色眼鏡去對代黑五類的後代(當時習大大的父親習仲勛被打成反革命)，使青少年時期的習近平雖受父親案件牽連，但感受到人間有愛；相反薄熙來雖留在了北京，但就入了落難子弟的監獄，那裡的獄卒對佢非常差，甚至要呢個官二代扮馬拉車比賽，跑勝了才有飯開，呢位太子黨認為薄公子接觸到係人間的惡，覺得呢啲經歷令薄公子心理被嚴重扭曲，以致於兩位官二代有好唔同的從政經歷，修成了天與地的果。

毛拍手聽完佢咁講，唔敢講佢完全對或者錯，只係覺得太子黨都可以有不同的路，而決定點行的係自己。

毛拍手

** 博客文章文責自負,不代表本公司立場 **

前中央辦公廳主任令計劃的兄長令政策涉嫌嚴重違紀違法，被中紀委調查的消息，昨日好似政壇重磅炸彈咁，轟動京城內外。令政策本人雖不算是很大的官，但令計劃的名字過去十年喺中南海響噹噹，可以話行走中的人冇人唔識，中央辦公廳主任，最直接的講法就係總書記的大秘書，有個咁有實力的弟弟，令政策的動向當然引人關注啦！

今早，官方新華社旗下的網站發表咗一篇文評論令政策被查，題目叫「朝裡有人也不靈」文章話令政策涉嫌違紀遭調查的消息一時間讓輿論嘩然，過去有句老話說，「朝裡有人好作官」，但現在是「朝裡有人也不靈」，內容幾乎插到「副國級」的弟弟令計劃身上。

不過，未到中午，文章就被刪去，呢一刪，政壇仲多揣測，令政策一出事，外界的焦點自然放在兄弟姐妹會否受牽連的話題上，毛拍手咁啱撞到位商人，佢遊走內地多個年頭，亦都接觸過令家兩兄弟，摸住酒杯底話好迷茫到底京城吹咩風，尤其係令計劃事隔一日仲出現喺中央視新聞聯播，好似好多互相矛盾的訊息。

毛拍手話睇北京政局要分開大、小局，仲有微局來分析，睇得遠啲、清楚啲，冇咁容易企錯位。

大局係習大大打貪冇面俾，大官小官，個個貪過啲都要人人自危，即使今日風光露面，唔代表明天唔出事，關鍵有冇做個過貪腐那些事兒。

小局嘛，以內地官場的邏輯，如果仍然大權在握，屋企人好少俾人郁得到，呢個又係一值得留意的現象。

至於政壇仲會有一啲微局，令計劃雖然已離開中南海大管家中央辦公廳主任呢個位置，但佢係全國政協副主席兼中央統戰部長，點計都係「副國級」，即係黨和國家領導人行列，新華社係官媒，寫文去諷刺佢，多多少少都出咗格，篇文章被「槍斃」，其實唔係咩奇怪事。但仲有一點可以參考，猶記華潤集團前一哥宋林出事前幾日仲發過聲明話舉報人造謠，所以不能見到新華社撤文，就說就等於冇事。

梳理完成件事，結論係北望神州政局，都係要抓住大局，京城到底邊個會唔會出事，唯有係冇貪腐的官員，仲要緊跟習大大，大力反貪，全心全意做好自己份工，先至會安全㗎。