政事
民主黨成員林子健上月聲稱被內地人員擄走禁錮及虐打，警方調查後控告他一項誤導警務人員罪，案件今日在九龍城裁判法院再度提堂。
林子健於庭外表示「心情平靜，無咩野」，被問及會否認罪時，林指「到時你就知咖喇」。
今日比較特別的是只有民主黨總幹事蔡雨龍陪同林子健出庭。早前陪林子健一齊開記者會的民主黨元老李柱銘和何俊仁等人全部無影，民主黨主席胡志偉亦無到場。
只有民主黨總幹事蔡雨龍（左）陪同林子健出庭。
林子健在庭外被問及民主黨主席胡志偉有否對他失去信心時，林回應話：「係咩，冇聽過喎」另問到有否與胡聯絡時，林思索數秒並表示「我哋嘅友誼冇變到」，又指黨友間各有不同看法。
政界中人話，唔好怪李柱銘和何俊仁無出現，佢地都被林子健誤導咗，而家真相其實幾清楚，佢地仲點出來撐呢？
Ariel
** 博客文章文責自負,不代表本公司立場 **
39位建制派議員日前聯署發信俾教育局長楊潤雄，反對校園散播港獨。本來建制派反港獨好正常，奇就奇在其中一個聯署人謝偉俊事後話有誤會，佢只係「被簽名」喎。
謝偉俊事後對媒體講，佢覺得建制派聯署唔出好過出，因為校園應否講港獨呢個問題，應該由學校自己討論，外界包括政府唔應該俾壓力院校。負責組織聯署的是「建制派副班長」陳克勤，謝偉俊話自己回覆陳克勤「I'll pass」。
謝偉俊話陳克勤可能誤會，「陳克勤以為pass係等於通過咁解」，以為佢同意聯署，而加埋佢個名入去，其實佢講「I'll pass」係解做好無奈地唔想參加。不過佢唔想批評人，無諗住追究。
坊間有人好鐘意笑陳克勤的英文，所以謝偉俊講到英文問題，外界亦較易入信。不過齣戲有下文，陳克勤噚日就喺facebook出貼子，上書「躺着也中槍。經一事，長一智。建制派很應該團結一致」。可能佢覺得咁講唔夠味，再加#「班長唔易做」、「太儍太天真？」
陳克勤的facebook貼子意有所指。
政壇高人話，阿爺對港獨問題絕不退讓，吹雞叫建制派表態唔出奇，正常的建制派一般亦唔會唔簽，但叫做簽完之後又反悔，亦絕對唔奇。呢啲根本唔係英文問題，係態度問題，陳克勤太老實啦，咪俾人擺咗上枱囉。
高人話，反對派叫謝偉俊做「西環契仔」，若然佢係真係「西環契仔」，佢點會唔簽聲明，同意簽就不會出現所謂英文問題啦。若然係假，佢其實唔係「西環契仔」，根本唔想簽，咁總會有一個唔簽名兼放飛機的理由，不過大家以後就唔好叫佢做「西環契仔」啦，否則會唔會誹謗咗西環呢又?
