39位建制派議員日前聯署發信俾教育局長楊潤雄，反對校園散播港獨。本來建制派反港獨好正常，奇就奇在其中一個聯署人謝偉俊事後話有誤會，佢只係「被簽名」喎。
謝偉俊事後對媒體講，佢覺得建制派聯署唔出好過出，因為校園應否講港獨呢個問題，應該由學校自己討論，外界包括政府唔應該俾壓力院校。負責組織聯署的是「建制派副班長」陳克勤，謝偉俊話自己回覆陳克勤「I'll pass」。
謝偉俊話陳克勤可能誤會，「陳克勤以為pass係等於通過咁解」，以為佢同意聯署，而加埋佢個名入去，其實佢講「I'll pass」係解做好無奈地唔想參加。不過佢唔想批評人，無諗住追究。
坊間有人好鐘意笑陳克勤的英文，所以謝偉俊講到英文問題，外界亦較易入信。不過齣戲有下文，陳克勤噚日就喺facebook出貼子，上書「躺着也中槍。經一事，長一智。建制派很應該團結一致」。可能佢覺得咁講唔夠味，再加#「班長唔易做」、「太儍太天真？」
陳克勤的facebook貼子意有所指。
政壇高人話，阿爺對港獨問題絕不退讓，吹雞叫建制派表態唔出奇，正常的建制派一般亦唔會唔簽，但叫做簽完之後又反悔，亦絕對唔奇。呢啲根本唔係英文問題，係態度問題，陳克勤太老實啦，咪俾人擺咗上枱囉。
高人話，反對派叫謝偉俊做「西環契仔」，若然佢係真係「西環契仔」，佢點會唔簽聲明，同意簽就不會出現所謂英文問題啦。若然係假，佢其實唔係「西環契仔」，根本唔想簽，咁總會有一個唔簽名兼放飛機的理由，不過大家以後就唔好叫佢做「西環契仔」啦，否則會唔會誹謗咗西環呢又?
Ariel
** 博客文章文責自負,不代表本公司立場 **
前特首梁振英最近加入兩間公司擔任董事，被議員指有利益衝突之嫌。不過睇番CY做的是非謀利公司，講唔上有乜利益衝突。
CY出任一帶一路國際合作香港中心有限公司及大灣區香港中心有限公司的董事。特首辦話，於本月11日(本周一)收到梁振英出任兩公司的通知，現正處理。特首辦話根據梁振英提供的資料，那兩間香港公司都是沒有股本的擔保有限公司，不會參與商業或專業服務。
知情人士話，據前行政長官離職後聘任指引(Guidance Note on Post-office Employment for Former Chief Executives)，當中第4(a)條指前行政長官離職後一年內，不得接受聘用，不能出任任何商業或專業的董事或合夥人，或自己開展任何商業或專業。但第5條規定的情況例外。
指引第5條規定，前行政長官在離職後3年管控期內，在三種情況下，可以不用尋求委員會批准，出任全職或兼職職務，包括: 1. 中央政府或特區政府任命的職位。2. 慈善、學術或其他非謀利組織的任命。3. 非商業性的地區或國際組織的任命。
網上圖片
知情人士話，指引列明前特首出任上述三種組織的職務，無論受薪與否，皆不需委員會的批准，僅需知會委員會。據悉CY出任董事的一帶一路國際合作香港中心有限公司及大灣區香港中心有限公司，都是註冊非謀利組織，CY更沒有受薪，所以僅需知會委員會，不用委員會批准。
佢話議員指CY出任這兩間公司董事有利益衝突之嫌，但這兩間公司並非謀利，CY自己又唔受薪，公司和個人都無利益，自然談不上利益衝突。
Ariel 倒覺得，事件的新聞性在於，CY參與搞這兩間非謀利公司，證明佢對大灣區和一帶一路事務都好有興趣喎。
